Tõoma 1

1Teopilus, mam golehɛ hɔ gɔŋkona wa yɛta hɔ la Yesu n daa eŋɛ yelese'a ge pa'alɛ sɛla la 2ge nya keŋɛ saazuo la. En daa na ka keŋɛ saazuo la, Yenɛ Sea la daa soŋɛ en te a pa'alɛ a tontoneba la, sɛba te a daa loe la. 3Yesu namehegɔ la n daa ta ba'ahɛ la, a daa dekɛ a mea pa'alɛ ba la te enŋa seren vɔe. Dabaherɛ pihinaahe poan Yesu daa nɛɛ a mea ba zen'en ge pa'ale ba la Yenɛ Sɔ'ɔlom n ane se'em. 4Yesu n daa boe la ba la, a yele ba yeti, Da bahɛ ya Yerusalem teŋa, ge ya gura bo'olom sebo te mam Sɔ' daa yeti a wan bo ya la. Ya wom te n tɔgɛ yɛhera bo'olom wa poan. 5Yon daa sɔ ya soa la ko'om poan wa, ge la han eŋɛ fiin wa n wan sɔ ya la Yenɛ Sea la poan. 6Yesu la a tontoneba la n daa ta lagom bɔna la, ba soke en yeti, To Daana, nananawa ho wan dekɛ te tenhen sese'ehe la le bo tomam Israeldoma wa te to behera? 7Te Yesu lebehe ba yeti, Mam Sɔ' Yenɛ ka sakɛ te ya mina daanse'ere daarɛ te dena wa wan eŋɛ. Enŋa ma'an n mi' de daarɛ. 8Ge ya wan nyɛ' paŋa la Yenɛ Sea la han wa'an ya zen'en na. Bilam te ya wan yele nɛreba Yerusalem teŋa poan, la Yudea teŋa poan, la Samaria teŋa poan la teŋhe zan'an yɛhera la yan mi' mam se'em. 9Yesu n daa ta tɔgɛ dena wa ba'ahɛ la, ba nyɛ' en te Yenɛ bahɛ en te a zɔna la saazuo ha, ge te saŋgbana ta lile en ge te ba ka le nyɛ' en. 10N daa zone saazuo la, ba ko'om behera en mɛ te bilam te boraahe seyi' yɛ fupeelehe ze'a ba zen'en 11ge yele ba yeti, Galilee teŋa nɛreba wa, wane te ya ze'a behera saazuo bala? Yesu se'em te Yenɛ daa bahɛ en te a zom saazuo la wan lebena wo yan nyɛ' en te a zom se'em la. 12Yesu tontoneba la daa ze'ele la Olive Zoore poan lebe Yerusalem. Olive Zoore ka zaan la Yerusalem teŋa poan. 13Ban daa paɛ Yerusalem teŋa poan la, ba zom la saazuo deseko te ba bɔna la. Sɛba zan'an n bo deo la poan la dela Peter la Yames la Yon la Andrew la Filip la Tomas la Bartolomu la Matu la Alpaeus dayɔa Yames la Simon se'em n tɔgɔre te a to'e Yuda teŋa bahɛ la, la Yames dayɔa Yudas. 14Ba zan'an lagom mɛ po'oha la pɔgɔhe la Yesu ma Mari la a yebehe. 15Dabeha fiin n tole la, nɛresɛba n sakɛ bo Yesu la lagom mɛ. Ba dela nɛra kɔbega la pihiyi'. Te Peter ihege yeti, 16N sɔɔnrɔ, la sontii Yenɛ gɔŋɔ la wa'an sera na. Wonseren ha Yenɛ Sea la daa soŋɛ David te a daa golehɛ sɛla te Yudas wan soŋɛ te ba daa nyɔkɛ Yesu. 17A daa dela tomam ayema. Yesu n daa loe en te a lagom tona la tɔ. 18Yudas n daa tom a pototooma to'e a yɔɔrɛ la, a dekɛ a ligiri la da' la bɔn'ɔn. Bilam te a ki' pɔn'ɛn te a poorɛ daa tanhɛ te a nyɔɔrɔ zan'an daa yurege na. 19Nɛresɛba woo n daa boe Yerusalem teŋa poan daa wom dena wa mɛ. Bala zuo te ba daa yɛta ba teŋa yetɔgom poan te Akeldama. La vɔnrɛ n de Ziim Bɔn'ɔn. 20Te Peter le yele yɛ'ɛha te, La golehɛ eŋɛ David Yooma gɔnɔ la poan te, Bahɛ te ba tiiheŋɔ zen'an woo yeregɛ, te nɛra da bɔna bini. La le golehɛ yɛ'ɛha te, Bahɛ te nɛra sɔe a na'arɛ tom a toonɛ la. 21La sontii nɛra la lagom bɔna la to te to yɛta nɛra woo te Daana Yesu ihege a kum poan. Se'em te to yete te loe la sontii te a de'a se'emdaana n daa lagom bɔna la tɔ sanse'a te Yesu daa bɔna la tɔ la. 22La sontii a dɛna se'emdaana n daa lagom bɔna la tɔ sanse'a te Yon daa bo Yesu ko'om soa la ge de'a se'em n daa lagom bɔna la tɔ sanse'a te Yenɛ daa bahɛ te Yesu daa zom saazuo la. 23Bala zuo te ba nya loe boraahe seyi'. Ayema yu'urɛ dɛna Yosef. Nɛreba basɛba yi'ire boraa kana wa la Barsabbas ge te basɛba yi'ire en Yustus. Ayema la me yu'urɛ dɛna Matias. 24Ba nya daa po'ohɛ mɛ ge yeti, To Daana, ho mi' asaala potɛn'ɛrɛ n ane se'em. Bala zuo, pa'alɛ tɔ bana bayi' wa se'emdaana te ho pon de'a ho loe, 25te a sɔe Yudas zen'an la te a dekɛ bahɛ ge keŋɛ a kenɛ zen'an la. 26Ban daa po'ohɛ ba'ahɛ la, ba nya ŋmɛ' la gbaŋa te Matias baŋa di' ge te ba dekɛ en pa'ahɛ tontoneba pia la ayena la poan.

will be added

X\