Tõoma 13

1Sɛba n tɔgɛ Yenɛ yɛla la sɛba n pa'ale nɛreba Yesu lagaŋɔ n boe Antiok teŋa poan n wana: Barnabas la Simeon se'em n de Sabega la Lukius se'em n ze'ele Kirene teŋa na la Manaen se'em la Naba Herod n de a taaba wa zo'e la Saul daa lagom bɔna bini mɛ. 2Ba daa ta zagahɛ ba mɛhe ge na'aha Na'ayenɛ te Yenɛ Sea la yele ba yeti, Loe ya Barnabas la Saul bo mam te n bahɛ ba te ba tom toonse'a te n yi' ba na te ba tom la. 3Te ban zagahɛ ba mɛhe po'ohɛ ge dekɛ ba nu'uhen pagalɛ Barnabas la Saul zuto, ba bahɛ ba te ba keŋɛ. 4Yenɛ Sea la tom Barnabas la Saul la te ba keŋɛ sige la Seleusia teŋa poan. Ban ze'ele bilam la, ba zom la ɔɔnrɔŋɔ kantɛ keŋɛ Kiprus teŋa poan. 5Ban paɛ Salamis teŋa poan la, ba mɔɔlɛ Yenɛ yɛla Yudoma zamehegɔ yire la poan. Yon Mark me lagom bɔna la ba soŋora ba tooma la poan. 6Ban ze'ele Salamis teŋa poan la, ba keŋɛ yakɛ Kiprus paɛ la Papos teŋa poan. Bilam te ba nyɛ' tiimdaana te a yu'urɛ de'a Bar Yesu. A dela Yuda teŋa nɛra ge daa pan'ahɛ a mea te enŋa dela Yenɛ nɔtɔgɔha ge dagana. 7A zɔ' n de Sergius Paulus. Sergius Paulus dela zuodaana sɔna Kiprus teŋa behera ge me daa tara yam. Te zuodaana la yi' Barnabas la Saul a zen'en. Se'ere n sɔe la, a bote ba tɔgɛ la Yenɛ yɛla bo en. 8Ge Bar Yesu Greek yu'urɛ dela Elimas, te tiimdaana Elimas gu' ba mɛ te ba keŋɛ. A daa zegere te a bahɛ te zuodaana la nam Yenɛ yetɔgom la. 9Saul yu'urɛ me dela Paul. Te Yenɛ Sea la wa'an Paul zen'en na te a behɛ tiimdaana la nɛŋa ziin 10ge yele en yeti, Ho kɔ'ɔn de'a la Sagona dayɔa. Ho bote ho dekɛ sɛla woo n de som eŋɛ la be'em ge te ho suunre kɔ'ɔn tɛn'ɛha la sɛla n dagɛ ma'an. Ho me le zegera te ho bahɛ te to Daana Yesu yelemɛŋɛrɛ la de'a ponpɔrɔŋɔ. 11Te Na'ayenɛ wan bahɛ hɔ te ho fɔ' nananawa kan nyɛta sɛla tara, tara la daanse'ere daarɛ te a mea bɔta te ho le nyɛta. Paul n ta yele n wana ba'ahɛ la, bilam bilam te tiimdaana Elimas la fɔ' ge nya ɛɛra nɛrese'em n wan soŋɛ en pa'alɛ sore. 12Sergius Paulus zuodaana la n nyɛ' wana wa la, a nam Na'ayenɛ yɛla la. La me eŋɛ en la pakere la ban pa'alɛ Na'ayenɛ yɛla la. 13Paul la a taaba la bahɛ Papos teŋa mɛ ge le zom ɔɔnrɔŋɔ kantɛ keŋɛ Perga teŋa n boe Pampilia teŋa poan. Ge Yon Mark bahɛ ba la bilam ge ŋmɛregɛ lebe Yerusalem teŋa poan. 14Ban ze'ele Perga teŋa poan la, ba paɛ la Antiok kayema n boe Pisidia teŋa poan. Te Vo'ohogo Daarɛ n ta paɛ la, ba keŋɛ kɛn' la zamehegɔ yire ta zin'ire. 15Te zuodaana kaanlɛ Pa'alegɔ la Nɔtɔgɔheba la ba'ahɛ ge nya yele Paul yeti, To sɔɔnrɔ wa, ya han tara la yetɔgom sebo n wan bahɛ te nɛreba wa malom kpe'em Yenɛ yɛla poan, sore boe bo ya. 16Te Paul ihege saazuo yebehɛ a nu'o ge yeti, N Israel taaba la sɛba n dagɛ Yudoma sɛba n boe kalam po'oha Yenɛ wa, kelehe ya mam. 17Yenɛ se'em te Israeldoma wa po'oha wa n daa loe to sɔyaabdoma. Yenɛ enŋa mea n daa eŋɛ ba teŋkantɛ daa ta de'a saama bɔna Egipt teŋa poan la. A paŋa daa zo'e ya te a daa bahɛ te ba yehe Egipt teŋa la poan 18ge daa ŋmibe la ba pɔgɔtia la ha yuun pihinaahe. 