Tõoma 11

1Yesu tontoneba la sɛba n dole Yesu sore la bɔna Yudea teŋa wa poan la, daa wom te sɛba n dagɛ Yudoma la me nam Yenɛ yelehom la. 2Te Peter n ta lebe Yerusalem teŋa poan la, ba tare ba sunya mɛ yɛta te, 3Ho daa keŋɛ ta dekɛ ho mea lagom la sɛba n ka ŋma' yɔya ge me le zɔn'ɛn di' la ba. 4Ge Peter yele ba sɛla woo n eŋɛ de pin'ileŋɔ na 5yeti, N daa wa soha mɛ Yoppa teŋa poan ge daa wa nyɛ' liligere zahene te bon la yema ana wo fuo kantɛ la ze'ele saŋgbanɛ zuo sigera na wo nɛreba n gorɛ dɛ bahera na la wa sigɛ n zuin. 6Te n behɛ soŋa soŋa nyɛ' te dunhe woo la ba buuri ba buuri, bonsɛ'doma la niihe bɔna bini. 7Te n wa wom te Yenɛ yi'ire na yɛta te, Peter, ihege la ho ko' ba la ho di'. 8Ge n daa lebehe yeti, Aai, n Daana Na'ayenɛ, mam nan ka tabelɛ dekɛ sɛla n de ganleŋɔ bonɔ eŋɛ n nɔɔrɛn wa. 9Te Yenɛ ze'ele saŋgbana zuo le yi' na yeti, Da dekɛ sɛla te mam Yenɛ yete la nare te ho di' tɛn'ɛha te la ka nare te ho di'. 10Wana wa daa eŋɛ la sugumnɔɔren botan' ge te bonɔ la le malom lebe saŋgbanɛ la zuo. 11Bonɔ la n daa lebe bala la, bilam bilam te boraahe setan' te ba tom te ba ze'ele Kaesarea teŋa poan paɛ yire se'ere te n bɔna la poan na. 12Te Yenɛ Sea la yele ma te n doohe ba keŋɛ la n da fabela. Yoppa teŋa boraahe seyoobe wa, sɛba n dole Yesu sore wa, daa lagom doohe mam mɛ te to keŋɛ ta sige Kornelius yire poan. 13Ton daa paɛ la, Kornelius daa yele to n daa nyɛ' te Yenɛ soŋora ze'a a yire ge yele en yeti, Tom se'em te a keŋɛ Yoppa teŋa poan la ta yi' boraa te ba yi'ira en Simon Peter na. 14A han wa'ana, a wan tɔgɛ yetɔgom bo ya. Yetɔgom la wan bahɛ te ho nyɛ' faanrɛ hon la ho yiredoma zan'an. 15Te mam n daa pin'ilom te n tɔgɛ la, Yenɛ Sea la daa wa'an ba zen'an na wo n daa wa'an tomam me zen'an na pin'ileŋɔ poan na se'em la. 16Bilam te n daa tɛɛn to Daana Na'ayenɛ n daa yele se'em la. A daa yeti, Yon sɔ ya soa la ko'om wa, ge Yenɛ wan sɔ ya la a Sea poan. 17La dela yelemɛŋɛrɛ te Yenɛ daa bahɛ te a Sea la wa'an sɛba n dagɛ Yudoma la zen'an na wo ton daa nam to Na'ayenɛ Yesu Krista te a daa bahɛ te a Sea la wa'an tomam me zen'an na se'em la. Mam me daa dela ane wa ta'an gu' sɛla te Yenɛ bɔta te la a eŋɛ? 18Yesu po'oheba la n daa ta wom Peter n tɔgɛ se'em la, ba daa go'e ge ka le zɛrɛgerɛ en ge ba daa pɛngere la Yenɛ yɛta te, Yenɛ me bo sɛba n dagɛ Yudoma sore te ba tee ba potɛn'ɛra la ba vɔna. 19Yesu nɛreba n de Yudoma la n daa zɔ' yeregɛ keŋɛ la zen'an woo, namehegɔ la n daa sige ban ko' Stepen wa la zuo. Basɛba daa zɔ' keŋɛ la Poenisia la Kiprus la Antiok teŋhe poan tɔgɔra Yesu yɛla bɔ'ɔra sɛba n de Yudoma ma'an. 20Ge boraa se'ehe n dole Yesu sore la basɛba ge bɔna Kiprus la Kirene teŋhe poan la daa keŋɛ la Antiok teŋa poan. Ban daa paɛ la, ba daa mɔɔlɛ to Daana Yesu Yelesoma la bo sɛba n dagɛ Yudoma la mɛ. 21Na'ayenɛ paŋa daa boe la ba ge te nɛreba zo'e zo'e daa me nam Yesu de daarɛ. 22Yesu lagaŋɔ la n boe Yerusalem teŋa la poan n daa ta wom yelese'a n eŋɛ Antiok teŋa poan la, ba daa tom la Barnabas bini. 23Barnabas n paɛ Antiok teŋa poan la, a poorɛ pee ya la n nyɛ' Yenɛ n eŋɛ som bo ba nɛreba la se'em la. Bilam te a tɔgɛ bo ba soŋa soŋa te ba nana to Daana Yesu bala la ba sunya zan'an. 24Barnabas dela nɛresoŋɔ, ge a nam Yesu ge te Yenɛ Sea la bɔna la en. Nɛreba zo'e zo'e me wa'ana sakɛ ba sunya poan bo to Daana Yesu. 25Te Barnabas keŋɛ Tarsus teŋa poan ɛɛra Saul. 26En nyɛ' Saul la, a daa tare en te ba keŋɛ la Antiok teŋa poan. Yuun moone te bama bayi' la lagom bɔna la Yesu lagaŋɔ la ge pa'alɛ nɛreba zo'e zo'e. La dela Antiok teŋa poan te nɛreba daa pin'ilom yi'ira Yesu tontoneba la te Krista nɛreba. 27Bala ma'an ha la te nɔtɔgɔheba basɛba ze'ele Yerusalem teŋa keŋɛ Antiok teŋa poan. 28Te nɔtɔgɔheba la ayema Agabus ihege saazuo la Yenɛ Sea la paŋa poan yele sɛla n wan wa'an pooren na. A yeti, Kom wan wa'ana teŋa wa zan'an poan. Wana wa daa eŋɛ la saŋse'a te Klaudius daa de'a Naba la. 29Te Yesu dɔlɔba la tɔgɛ ko' nɔɔrɛ te la de'a la nɛra woo bo sɛla te a tara te ba dekɛ soŋɛ Yesu po'oheba basɛba me n boe Yudea teŋa poan la. 30Ba eŋɛ wana wa ge nya dekɛ ligiri la bo Barnabas la Saul te ba tare ta bo Yesu lagaŋɔ zuodoma la n boe Yuda teŋa la.

will be added

X\