Tõoma 12

1Saŋkaŋa ha la te Naba Herod daa pin'ilom namehera Yesu lagaŋɔ la nɛreba basɛba. 2A daa bo sore te ba dekɛ so'a ko' Yon keema Yames 3ge en ta behɛ te sɛla te a eta la pee Yudoma sunya la, a nya maahom teregɛ mɛ nyɔkɛ Peter. Wana wa eŋɛ la se'em ma'an te ba ne de'ena Boroboro N Ka Tare Mi'ihom De'eŋɔ. 4Ban ta nyɔkɛ Peter la, ba dekɛ en eŋɛ la pakadeen. Pakadeen la te ba bahɛ te pɛɛntɛɛnreba pia la bayoobe gura en ba nɛreba banaahe sɔhɔna. Naba Herod me eŋɛ a potɛn'ɛrɛ te Azootole De'eŋɔ la daarɛ han tole, a bahɛ ne te Peter yehene pakadeen la na te nɛra woo nini nyɛta en ge te a gankera en. 5Bala la, ban dekɛ Peter eŋɛ paka deon la, lagaŋɔ la nɛreba po'ohere la Yenɛ bɔ'ɔra en. 6Yiimbeere te Naba Herod wan tare ne Peter yehe nɛrekooŋɔ la, Peter daa ginhe mɛ yu'uŋɔ te a nu'uhen ba' la banhe seyi' ta' la pɛɛntɛɛnreba bayi' nu'uhen te ba gura en. Ge te pɛɛntɛɛnreba basɛba me gura pakadeen nayaŋa la. 7Bilam bilam te Na'ayenɛ soŋora wa'ana ze'a te bugum nɛɛ pakadeen la. Te soŋora la gorɛ Peter bɔkɔ bigehe n nɛɛ ge yele en yeti, Ihege kalam kalam! Te banhe la n ba' Peter nu'uhen la mea pon ba'ahɛ. 8Te soŋora la le yele en yeti, Ga' ho sɛganɛ la la ho pere ho tagara la ge la ho dekɛ ho fugɔbega lobe la ho doohe na. Te Peter daa eŋɛ soŋora la n yele en se'em la 9ge ihege doohe en yehe pakadeen la poan. Peter daa ka mi' te soŋora la n ete sɛla la dela yelemɛŋɛrɛ bii ponpɔrɔŋɔ. A daa tɛn'ɛre te a nyɛ' la zaanheŋɔ. 10Soŋora la la Peter la keŋɛ doohe la yia guruba nɛŋa tole, paɛ tole sɛba me n tagale nya paɛ kuto nayaŋa la te ba keŋ yeŋa kɛn'ɛra teŋa poan la. Ban paɛ bini la, nayaŋa la mea n daa yu'ɛ te ba doohe bini tole. Ban ta bɔna palɛ la zuo kena sigera ha la, bilam bilam te soŋora la mɛlom Peter zen'en. 11Peter n ta bɔkɛ sɛla n eŋɛ la vɔnrɛ a nya yeti, Nananawa n nya baŋɛ te sɛla n eŋɛ la seren dela yelemɛŋɛrɛ. La dela Na'ayenɛ tom a soŋora na te a to'e ma bahɛ Naba Herod nu'uhen la yelese'a zan'an te Yuda teŋa nɛreba tɛn'ɛhene te ba eŋɛ la. 12Peter n ta seren baŋɛ sɛla n eŋɛ la vɔnrɛ la, a kɔ'ɔn keŋɛ la Mari yire se'em n de Yon Mark ma la, zen'en te Yesu nɛreba la zo'e zo'e lagahɛ bini mɛ soha Yenɛ bɔ'ɔra Peter. 13Peter n paɛ la, a ŋmɛ' koleŋa sɛka n boe yeŋa la te pɔsɔɔ te a yu'urɛ dɛna Aroda wom yehe na te a behɛ n de se'em. 14Pɔsɔɔ la n ta paɛ koleŋa la nɔɔrɛn la, a baŋɛ Peter konkore mɛ. Bilam te a poorɛ ba' pee, te a ka yu'ɛ koleŋa la ge zɔ' le lebe deon la ha ta yɛta te, Peter n ze' yeŋa ha la. 15Te nɛreba la n boe deon la yele en yeti, Ho zuo n ane wam! Ge pɔsɔɔ la sine ge kelom teregera mɛ te la dela sera, te nɛreba la le lebehe yeti, A yi dela Yenɛ soŋora! 16Ge Peter sine ge kelom ŋmɛ'ɛra koleŋa la mɛ te ba nya wa'ana yu'ɛ. Ban yu'ɛ nyɛ' en la, la de pakerɛ bo ba. 17Peter n kɛn' la, a dekɛ la nu'o pa'alɛ ba te ba go'e vole ge nya tun bo ba Na'ayenɛ n eŋɛ se'em la se'em ta'an bahɛ en te a yehe pakadeen na la. A le yele ba te, Bahɛ te Yames la Yesu nɛreba n wom n yele sɛla la. Ge te a nya bahɛ ba zen'en la mɛ ge keŋɛ zen'an kayema. 18Beere n daa ta yelegɛ la, la daa dela daaŋɔ bo pɛɛntɛɛnreba la n daa gure Peter la. 19Naba Herod n wom wana wa la, a bo nɔɔrɛ te ba ɛ Peter na'ma ge ba ka nyɛ' en. Bilam te a gankɛ pɛɛntɛɛnreba la ge bahɛ te ba ko' ba. Yele'ana wa zan'an n ta tole la, Naba Herod yehe Yudea teŋa mɛ nya keŋɛ Kaesarea teŋa poan te dabeha eŋɛ fiin wa. 20Naba Herod sunsunya daa nyii mɛ la Tire la Sidon teŋa nɛreba. Bala te ba daa lagahɛ taaba keŋɛ te ba ta nyɛ' en. Ge yia ba daa belom la Blastus te a soŋɛ ba, se'em nɔɔrɛ la Naba la nɔɔrɛ n daa de boyena pa' ba pore. Ge ba nya keŋɛ Herod zen'en te ba sohɛ en te sundɛngerɔ daa wa'an ba teŋasoka na. Se'ere n sɔe la, ba daa to'ohe ba dia la Naba la n sɔe zen'an behera la. 21Naba Herod daa ta loe la daarɛ deyena te a tɔgɛ bo a nɛreba. De daarɛ n daa paɛ la, Herod yɛ la a na'am lɔgɔrɔ zin'an a na'am gɔŋɔ poan ge nya tɔgɛ yetɔgom la bo nɛreba la. 22Herod n daa ta ba'ahɛ a yetɔgom la, nɛreba la vole mɛ yɛta te, La dagɛ la asaala n tɔgɔre ge la dela bagarɛ n tɔgɔre. 23Bilam bilam te Daana Na'ayenɛ soŋora ŋmɛ en bahɛ teŋa te bonyole yooro di' en te a ki'. Se'ere n sɔe la, a daa ka dekɛ pɛnka bo Yenɛ ge a dekɛ bo la a mea. 24Ge Yenɛ yɛla daa sine ge kelom yeregera la zen'an woo ge te nɛreba zo'e zo'e daa nam Yesu. 25Ge Barnabas la Saul n ta tom ba tooma ba'ahɛ la, ba tare la Yon Mark ze'ele Yerusalem teŋa lebe Antiok teŋa poan.

will be added

X\