2 Tesaloniki 2

1Ge sɛla te n yeti n yele kalam wa dela to Na'ayenɛ Yesu Krista lebega daarɛ la na, la ton wan ta lagom la en se'em la yele. N sɔɔnrɔ, n sohore ya mɛ, 2te ya da bahɛ ya te yele dena wa ba daana ya ge te ya tara potɛn'ɛra ayi' ayi' tɛn'ɛha te Na'ayenɛ daarɛ la paɛ. Daanse'ere la dela nɛra se'em me n solone sɛla n wa wa'an pooren na bii se'em n me eere tɔgɔra bala. La kelom ta'an dɛna se'em n yele, te tomam golehɛ yele dena wa eŋɛ gɔŋɔ poan. 3Bala, da bahɛ ya te nɛra se'em pan'ahɛ ya la fiin me. Te Yesu kan lebe de daarɛ la na han dagana la nɛresɛba n tuluge zabera la Na'ayenɛ la n ta zabɛ ba'ahɛ ge te ba zuodaana se'em n de Be'emdaana te la pon dɛna te a nyɛ' namehegɔ la n me ta nɛɛ na. 4Be'emdaana wa wan dekɛ a mɛŋa te enŋa gane sɛla woo te nɛreba po'oha bɔ'ɔra ge dekɛ te la dɛna ba baga. A wan keŋɛ Yenɛ Yire la ta zin'an bini ge yeti enŋa n de Yenɛ. 5Ge ya tɛnre te mam n daa nan boe la ya la, n daa pon yɛta ya yele ana wa woo mɛ? 6Ge bala zan'an, yele deyena n boe gu'ura te yele dena wa kan eŋɛ nananawa. Ya me pon mina se'ere te de dɛna. De daarɛ mea han kɔ'ɔn paɛ, be'emdaana la wan nɛɛ na. 7Ge be'emdaana tooma la n daa ka nɛɛ yeŋa la nya pon kɔ'ɔn tona mɛ nananawa. Ge, sɛla n yete de eŋɛ la kan ta'an eŋɛ han dagana la Yenɛ n ta bahɛ se'emdaana n gu'ure de te de da ta'an eŋɛ la yehe bini. 8Bilam te be'emdaana la nya wan nɛɛ na. A han nɛɛ bala, Na'ayenɛ Yesu wan vo'ohe sabego a nɔɔrɛn ko' en. Ge a nɛɛhom la de daarɛ la me sagom en. 9Ge be'emdaana la yete a wa'an me na la Dima la paŋa poan. A wan eŋɛ yelekerehe tooma la yelenyalema n dagɛ yelemɛŋɛrɛ. 10A wan ton be'emtooma yema yema pan'ahɛ sɛba n ye'ehe sagom la poan. Ba ye'ehe sagom la poan la dela ba zagahɛ mɛ te ba kan nɔŋɛ yelese'a n de yelemɛŋɛrɛ wan ta'an fan' ba bahɛ la. 11Te dena me zuo te Yenɛ bahɛ te Sagona la paŋa tona la ba te ba ta'an sakɛ bo sɛla n de ponpɔrɔŋɔ. 12Dene de se'ere la dela sɛba woo n ka sakɛ bo yelemɛŋɛrɛ la ge ton bɔta la be'emtooma la wan nyɛ' namehegɔ. 13Ge la dela to po'oha Yenɛ daarɛ woo bɔ'ɔra yamam to sɔɔnrɔ sɛba te Na'ayenɛ nɔŋɛ wa. Te Yenɛ daa loe ya pin'ileŋɔ na te ya nyɛ' faanrɛ. La dela a Sea la n bahɛ ya te ya bɔna bɔ'ɔra enŋa Yenɛ ma'an la la ya sakerɛ yelemɛŋɛrɛ la poan, n wan bahɛ ya te ya nyɛ' faanrɛ la. 14Ge Yenɛ daa yi' ya dena wa poan, te yelesoma la te to mɔɔlɛ bo ya la poan, ya wan lagom nyɛ' pɛngɛsɛka te to Na'ayenɛ Yesu Krista nyɛta la. 15Bala, to sɔɔnrɔ wa, sɛ' ya ze'ele mɛ soŋa soŋa ge bahɛ ya te yetɔgɔse'a n de yelemɛŋɛrɛ te to daa pa'alɛ ya la bɔna ya suunre poan. To daa tɔgɛ yetɔgɔ'ana wa mɛ bo ya ge kelom golehɛ a eŋɛ gɔŋɔ poan bo ya pa'ahɛ. 16Yenɛ n de se'em to n nɔŋɛ tɔ ge te a som zuo te a bahɛ tɔ te to sɛ' ze'ele soŋa soŋa gura ton sakɛ bo sɛla to suunre poan la. To Na'ayenɛ Yesu Krista a mɛŋa la to Sɔ Yenɛ wan soŋɛ ya ge, 17bo ya paŋa te ya tona daarɛ woo ge yɛta sɛla n ane soŋa.

will be added

X\