2 Tesaloniki 3

1Dene poan n sɔɔnrɔ wa, ba'ahegɔ poan, po'ohere ya bɔ'ɔra tɔ te Na'ayenɛ Yelesoma la kɔ'ɔn kelom yeregera paara bɔbɔre woo ge te nɛreba me pɛngera dɛ wo dene daa an se'em bo yamam me la. 2Kelom po'ohere ya bɔ'ɔra Na'ayenɛ te a da bahɛ te sɛba n tuluge zabera la en, la nɛresɛba n tone be'em ta'an eŋɛ tɔ sɛla. Se'ere n sɔe la, dagɛ nɛra woo n sakɛ bo Yelesoma la. 3Ge Na'ayenɛ n de birikina, ge wan bahɛ ya te ya sɛ' ze'ele soŋa soŋa te Sagona la da daan ya. 4Na'ayenɛ bahɛ tɔ te to sakɛ to sunya poan te la dela yelemɛŋɛrɛ te ya wan kelom kɔ'ɔn eta sɛla te to yɛta ya la. 5Na'ayenɛ wan bahɛ ya te ya mina Yenɛ nɔŋerɛ n an se'em ya suunre poan ge me ta'ana din'inha suunre wo Krista n daa din'inhe se'em la. 6Ge to sɔɔnrɔ, Na'ayenɛ Yesu Krista paŋa poan, to bo'ore ya nɔdena wa, te ya da dekɛ ya mɛhe lagom la sɔɔn sɛba n de zinyangarɛdoma ge me ka bɔta ba dɔla sɛla te to yele ba la. 7Ge yamam mɛhe mi' soŋa soŋa te la dela ya eta yelese'a te tomam daa eta la. To daa dagɛ zinyangarɛdoma ton daa boe la ya la. 8To daa ka dite nɛra dia ge ka yɔɔra. To daa ton eŋɛ se'em dela to daa tone mɛ ka gɔ'ɔra. Wontɛɛŋa la yu'uŋɔ zan'an, to kɔ'ɔn tona la bala te to da ta'an dekɛ to mɛŋa delom ya se'em. 9Ge ton daa ete wana wa daa dagɛ la to daa kan ta'an ne yele ne ya sɛla la sɛla te to bɔta. Ge, to daa ton eta bala te to dɛna la sɛba te ya wan beha tɔgɔha. 10Ton daa bo la ya la, to daa yele ya yeti, Nɛra se'em n ka bote a tooma a dagɛ ba bo en dia. 11Ge se'ere zuo n sɔe te to yɛta dena wa dela to wom te ya sɛba dela zinyangarɛdoma ka bɔta te ya tom tontonɛ. Ge, ya ton bɔta la ya tara nɛhe kɛn'ɛha nɛreba basɛba yɛla poan. 12Dene poan, Na'ayenɛ Yesu Krista paŋa poan, to yete nɛrebana wa la ninmɔ'ɔrɛ te ba behɛ ba zuto soŋa soŋa. Ba lebe ta bɔna baanlam ge tona diiha ba mɛhe. 13Ge la han dɛna la yamam n sɔɔnrɔ wa, da taregɛ ya ya etesoŋɔ te ya eta la. 14Ge daanse'ere nɛra se'em boe ya poan kan nana yetɔgom sebo te to golehɛ eŋɛ gɔŋɔ poan bo ya na wa. La han de'a bala, de ya sɛba n wan tara ya mɛhe soŋa soŋa la en ge da tare ya se'ere te ya eŋɛ la en. Te bala te valom wan nyɔkɛ en la n ete se'em la. 15Ge da eŋɛ ya en wo a dela ya diŋdaana la, ge ton kan'an ya en wo ya sɔɔn la. 16Na'ayenɛ mɛŋa se'em n bahere te nɛreba tara sunma'ahom la wan bahɛ ya te ya tara sunma'ahom daarɛ woo sɛla woo poan. Na'ayenɛ wan bɔna la ya zan'an. 17Mam mɛŋa nu'o n golehere wana wa, mam Paul mɛŋa n po'ohere ya na. Mam n ne ba'ahɛ n gɔŋɔ se'em n bala. 18To Na'ayenɛ Yesu Krista wan eŋɛ ya zan'an som.

will be added

X\