Tõoma 10

1Kaesarea teŋa boraa n daa boe te a yu'urɛ dɛna Kornelius. Kornelius dela Aromdoma pɛɛntɛɛnreba kpɛ'ɛma la. 2Enŋa la a yire nɛreba woo dole Yenɛ te a me soŋore nahadoma la ge me kɔ'ɔn soha Yenɛ daarɛ woo. 3Yene n ta gelege te Kornelius daa wa nyɛ' te Yenɛ soŋora wa'ana a zen'an na yɛta en wo a zanhe ne mɛ la te, Kornelius. 4Te dabeem kɛn' en ge te a kɔ'ɔn kpa' behera soŋora la ziin ge yeti, N Daana, la dela bene? Te soŋora la lebehe en yeti, Yenɛ tare popeelom la ho sohoga la ho toonsoma la. Bala a tɛnre ho yele, 5ge nananawa tom boraa se'ehe te ba keŋɛ boraa kayema ta a yu'urɛ de'a Simon Peter bɔna Yoppa teŋa poan. 6Simon Peter la dela saana bɔna Simon se'em n de gbanzaba la yire n lɛm mɔgɔrɛ la. 7Soŋora la n tɔgɔre bɔ'ɔra en la keŋɛ, bilam te Kornelius nya yi' a yire yamehe seyi' la se'em n de pɛɛntɛɛnra tona bɔ'ɔra en ge me po'oha Yenɛ la. 8Ban daa paɛ Kornelius zen'en la, a yele ba sɛla n eŋɛ la, ge tom ba Yoppa teŋa poan. 9Yiimbeere te ba ta bɔna sore zuo pɔnra Yoppa teŋa poan la, Peter me zom la gɔhɔgɔ wontɛŋa n ta bɔna zuo teŋasoka te a sohɛ Yenɛ. 10En ta bɔna gɔhɔgɔ la zuo la, a kom wa dona ge te a bɔta dia te a di'. Ban boe bini dɔgɔra la, bilam te a daa nyɛ' liligere. 11A nyɛ' te saŋgbanɛ yu'ɛ sigera na wo nɛreba n gorɛ dɛ bahera na la 12te dunhe woo la ba buuri ba buuri, bonsɛ'doma, la ninhe bɔna bini. 13Bilam te Yenɛ yele en yeti, Peter, ihege la ho ko' obe. 14Ge Peter yeti, Aai, n Daana, mam nan ka tabelɛ di' sɛla n de ganleŋɔ bonɔ. 15Te Yenɛ le yele en te, Sɛla te mam yete la nare te ho di' da tɛn'ɛha te la ka nare te ho di'. 16Sugumnɔɔren botan' te wana wa woo eŋɛ ge te bon la le lebe saazuo. 17Peter n ta tɛn'ɛha sɛla te a nyɛ' wa vɔnrɛ n de se'em la, bilam bilam te boraa se'ehe te Kornelius n daa tom la n soke wa baŋɛ Simon yire la, ge nya paɛ ze'a la zanɔɔren. 18Ban daa paɛ la, ba soke yire la doma yeti, Saana boe kalam te a yu'urɛ de'a Simon Peter? 19Te Peter n sine ge kelom zegera te a bɔkɛ sɛla te a nyɛ' te Yenɛ Sea yele en yeti, Behɛ, boraahe setan' n boe kɛha ɛɛra hɔ la. 20Bala maahom ho mea la ho sige la ho da fabela ge doohe ba keŋɛ. Se'ere n sɔe la, mam n tom ba. 21Bilam te Peter sige ge yele boraahe la te, La dela mam te ya ɛɛra la. Ya wa'ana bo? 22Te boraahe la lebehe yele en yeti, Kornelius se'em n de pɛɛntɛɛnreba kpɛ'ɛma la n tom tɔ na. A dela nɛresoŋɔ se'em n bote Yenɛ yɛla ge te Yudoma bɔ'ɔra en na'ahegɔ. Daarɛ deyena te Na'ayenɛ soŋora daa wa yele en te a yi' ho te ho wa'an a yire na la ho yele en sɛla te ho tara te ho yele en. 23Te Peter tare boraahe la kɛn' te ba gan'anrɛ yu'uŋkoŋɔ. Yiimbeere te Peter ihege maahom te enŋa la saama la lebe. Yoppa boraahe sɛba n dole Yesu sore lagom doohe ba mɛ. 24Beere daa yelegɛ mɛ ge te ba paɛ Kaesarea teŋa poan, zen'an te Kornelius la ba yizuo nɛreba la a zɔdoma te a yi' lagahɛ. 25Peter n daa ta pɔnra te a kɛn' la, Kornelius zɔ' to'ohɛ en mɛ dɔnbelɛ teŋa po'ohɛ en. 26Ge Peter gorɛ en te a ihege ge te a yele en yeti, Ihege. Se'ere n sɔe la, ma yeenzuo de'a la asaala. 