Tõoma 14

1Paul la Barnabas n ta paɛ Ikonium teŋa poan la ba keŋɛ kɛn' Yudoma zamehegɔ yire la mɛ. Bilam te ba mɔɔlɛ yelesoma la te Yudoma la sɛba n dagɛ Yudoma kekeko nam Yesu. 2Ge Yudoma sɛba n ka bote ba nam Yesu yɛla la ihege mɛ dekɛ sɛba n dagɛ Yudoma la tugule Yesu po'oheba la. 3Paul la Barnabas yee teŋa la poan te dabeha ka pɔ'ɛ. Ba tɔgɛ Na'ayenɛ yɛla bo nɛreba la ge te dabeem ka ka bɔna ba zen'en. Na'ayenɛ bo ba paŋa te ba daa eŋɛ yelekerehe zo'e zo'e te a pa'alɛ te a zo'ohogɔ yeletɔgɔm la dela sera. 4Nɛrekooŋɔ teŋa la poan la yelege la boyi'. Sɛba pa' la Yudoma la poore ge te basɛba la daa pa' Paul la Barnabas la poore. 5Te sɛba n dagɛ Yudoma la basɛba la Yudoma la basɛba la ba kpɛ'ɛndoma la ko' nɔyenɛ te ba namehɛ sɛba n de Yesu po'oheba la ge lobe ba la kuga. 6Te ban wom nɛreba la n zegere te ba eŋɛ ba se'em la, Paul la Barnabas zɔ' yeregɛ keŋɛ la Listra la Derbe teŋhe n boe Likaonia teŋa poan la, la teŋse'ehe n lɛm bilam bɔba la. 7Bilam te ba mɔɔlɛ Yenɛ Yelesoma la bo nɛreba. 8Ban paɛ Listra teŋa la poan la, boraa kayema n boe Listra teŋa poan nan ka tabelɛ keŋɛ. Se'ere n sɔe la, ba dɔgɛ en te a dela kɔɔrɔŋɔ. 9Kɔɔrɔŋɔ wa n daa zin' bini la, a kelehere Paul yetɔgom la mɛ. Te Paul nyɛ' te kɔɔrɔŋɔ wa sakɛ a suunre poan te a ban'an la wan bahɛ. 10Bilam te Paul behɛ en ziin ge yele kpe'eŋkpe'eŋo te, Ihege saazuo ze'ele. Te kɔɔrɔŋɔ la vaɛ ihege ze'ele nya kena kaara. 11Nɛrekooŋɔ la n nyɛ' Paul n eŋɛ se'em la, ba pin'ilom vɔɔla ba teŋa Likaonia yetɔgom poan te, Baga la n bala lebege nɛreba wa'an to zen'en na. 12Ba yi'ire Barnabas la Zeus ge yi'ira Paul la Hermes. Se'ere n sɔe te ba yi'ira Paul bala la dela enŋa n daa tɔgɛ yetɔgom la. 13Ba bagarɛ Zeus n boe bɔseko poan te ba kaanbera la mɛ' du' la teŋa poan. Te keema se'em n kaanbere Zeus la tare lɔlehe la tiihe puru keŋɛ nayaŋa la. Te enŋa la nɛrekooŋɔ la bɔta te ba tare lɔgɔrɔ la keŋɛ ta kaanbɛ Yesu tontoneba la. 14Barnabas la Paul n ta wom nɛreba la n bote ba eŋɛ ba se'em la, ba aanhom ba lɔgɔrɔ mɛ pa'ala te ba ka bote de ge gɛnregɛ nɛrekooŋɔ la teŋasoka nyabera te, 15Nɛreba wa, bene te ya eta bala? Tomam kɔ'ɔn de'a la nɛreba, asaaleba wo ya mɛhe la. Tomam wa'an kalam na te to mɔɔlɛ la Yenɛ Yelesoma la bo ya te ya tee ya potɛn'ɛra ya yelese'a n ka tare vɔnrɛ wa bahɛ. Ge la ya dekɛ ya mɛhe lɛm Yenɛ, se'em vɔe. Enŋa naam saazuo la teŋa la mɔga la sɛla woo n boe ba poan. 16Wonseren ha, Yenɛ daa bahɛ nɛra woo te a eta la n bote se'em. 17Ge Yenɛ daa pa'alɛ a paŋa n zone se'em daarɛ woo la etesomɔ la te a eta la. Enŋa n bahere te saa niira te dia maala. Enŋa n bo'ore ya dia la sunpeelom. 