2 Tesaloniki 1

1Mam Paul, la Silas, la Timoti n golehɛ gɔŋɔ wa. To golehɛ bɔ'ɔra la yamam lagaŋseko n de to Sɔ Yenɛ la Na'ayenɛ Yesu Krista nɛreba bɔna Tesalonika teŋa poan la. 2To Sɔ Yenɛ la Na'ayenɛ Yesu Krista wan eŋɛ ya som ge bo ya sunma'ahom. 3To sɔɔnrɔ, daarɛ woo to po'ohɛ Yenɛ la sɛla te a eŋɛ bo ya la zuo. La me de ma'an te to eŋɛ bala. Se'ere n sɔe la, ya kɔ'ɔn nam Yesu pa'ahɛ mɛ ge te yan tare nɔŋerɛ bɔ'ɔra taaba me malom gana bala. 4Bala n sɔe, te tomam mɛhe ŋmɛ'ɛra to nyɔn'ɔnrɔ la lagaŋseto n de Yenɛ nɛreba ya zuo. To ŋmɛ'ɛre bala la ban zɛrɛgɛ ya ge te ya nyɛta namehe seto ge zina ge kelom ŋmebera ge nam Yesu la zuo. 5Te dena wa n pa'alɛ soŋa soŋa te Yenɛ gankerɛ la dela ma'an. Yenɛ Sɔ'ɔlom la zuo te ya nyɛta namehegɔ la. Bala, yan ŋmibe la zuo te ya wan nara te ya bɔna bini. 6Ge Yenɛ wan eŋɛ sɛla n de ma'an. A wan namehɛ nɛresɛba n bahɛ te ya nyɛ' namehegɔ wa. 7A wan bahɛ te yamam sɛba n nyɛ' namehegɔ la la tomam me nyɛ' vo'ohogo. A wan eŋɛ dena wa la daanse'ere daarɛ te Na'ayenɛ Yesu wan ta nɛɛ saazuo ha sigera na la. A ta sigera me na la Na'ayenɛ soŋoreba sɛba n tare paŋa la, 8la bugum peelom. A han wa'an bala na, a wan namehɛ nɛresɛba n zagahɛ Yenɛ la la sɛba n ka nane yelesoma la yɛhera enŋa to Na'ayenɛ Yesu yɛla la. 9De daarɛ, ba wan nyɛ' namehe seko n ka tare ba'ahegɔ, ba kan bɔna Na'ayenɛ zen'en, ge me kan nyɛ' a paŋsɛka n tare pɛnka la. 10A han wa'an de daarɛ na, a wan to'e pɛnka la na'ahegɔ sɛba n sakɛ bo en zen'en. Yamam me wan lagom la nɛresɛba n pɛngere en ge na'aha en la poan. Se'ere n sɔe la, ya sakɛ bo yetɔgom la te to tɔgɛ bo ya la. 11Te la dena mea zuo n sɔe, te to po'oha bɔ'ɔra ya daarɛ woo la. To sohore to Sɔ Yenɛ te a bahɛ ya te ya bɔna enŋa n yi' ya na te ya bɔna se'em la. A paŋa poan, a wan bahɛ te ya tɛn'ɛha la sɛla n de yelesoma ge bahɛ te ya sakerɛ Yesu sore dɔlɔga la poan kɔ'ɔn bɔna bala soŋa soŋa. 12Etekona wa poan te ya wan ta'an bahɛ te to Na'ayenɛ Yesu nyɛ' pɛnka ge te enŋa me bahɛ te ya nyɛ' pɛnka. Dena wa wan eŋɛ yɛhera la to Yenɛ la Na'ayenɛ Yesu Krista som la poan.

will be added

X\