2 Timõtɩ 2

1Ge hon n dayɔsoŋa Timoti, sɛ' ze'ele mɛ soŋa soŋa la Yenɛ zo'ohogɔ te bɔna Krista Yesu zen'en. 2Mam n daa tɔgɛ yetɔgom sebo bo ho nɛreba zo'e zo'e nɛŋa te ba daa mina te dela yelemɛŋɛrɛ la, ho me behɛ sɛba n de yelemɛŋɛrɛdoma, la ho pa'alɛ ba te bama me pa'alɛ sɛba me. 3Te hon me denɛ la ho lagom nyɛ' namehegɔ wo ho dela pɛɛntɛɛnra ka tara dabeem zabera bɔ'ɔra Yesu Krista la. 4Te pɛɛntɛɛnra la bote a eta la sɛla n wan eŋɛ a zuodaana suunre nyɛlom. Bala, a ka tɔgɔhe se'em n dagɛ pɛɛntɛɛnra la bɔŋa n ane se'em. 5Ge se'em n zote zoa kan di' nɛŋa a han ka eta sɛba n behere zoa la n yele en se'em la. 6Kaara se'em n kɔɔre n de se'em n wan di' a va'am la dia yia kɛ'a han paɛ. 7Bala, tɛn'ɛhɛ la ho behɛ yelese'a woo te n tɔgɔra bɔ'ɔra ho wa. Ge Na'ayenɛ wan bahɛ te ho bɔkɛ yɛla la vɔnrɛ n de se'em. 8Tɛnra mam n daa mɔɔlɛ Yelesoma la bo ho la. N daa mɔɔlɛ yɛhera la Yesu Krista se'em n daa vo'e a kum poan la, ge me dɛna Naba David yaaŋa la. 9Se'ere n sɔe la, mam mɔɔlɛ yelesoma la zuo te n nyɛ' namehegɔ wa. Ge ba ba' mam la banhe wo nɛra se'em n sagom yele la. Ge, ba kan ta'an ba' Yenɛ yetɔgom la banhe. 10Te dena mea zuo te mam ŋmebera namehe seko woo poan nɛresɛba te Yenɛ loe la zuo. Bala te ba me wan nyɛ' faanrɛ Yesu Krista zen'en ge te ba wan lagom la en behera wuuha a sɔ'ɔlom la poan. 11Yele dena wa dela yelemɛŋɛrɛ, To han ki la en to wan lagom ta ki la en. 12Ge te ton me n le ŋmebera namehe seko woo poan te to nyɛ' la, to me wan lagom la en sɔna behera a sɔ'ɔlom la poan. Ge, to han yeti to ka mi' en, enŋa me wan yeti a ka mi' to. 13Ge to mam han dagana birikindoma, enŋa dela birikina. Se'ere n sɔe la, a kan ta'an pa'ahɛ a mɛŋa. 14Kpeŋe ho mɛŋa la ho pa'alɛ ho nɛreba la te ba da tamɛ sɛla te n tɔgɛ bo ho wa. Kan'an ba Na'ayenɛ nɛŋa te ba da ŋmɛ'ɛra nɔkpe'ene yetɔgom poan. Se'ere n sɔe la, ba han ŋmɛ'ɛra nɔkpe'ene, la dela yoo. Ge, la wan sagom sɛba n bote ba kelehe la te ba kan le kelehe yɛ'ɛha. 15Kpeŋe ho mɛŋa la ho dɛna nɛra se'em taaba te Yenɛ wan bɔta. Ana wo tontona se'em n ka zote valom la sɛla te a tona la. De'a se'em n wan pa'ala nɛreba yelemɛŋɛrɛ yetɔgom la ge te tuure ka bɔna bini. 16Da dekɛ ho mɛŋa lagom la nɛresɛba n tɔgɔre sɛla n ka nare la. Se'ere n sɔe