27Peter kelom tɔgɔra mɛ la Kornelius ge kɛn'ɛra ta nyɛ' te nɛreba kekeko lagahɛ bɔna. 28Te Peter yele ba yeti, Ya mɛhe mi' soŋa soŋa te la dela ganleŋɔ te Yudoma dekɛ ba mɛhe lɛm sɛba n dagɛ Yudoma la bii ba kɛn'ɛra ba yiya poan. Ge Yenɛ yele mam te n da dekɛ nɛra te a dela dɛngerɔ bii a ka nare n lɛm en. 29Bala yan tom te ba yi' ma la, n ka zagahɛ ge wa'ana. Ge wane te ya yi'ira mam? 30Te Kornelius lebehe yele Peter yeti, La daa dela wo wana ma'an wa, dabeha anaahe n tole te n daa wa soha n yire poan yenɛ n daa ta gelehe wontɛŋa. Bilam bilam te boraa daa wa yɛ lɔgɔrɔ te to nyagera ze'a n nɛŋa 31ge yele mam yeti, Kornelius, Yenɛ wom ho sohoga la ge me tɛnra ho toonsoma la. 32Bala, tom se'em te a keŋɛ Yoppa teŋa poan la a ta yi' boraa te ba yi'ira en Simon Peter. A dela saana bɔna Simon yire poan, se'em n de gbanzaba te a yire lɛm mɔgɔrɛ la. 33Dene poan, te mam daa tom te ba yi' ho na te ho me de'a nɛresoŋa la me wa'ana. Nananawa to zan'an bo kalam Yenɛ nɛŋa, gura te to kelehe sɛla ta to Daana Na'ayenɛ bɔta ho te ho yele tɔ. 34Te Peter pin'ilom yeti, Mam mi' nananawa te la dela sera te Yenɛ ete nɛra woo la boyena. 35Ge se'em woo n zote Yenɛ ge eta sɛla n de ma'an, Yenɛ wan to'e en ge ka behera a buuri n de se'em. 36Ya mi' yetɔgom sebo te Yenɛ daa tɔgɛ bo Israel teŋa nɛreba la. A daa mɔɔlɛ Yelesoma la te to wan tara sunma'ahom la Yesu Krista yu'urɛ poan, se'em n de nɛra woo Daana la. 37Ya le mina Yon n daa ta bo Yesu ko'om soa ba'ahɛ ge te yelese'a daa pɔhɛ Galilee teŋa yeregɛ Yudea teŋa poan se'em la. 38Ya le baŋɛ Yesu se'em n ze'ele Nazaret teŋa poan na la. Yenɛ n daa bahɛ te a Sea la paŋa daa bɔna en se'em la. Yesu daa keŋɛ bɔbɔrɛ woo mɛ eta som bɔ'ɔra nɛreba ge tebera sɛba te Sagona bahɛ te bonbɛ'ɛhe tona la ba. Se'ere n sɔe la Yenɛ daa boe mɛ la Yesu. 39Tomam daa nyɛ' la to nini wa sɛla woo te Yesu daa eŋɛ Yudoma teŋa poan la Yerusalem. Ba daa nyɔkɛ en kpa' lamenɛ punpuuredɔɔ zuo te a ki'. 40Ge Yenɛ daa ihege en a kum poan dabeha atan' daarɛ. Ge Yenɛ daa bahɛ en te a dekɛ a mea pa'alɛ la 41tomam ma'an sɛba te a loe to te to nyɛ' la to nini la to ta'an yele wa. Yesu n ihege a kum la poan la, to daa di' dia ge nyu' la en. Ge Yenɛ daa ka bahɛ en te a dekɛ a mea pa'alɛ nɛra woo. 42Ge te Yesu daa bo to nɔɔrɛ te to mɔɔlɛ yelesoma la bo nɛreba ge sɛ' ze'ele yele nɛreba enŋa Yesu n de se'em te Yenɛ loe ta a gankera nɛreba woo, sɛba n boe la sɛba n ki'. 43Nɔtɔgɔheba la zan'an daa tɔgɛ Yesu yele mɛ. Ba daa yete se'em woo n nam Yesu, Yenɛ wan bahɛ a daana yelebe'ero bo en Yesu yu'urɛ paŋa poan. 44Peter n daa kelom bɔna bini tɔgɔra mɛ ge te Yenɛ bahɛ te a Sea la wa'an sɛba woo n kelehe yetɔgom la zen'an na. 45La de pakerɛ bo Yudoma sɛba n dole Yesu sore ge lagom ze'ele Yoppa teŋa doohe Peter wa'an Kornelius yire poan na la. Se'ere n sɔe la ba nyɛ' Yenɛ n bahɛ te a Sea la me lagom wa'an sɛba n dagɛ Yudoma la zen'an na se'em. 46Ba wom sɛba n dagɛ Yudoma la n tɔgɔre yetɔgom bo buuri buuri ge pɛngere Yenɛ paŋa n zone se'em. Bilam te Peter ihege yeti, 47Yenɛ bahɛ te a Sea la wa'an nɛrebana wa zen'en na wo n daa bahɛ te a Sea la daa wa'an tomam me zen'en na se'em la. Nananawa nɛra boe wan ta'an gu' ba te ba da to'e ko'om soa? 48Ge te a bo a nɔɔrɛ te ba to'e ko'om soa Yesu Krista yu'urɛ poan. Ba nya yele Peter te a yee ba zen'en te dabeha eŋɛ fiin wa, te a kule.

will be added

X\