2 Timõtɩ 3

1Ge n bote n tɛɛn ho mɛ te ho mina dena wa te teŋa ba'ahegɔ dabeha la han ta pɔnra, la wan kpe'em bo nɛreba. 2Se'ere n sɔe la, toonbe'erodoma wan nɔŋɛ la ba mɛhe la ligiri ma'an. Ba wan ŋmɛ'ɛra ba nyɔn'ɔnrɔ ge toora nɛreba, ka nana ba dɔgɔreba, bii ba tara popeelom la sɛla te nɛra se'em bo ba, ka zɔta Na'ayenɛ. 3Le yɛ'ɛha, ba ka tare nɛra giinle, ba parone mɛ bɔ'ɔra nɛreba, dɛna zabzabereba, ba ka nɔŋɛ som. 4Ba ŋma'anre la nɛreba ge me tona pototooma ge me kɔ'ɔn pa'ala ba mɛhe. Ba nɔŋɛ la ba pɛngera ba mɛhe gana ba nɔŋɛ Yenɛ. 5Ba parom te bama po'ohere Yenɛ mɛ, ge ba ka bote ba bɔna bɔŋsɛka taaba te Yenɛ yetɔgom yete ba bɔna la. Bala, da dekɛ ho mea lagom la nɛrebana wa. 6Se'ere n sɔe la, nɛrebana taaba, la nananawa ne tɔgɛ la ma'ma' bo nɛreba te ba bahɛ ba te ba kɛn' ba yiya poan. Ba han kɛn' bala, ba ne pan'ahɛ la pɔgɔse'ehe n ka tare yam te ba sakɛ bo sɛla te ba yele ba la. Dena poan, pɔgɔse'ehe wa tom la be'em. Ba ete la yɛla kekeko n dagɛ ma'an te ba sunya kɔ'ɔn bɔta te ba eta la. 7Daarɛ woo pɔgɔhe wa zegere mɛ te ba zamehɛ, ge bala zan'an, ba ka ta'an baŋɛ sɛla n de ma'an. 8Magahɛ wo Yanes la Yambres n yuun kɔ'ɔn ka sakɛ bo sɛla te Moses yele la, bala mea te nɛrebana me ka sakɛ bo Yenɛ yetɔgom sebo n de yelemɛŋɛrɛ la. Nɛrebana wa ka tare potɛn'sonɛ ge me ka nam Yenɛ. 9Ge bala zan'an, ba kan nyaŋɛ sɛla te ba eta la. Se'ere n sɔe la, nɛreba wan nyɛ' la ba nini soŋa soŋa te nɛrebana taaba dela gɔɔnɔ, wo nɛresɛba me n yuun pon nyɛ' la ba nini soŋa soŋa te Yanes la Yambres dela gɔɔnɔ se'em. 10Ge han de'a hon, ho mea pon mina soŋa soŋa yɛhera sɛla te mam daa pa'ala la, la mam n daa tare n mea soŋa soŋa se'em, ho le mina mam n daa kpeŋe n mea te n eŋɛ se'em. Ho nyɛ mam daa nam Yenɛ se'em ge daa din'inha suunre se'em, ge me daa nɔŋɛ nɛreba se'em. Ho le kelom mina mam daa nyɛ' namehegɔ ge ŋmibe se'em. 11Nɛreba daa bahɛ mam te n nyɛ' namehegɔ Antiok la Ikonium la Listra tenhen poan. Ge, ban daa namehɛ mam bala la, n daa kɔ'ɔn ŋmɛ'ɛra mɛ. Daanse'ere daarɛ woo te ba ne namehɛ mam, Na'ayenɛ n ne fan' mam bahɛ. 12Yelemɛŋɛrɛ, sɛba woo n bote ba bɔna wo Yenɛ n bote ba bɔna se'em, ban bo la Krista Yesu la zuo la, ba nameherɛ ba mɛ. 13Ge toonbe'erodoma la nɛresɛba n dole pan'aha nɛreba wan malom gaŋɛ bala. Dene mea, ponpɔrɔŋdoma wan pan'ahɛ nɛreba basɛba me. Hon se'em n kelehe ba, ba wan pan'ahɛ hɔ. 14Ge bala mea zan'an, hon mea sontii ho kelom sakɛ bo sɛla to ho zamehɛ te la yele ho te la wan seren eŋɛ la. Se'ere n sɔe la, ho mi' te hon zamehere sɛba zen'en la dela sɛba n pa'alɛ sɛla n de yelemɛŋɛrɛ. 15Le yɛ'ɛha me, hon daa de bia tole na yehe zina, ho daa pon mina Toolom Golehegɔ la mɛ. La dela golokona wa poan te ho wan nyɛ' Yenɛ n ete se'em faanra nɛreba bahera ba han sakɛ bo Krista Yesu. 16Ge la dela Yenɛ n daa bahɛ te nɛreba golehɛ a yetɔgom la woo. Bo dela yetɔgom sebo n an soŋa wan ta'an pa'alɛ tɔ sɛla n de yelemɛŋɛrɛ. Bo me le bahɛ tɔ, te to mina sɛla te to eŋɛ te la de'a tuure. Le yɛ'ɛha bo pa'alɛ tɔ te to tɛɛra sɛla n dagɛ ma'an eta sɛla n de ma'an, ge pa'ala tɔ te to eta sɛla n de ma'an. 17Bala, te nɛra se'em n dole Yenɛ wan eŋɛ sɛla n de a eŋɛ. A daana maahom a mea gura la a eŋɛ sɛla woo n ane soŋa.

will be added

X\