19Yenɛ daa sagom buuri bayopɔe Kanaan teŋa poan ge da bahɛ to a mea nɛreba Israeldoma la sɔe bɔna bini. 20Ge se'em ma'an te ba daa bɔna Egipt teŋa poan tara tara la ban daa sɔe Kanaan teŋa poan wa daa de wo yuun kɔbehe senaahe la yuun pihinuu. Yenɛ n daa ta eŋɛ wana wa ba'ahɛ la, a daa bahɛ te kema gankera ba tara tara la se'em ma'an te Yenɛ nɔtɔgɔha Samuel daa wa'an na la. 21Te ban daa ta yele Samuel te a bo ba Naba la, Yenɛ daa bo ba Saul ta de'a ba Naba behera ba ye'a yuun pihinaahe. Naba Saul daa dela Kis dayɔa yehe Benyamin buuri poan na. 22Yenɛ n daa ta yehe Saul na'am la poan la, a daa bahɛ te David n daa tee de'a ba naba. Na'ayenɛ daa yele David yeti, Mam nyɛ' te Yesse dayɔa David de'a boraa sɛka n tare Na'ayenɛ mɛŋa suunre. A dela nɛrese'em n wan tom sɛla woo te mam yele en te a tom. 23Yenɛ daa loe la David buuri la poan yaaŋa kayema te a de'a Israeldoma faanra wo enŋa Yenɛ n daa biŋe a nɔɔrɛ se'em la. La daa dela Yesu. 24Yesu n daa ta pin'ilom te a tom a tooma la, Yon daa pon te'ele diŋɛ a nɛŋa mɔɔlɛ Yenɛ yɛla bo Israeldoma te ba tee ba potɛn'ɛra ba yelebe'ero poan ge la ba to'e ko'om soa. 25Te Yon tooma n daa ta ba'aha la, a daa yele nɛreba la yeti, Ya tɛn'ɛhe te mam dela ane? Ma dagɛ se'emdaana te ya gura la. Ge a yee poore. Ge mam pɔ'ɛ n ta nyigele perege a tagara. 26N sɔɔnrɔ wa n de Abraham yaahe la sɛba n dagɛ Yudoma zan'an n boe kalam po'oha Yenɛ wa, la dela te wuuha te Yenɛ daa bo to faanrɛ yetɔgɔm wa. 27Yerusalem nɛreba la ba zuodoma la daa ka baŋɛ te Yesu n de faanra la. Ge bala mea zan'an ban daa bahɛ te ba ko en ba me bahɛ te nɔtɔgɔheba yetɔgom la de'a yelemɛŋɛrɛ te ba kaanla Vo'ohogo Daarɛ woo. 28Ban daa eere a tuure zen'an la la ba ta'an ko' en koŋe la, ba daa sine ge yele Pilate te a bahɛ te ba ko' en. 29Te ban daa ta eŋɛ sɛla woo te Yenɛ gɔŋɔ la yete ba wan eŋɛ Yesu la, ba nya daa dekɛ en mɛ sige punpuuredɔɔ la zuo na tare en keŋɛ ta laɛ. 30Ge Yenɛ daa bahɛ en te Yesu ihege a kum la poan. 31N daa ihege a kum la poan la, dabeha zo'e zo'e te a daa dekɛ a mea pa'alɛ enŋa la sɛba daa ne ze'ele Galilee teŋa keŋɛ Yerusalem teŋa poan la. Nananawa bama n de a seradoma n wan yele Israeldoma bama n nyɛ' Yesu la ba nini te a eŋɛ la sɛla. 32Tomam me bo kalam te to bahɛ te ya wom la Yenɛ Yelesoma la. Yenɛ n daa biŋe a nɔɔrɛ te a eŋɛ to sɔyaabdoma se'em la. 33Nananawa Yenɛ eŋɛ dɛ bo la tomam sɛba n de ba yaahe. A daa eŋɛ lana wa la n daa bahɛ te Yesu ihege a kum poan la. La golehɛ eŋɛ yooma gɔŋɔ la poan kaanlegɔ boyi' poan yeti te, Zina wa, Ho dela mam dayɔa te mam me dɛna ho sɔ. 34Yenɛ daa me tɔgɛ yɛhera n daa ihege Yesu a kum poan te a pon da pɔ'ɛn. A daa yele daarɛ deyema yeti, N wan kan' kan'soŋa bo ho wo mam biŋe n nɔɔrɛ bo David se'em la. 35Zen'an kayema le golehɛ yɛta te, Ho kan bahɛ te ho Fa'adaana nyɛ sagaŋɔ. 