2 Samuel 6

1David le lagahɛ Israel boraa se'ehe te ba ganhɛ se la, boraahe tuha pihitan'. 2Te David la a nɛreba la zan'an n boe la en la keŋɛ Baala teŋa n boe Yuda teŋa poan, te ba tare Yenɛ nɔbiŋere daka la, yu'urɛ n de Pɛɛntɛɛnreba Na'ayenɛ se'em n de naba, zin'an kelompagehedoma la n yagɛ daka la zuo la teŋasoka. 3Te ba dekɛ ka Abinadab yire la n yage zoore zuo la sugule ka toroko paalega zuo ziira. Abinadab dayɔɔhe seyi', Uzah la Ahio, nya tara toroko la. 4Yenɛ nɔbiŋere daka ka la suga ka zuo la te Ahio bɔna nɛŋa. 5David la Israeldoma la woo wa'ara la ba paŋa zan'an, popeelom la yooma la duurenhe la konlɔ la yiihe la dɔ pegehe toyi' n tare ŋmɛ'ɛra limiha la senyagahe. 6Ba ta paɛ la Nakon dia tɔa zen'an, te lɔlehe la n ve'ere Yenɛ daka la toroko la eŋɛ te daka la bike, te Uzah tɛɛn a nu'o te'ele ka. 7Bilam bilam te Na'ayenɛ sunsunya taɛ bahɛ a zuo, te a ki bilam, la n kalom daka la. 8Te la daam David suunre la Na'ayenɛ la n eŋɛ suunre la Uzah se'em la, te a segɛ zen'kaŋa yu'urɛ te Perez Uzah. 9De daarɛ la, Na'ayenɛ la dabeem kɛn' David mɛ, te a yeti, Lan ane se'em mea wa, mam yeti n eŋɛ la wane, geha Na'ayenɛ la nɔbiŋere daka wa? 10Bala zuo te David ka sakɛ a tare Na'ayenɛ nɔbiŋere daka la keŋɛ teŋsɛka te a sege ka te David Teŋa la poan ta behera, ge ton tare ka keŋɛ Git teŋa boraa Obed Edom yire. 11Na'ayenɛ nɔbiŋere daka la boe boraa kana wa yire la ŋmarehe setan' te Na'ayenɛ la kan' som me bahɛ Obed Edom wa la a yire zan'an zuo. 12Te la ta lu naba David tobai te Na'ayenɛ la kan' la som bahɛ Obed Edom la a sɛla woo poan, la Yenɛ nɔbiŋere daka la n boe a zen'an la zuo. Te David keŋɛ ta tare Yenɛ nɔbiŋere daka wa Obed Edom yire wa'an David Teŋa la poan na la nyeema. 13Sɛba n ziire Na'ayenɛ nɔbiŋere daka la, n zegehɛ na'ma ayoobe la, David kaanbɛ la lɔlega la nagabila. 14David yɛ fugiriga te a wa'ara la paŋa pegera Na'ayenɛ la. 15Enŋa la Israel nɛreba la woo voole la bala ge pɛɛbera tentana tare Na'ayenɛ nɔbiŋere daka la wa'ana. 16Na'ayenɛ nɔbiŋere daka la n ta kɛn'ɛra teŋa la poan na la, te David pɔga Mikal se'em n de Saul pɔyɔa la, veehe takole poan behɛ yeŋa na. En nyɛ te Naba David ɛngere la wa'a kaara Na'ayenɛ la nɛŋan, te a sea yehe la en a suunre poan ha. 17Ba tare Na'ayenɛ nɔbiŋere daka la kɛn' na tare ka ta kɛn'ɛhɛ sogorɛ te David tin' bo ka la poan, te David kaanbɛ nyɔ'an bo'olom la popeelom bo'olom la Na'ayenɛ la nɛŋan. 18En ta kaanbɛ nyɔ'an bo'olom la popeelom bo'olom la ba'ahɛ la, a dekɛ la Pɛɛntɛɛnreba Na'ayenɛ la yu'urɛ kan' som bahɛ nɛreba la zuo, 19ge tɔnrɛ dia, boroboro la tiihe wɔla n ku'e wama ayi', bo Israel nɛre bɔbɔgɔ la zan'an, pɔgɔhe la boraahe zan'an, nɛra woo man'aherɛ man'aherɛ. Te nɛra woo nya lebe kule. 20David n lɛbera kula te a ta kan' som bahɛ a mɛŋa yire nɛreba zuo, te a pɔga Mikal n de Saul pɔyɔa la to'ohɛ en yeti, Israel naba wa zina na'ahɛ a mɛŋa mɛ, pilige a mɛŋa beele tara pa'ala pɔgɔsa'ara wo a dela nɛra yoo la. 21David lebehe yele en yeti, Mam wa'are ne bɔ'ɔra la Na'ayenɛ se'em n loe mam tee ze'ele ho sɔ la a yire zan'an na'arɛ, te n dɛna naba behera a nɛreba Israeldoma la. Na'ayenɛ enŋa te mam wa'are ne bɔ'ɔra. 22N wan bahɛ n mea beele gaŋɛ bala, n wan pɔ'ɛ n mɛŋa malom gaŋɛ bala, ge dɛna nɛre zure pɔgɔsa'ara se'a te ho yɛta wa nɛŋan. 23Te Saul pɔyɔa Mikal wa ka tara kɔma tara tara te a ta ki.

will be added

X\