2 Timõtɩ 1

1Mam Paul se'em te Yenɛ loe te n dɛna Krista Yesu tontoneba la ayema la n golehɛ gɔŋɔ wa. Yenɛ daa tom mam te n mɔɔlɛ la vom sebo n ka tare ba'ahegɔ a zen'en la te tomam sɛba n bo la Krista Yesu tara de bo nɛreba. 2N golehɛ bɔ'ɔra la n dayɔsoŋa Timoti. To Sɔ Yenɛ la to Daana Yesu Krista wan eŋɛ hɔ som ge zɔ' hɔ ninbɔn'ɔn, ge bo ho sunma'ahom. 3N bo'ore Yenɛ fara wo to yaabdoma n po'ohere en se'em la. N me mi soŋa soŋa te mam po'ohɛ se'em la dela yelemɛŋɛrɛ. N po'ohere en wontɛɛŋa la yu'uŋɔ zan'an bɔ'ɔra nɛreba, n kɔ'ɔn tɛnra ho yele la bala me po'oha bɔ'ɔra hɔ. 4N tɛnre hon daa kele la. Bala, te n bɔta te n nyɛ' hɔ, te bala te n wan tara popeelom. 5N me le kelom po'ohɛ Yenɛ. Se'ere n sɔe la, n tɛnre hon nam en se'em. Yia ho mayaaba Lois la ho ma' Eunise seren nam Yesu ge te mam me mina soŋa soŋa te ho nam en la bala mea. 6Dene poan, n bote n tɛɛn ho mɛ te ho tona toonse'ere te Yenɛ daa bo ho, mam n daa dekɛ nu'uhen pagalɛ ho zuo la ninmɔ'ɔrɛ la. 7Te Yenɛ Sea la te a bo to la ka bahɛ mɛ te dabeem n tara tɔ. Ge, a Sea la ton bo to la paŋa ge bahɛ te to nɔŋɛ Yenɛ la nɛreba, ge me bahɛ tɔ te to tara to mɛhe soŋa soŋa. 8Bala, da bahɛ te valom tara hɔ la tɔgɔsebo te to tɔgɔra bɔ'ɔra nɛreba yɛhera to Daana yele la. Da bahɛ te valom me le tara hɔ la mam, bii la ban pon nyɔkɛ mam pagɛ te n tone Yesu tooma la zuo wa. Ge ton da gangɛ ho lagom namehɛ la mam yelesoma la zuo yɛhera Yenɛ n bo ho paŋsɛka te ho tom la. 9La dela Yenɛ n fan' to bahɛ te to dɛna a mɛŋa nɛreba. Dena wa dagɛ la te tom la sɛla zuo n sɔe te to dɛna a mɛŋa nɛreba la. Ge, la dela a mɛŋa n bote se'em, la a som zuo. A eŋɛ tɔ som yɛhera la n bahɛ te Krista Yesu wa'an na ki' bo to te yelebe'ero la zuo la. A daa pon eŋɛ dena wa mɛ ge baŋɛ naam teŋa wa zuo. 10Te nananawa, Yenɛ n bahɛ te to Faanra Krista Yesu la, la pa'alɛ soŋa soŋa te a eŋɛ tɔ som. Enŋa zuo dabeem ka tara nɛreba la ba ki'. Yenɛ me le yele sera sera te to han kɛleha yelesoma la yɛhera Krista Yesu yele ge eta yelesoma la n bote to eta se'em la, to wan tara vom sebo n ka tare ba'ahegɔ a zen'en la. 11Yenɛ loe mam te n dɛna se'em n wan mɔɔla ge pa'ala yelesoma la bɔ'ɔra nɛreba. 12Te la de'a la dena wa zuo te n nyɛta namehe sena wa. Ge, bala mea zan'an valom ka tare mam. Se'ere n sɔe la, mam mi se'em te n nam la. Mam me mi' soŋa soŋa te a wan gura sɛla te a dekɛ eŋɛ n nu'uhen soŋa soŋa ta paɛ teŋa wa ba'ahegɔ daarɛ la. 13Bahɛ te yelese'a n de yelemɛŋɛrɛ te n daa pa'alɛ hɔ la bɔna ho suunren. Te yele aŋa n de yelese'a te ho wan beha dɔla. Kelom nam Yesu bala ge tara nɔŋerɛ wo tomam sɛba n boe la Krista Yesu n ane se'em la. 14Tara yelese'a te Yesu dekɛ bo ho la soŋa soŋa. Yenɛ Sea la n boe la to la wan soŋɛ hɔ te ho tara a soŋa soŋa. 15Ho mi' te nɛresɛba woo n dole Yesu sore bɔna Asia teŋa daa bahɛ mam mɛ. Ge, Pigelus la Hermogenes lagom bahɛ mam mɛ. 16Ge Na'ayenɛ wan zɔ' ninbɔn'ɔn bo Onesiporus yiredoma. Se'ere n sɔe la, yɛla zo'e zo'e te a soŋɛ mam. Valom daa ka tare en la ban daa nyɔkɛ mam eŋɛ pakadeen la. 17Ge n daa kɔ'ɔn paɛ Arom teŋa poan na la, a daa pin'ilom mɛ ɛɛra mam wa nyɛ' mam. 18Na'ayenɛ wan bahɛ te Na'ayenɛ zɔ a ninbɔn'ɔn teŋa wa ba'ahegɔ daarɛ la. Ho me mi' soŋa soŋa n daa soŋɛ mam yɛla zo'e zo'e Epesus teŋa se'em.

will be added

X\