2 Samuel 9

1Te David soke yeti, Nɛra yee Saul yire wa te n eŋɛ en som Yonatan zuo? 2Yameŋa n daa boe Saul yire la poan, te ka yu'urɛ yi'ira Ziba, te ba tare ka wa'an David zen'an na, te naba soke en yeti, Hom n de Ziba la? Te a lebehe yeti, Naa, ho yameŋa mea n bala. 3Naba la soke en yeti, Se'em ka yee Saul yire la poan te n wan tom Yenɛ som wa bo? Te yameŋa wa lebehe naba la yeti, Yonatan dayɔa boe ha ge ka dela kɔɔrɔŋɔ. 4Naba la soke n yeti, A bɛɛ? Te Ziba lebehe yeti, A boe la Lo Debar teŋa poan, Amiel dayɔa Makir zen'an. 5Te Naba David tom te ba keŋɛ Lo Debar teŋa Amiel dayɔa Makir yire, ta tare bia la wa'an a zen'an na. 6Saul dayɔa Yonatan me dayɔa Mepiboset n paɛ na, a sure teŋa na'ahɛ David. Te David yi' en yeti, Mepiboset. Te a sakɛ yeti, Naa n daana. 7David lebehe en yeti, Da zɔta dabeem, n wan eŋɛ ho soŋa, ho sɔ Yonatan zuo. N wan dekɛ ho sɔyaaba Saul teŋa la zan'an lebehe bo ho, ge hom mɛŋa wan dita la mam n tebole zuo. 8Te Mepiboset sure na'ahɛ naba David, ge yele en yeti, Mam ho yameŋa wa me dela bene, mam ane wo baa kiiriŋa wa, te ho tara behera wana? 9Te naba yi Saul yameŋa Ziba na, yele en yeti, N dekere sɛla woo n de ho daana Saul la a yiredoma zan'an denɛ lebehe bɔ'ɔra la a yaaŋa Mepiboset wa. 10Hom la ho dayɔɔhe la ho yamehe n wan kɔɔra, te ho daana Saul yaaŋa wa nyɛta dia dita. Ho kpɛ'ɛma yaaŋa Mepiboset wa wan dita la mam saŋa woo. Ziba wa tare la dayɔɔhe pia la senuu la yamehe pihiyi'. 11Ziba yele naba yeti, Sɛla woo te hom n daana naba bo mam ho yameŋa wa nɔɔrɛ te n eŋɛ la, n wan doohe la bala. Bala Mepiboset dita la naba David wo a dela a dayɔa kayema la. 12Mepiboset tara a dayɔbila te ka yu'urɛ yi'ira Mika, te Ziba la a yiredoma la zan'an dɛna Mepiboset yamehe. 13Bala te Mepiboset yee kɛn'ɛra Yerusalem teŋai dita la naba David wo a dela a dayɔa kayema la, te a na'ma la zan'an kaarom.

will be added

X\