36David saŋa la a daa ton sɛla te Yenɛ bɔta en te a ton la mɛ ge nya daa ki'. N daa ki' la, ba daa laɛ n lɛm la a sɔdoma yɔɔrɔ te a pɔ'ɛn. 37Ge se'emdaana te Yenɛ daa ihege en a kum poan la daa ka pɔ'ɛn. 38N sɔɔnrɔ la sɛba zan'an n bo kalam wa, mine ya dena wa. La dela Yesu yu'urɛ poan te ba daa mɔɔlɛ yelebe'ero bahega la daa bo ya la. 39La me le dɛna la ena mea poan, te se'em woo n sakɛ bo Yesu wan bɔna fai yelese'a woo poan te Moses pa'alegɔ daa ka ta'an fan' ya bahɛ. 40Bala, behɛ ya ya zuto soŋa soŋa te sɛla te nɔtɔgɔheba la yele la da ta' ya. 41Kelehe ya, yamam sɛba n kɛɛte. Behɛ se soŋa soŋa te la eŋɛ ho pakerɛ. N yeti n eŋɛ la sɛla ho saŋa wa poan, te ba han ta tɔgɔra de yele ho kan sakɛ te la dela bala. 42Paul la Barnabas n ta tɔgɛ ba'ahɛ la, ba yehe zamehegɔ yire la poan mɛ. Ban ta yɛhera la, nɛreba la yele ba mɛ te ba le malom le lebe Vo'ohogo Daarɛ la deyema na la ba le tɔgɛ pa'ahɛ yelese'a te ba wom wa. 43Nɛreba la me n ta bahɛ zamehegɔ yire la poan la, Yudoma la sɛba n lebege ba mɛhe eta wo Yudoma la zo'e zo'e belom Paul la Barnabas ta bahɛ. Te Paul la Barnabas kan'an ba te ba bɔna Yenɛ zo'ohogɔ la poan. 44Vo'ohogo Daarɛ la n le ta paɛ la, nɛra woo wone te a yehe teŋa la poan mɛ keŋɛ zamehegɔ yire la poan te a kelehe to Daana Yesu Yelesoma la. 45Yudoma la nyuune mɛ zo'e zo'e la ban nyɛ' te nɛrekooŋɔ la kelehe Paul yetɔgom la. Bilam te ba toora en ge yete n tɔgɛ sɛla woo la dela ponpɔrɔŋɔ. 46Ge Paul la Barnabas sine ge maan tɔgɛ kpe'eŋkpe'eŋo yeti, La daa nare mɛ te ba tɔgɛ Yenɛ Yelesoma la bo ya yia. Ge yan diŋɛ zagahɛ dɛ ge pa'ala tɔ te ya ka bote vom sebo n ka tare ba'ahegɔ Yenɛ zen'en la, te ye wan mɔɔlɛ dɛ bo la sɛba n dagɛ Yudoma la. 47Bala te Na'ayenɛ daa bo nɔɔrɛ yele to yɛhera Yesu yele te, Mam sɛ' hɔ ze'ele kalam te ho dɛna la nɛɛhom bo teŋhe. Dekɛ mam faanrɛ paŋa wa te ka paɛ nɛra woo n boe teŋparɛ wa zuo. 48Sɛba n dagɛ Yudoma la n wom Paul la Barnabas yetɔgom la, ba tare sunpeelom ge pɛngɛ Na'ayenɛ yetɔgom la. Sɛba te Na'ayenɛ loe te ba tara vom sebo n ka tare ba'ahegɔ enŋa Na'ayenɛ zen'en la sakɛ bo Yesu. 49Na'ayenɛ Yelesoma la yeregɛ la teŋa la bɔbɔre woo. 50Ge Yudoma la tugulɛ la pɔgɔse'ehe n de bontateba ge po'oha Yenɛ la la boraa se'ehe n de zuodoma teŋa la poan la. Ban eŋɛ wana wa la, ba nya pin'ilom mɛ nameha Paul la Barnabas ge dige ba teŋa la poan. 51Ban eŋɛ Paul la Barnabas la bala la, ba piihe ba na'ma puuhugo bahɛ ge bahɛ teŋa la ge keŋɛ Ikonium teŋa poan. 52Sɛba n de Yesu po'oheba bɔna Antiok teŋa poan la daa tare sunpeelom ge te Yenɛ Sea la me bɔna la ba.

will be added

X\