18Ge yetɔgom bona zan'an la ka ta'an bahɛ te Paul la Barnabas te ba gu' nɛrekooŋɔ la te ba da kaanbɛ kaanbegɔ la bo ba. 19Bilam te Yudoma basɛba ze'ele Antiok teŋa n boe Pisidia teŋa poan la Ikonium teŋa poan na paɛ ba. Ban paɛ la, ba tɔgɛ nyaŋɛ te nɛrekooŋɔ la pa' ba poore. Te bama la nɛreba la nya lobe Paul la kuga ge da vue en yehe teŋa la poan tɛn'ɛha te a ki' mɛ. 20Ge Yesu nɛreba n gilige behera en la, a ihege mɛ le lebe teŋa la poan. Te yiimbeere la enŋa la Barnabas n keŋɛ Derbe teŋa poan. 21Te Paul la Barnabas n paɛ Derbe teŋa poan la, ba mɔɔlɛ yelesoma la bo nɛreba te nɛreba zo'e zo'e sakɛ ba sunya poan bo Yesu. Paul la Barnabas n bahɛ Derbe teŋa poan la, ba le lebe la Listra teŋa poan. Ban ze'ele bilam la, ba keŋɛ la Ikonium teŋa poan nya ze'ele Ikonium teŋa la paɛ Antiok teŋa la n boe Pisidia teŋa poan. 22Ba han ne paɛ teŋsɛka poan, ba ne ka'an Yesu nɛreba la te ba da le malom lebe pooren la ban nam Yesu se'em la. Ba le yele nɛreba la yeti, Sɛba woo n dole Yesu sore la wan nyɛ' daaŋɔ ba bɔŋa poan ge la ba nya nyaŋɛ kɛn' Yenɛ Sɔ'ɔlom la poan teŋa ba'ahegɔ daarɛ. 23Paul la Barnabas doohe Yesu po'oheba la n lagahɛ zen'se'ehe po'oha la zan'an loohe zuodoma ba poan. Ban zagahɛ ba mɛhe po'oha, ba loe keendoma la bɔ'ɔra ba to Daana Na'ayenɛ se'em te ba nam la nu'uhen. 24Te Barnabas la Paul le lebe doohe Pisidia teŋa poan keŋɛ Pampilia teŋa poan. 25Ba mɔɔlɛ Yenɛ Yelesoma la Perga teŋa poan ge nya daa keŋɛ sige Attalia teŋa poan. 26Ban ze'ele Ataliah teŋa poan la, ba nya dekɛ la ɔɔnrɔŋɔ kantɛ yakɛ keŋɛ Antiok teŋa poan. Antiok teŋa poan, zen'an te Yesu po'oheba la n boe bini la la dekɛ ba eŋɛ Yenɛ nu'uhen te enŋa n behe ba ge te ba nyaŋɛ ton toonse'ere te ba ton ba'ahɛ wa. 27Ban paɛ Antiok teŋa poan la, ba lagahɛ Yesu po'oheba la woo la zen'an kayema. Ban lagahɛ ba bala la, ba yele ba sɛla te Yenɛ eŋɛ bo ba la. Ba le yele ba yɛ'ɛha Yenɛ n yu'ɛ sore se'em bo sɛba n dagɛ Yudoma te ba nam Yesu se'em. 28Ba yee bɔna la sɛba n sakɛ bo Yesu la te dabeha ka pɔ'ɛ.

will be added

X\