la, nɛrebana wa maan baha mɛ te nɛreba ka eta sɛla te Yenɛ bɔta ba te ba eta la. 17Nɛrebana wa pa'alegɔ sagone nɛra mɛ wo ban'an n nyɔkɛ nɛra sagona n se'em la. Ge, nɛreba ba yi' Himenaeus la Piletus dela ba nɛreba. Ba me pa'ale la nɛrebama n pa'ale se'em mea. 18Ba ka pa'ale nɛreba Yenɛ yetɔgom sebo n de yelemɛŋɛrɛ la. Ba yeti nɛreba te Yenɛ pon bahɛ te nɛresɛba n ki' la vo'e ba kum poan. Dena wa me dagɛ sera. 19Ge bala zan'an, Yenɛ yetɔgom la kelom dɛna la yelemɛŋɛrɛ. Yetɔgom la ane me wo ɛnberɛ se'ere n sɛ' kaŋkaŋɛ n tare paŋa la zuo. Ge te ba golehɛ eŋɛ ka zuo te, Na'ayenɛ wan pa'alɛ sɛba n de a nɛreba. Ge, nɛra se'em n yele te Na'ayenɛ yu'urɛ ka sontii a bahɛ be'em. 20La dagɛ la sanlema la sanlenpeela laahe ma'an n boe yikantɛ poan. Ge, yɔgɔrɔ dogorɔ la dɔrɔlɔgɔrɔ lagom bɔna bini mɛ. Te ninmɔ'ɔrɛ tooma dabaherɛ han ne ta paɛ, ba ne dekɛ la sanlema la, la sanlenpeela dogorɔ la tona. Ge, yelese'a n dagɛ ninmɔ'ɔrɛ la, ba ne dekɛ la yɔgɔrɔ dogorɔ la dɔrɔlɔgɔrɔ la tona. 21Nɛra sɛba n yehe ba mɛhe be'em poan ane wo sanlema la sanlenpeela dɔgɔrɔ la. Ba wan dɛna la toolom lɔgɔrɔ. Se'ere n sɔe la ba bɔkɛ la ba mɛhe ba tɔka bo Daana la, ba maahom ba mɛhe gura toonsonɛ woo. 22Te dena wa n de bala la zuo, yehe ho mɛŋa la ho da tona yelese'a n ka ane soŋa te bonbilipaalehe nɔŋɛ ba eta la. Ge, ton kɔ'ɔn eta la sɛla n de ma'an. Sakɛ bo pa'aleseko n de yelemɛŋɛrɛ la ge nɔŋɛ Yenɛ la nɛreba me. Dene ya boyena la nɛresɛba n sohore to Daana te a soŋɛ ba ge me dɛna yelemɛŋɛrɛdoma la. 23Da ŋmɛ'ɛre ya nɔkpene la yetɔgɔyoorodoma la yampɔ'ɔredoma, ho mi te ba ka nyuunre gangara la taaba. 24Ge la ka sontii se'em n tone bɔ'ɔra Na'ayenɛ gangara la nɛreba. Ge, a daana sontii a eta sɛla n ane soŋa bɔ'ɔra nɛra woo. La sontii a de'a se'em n pa'alɛ soŋa soŋa ge me da ihegera suunre tɔtɔ tɔtɔ la nɛreba. 25La sontii a sirihe a mea teŋa la a pa'alɛ nɛresɛba n ka sakere bɔ'ɔra en la te ba bɔkɛ. A han eta bala, daanse'ere Yenɛ wan bahɛ te ba tee sɛla te ba tɛn'ɛha ba potɛn'ya poan la. Bala, te ba wan sakɛ bo Yenɛ yetɔgom sebo n de yelemɛŋɛrɛ la. 26Bala, te ba potɛn'ya wan lebe na te ba le'ehɛ Sagona bɛnreka la. Te Sagona la daa pan'ahɛ ba mɛ te a ta'an bahɛ ba te ba eta sɛla te eŋɛ bɔta.

will be added

X\