2 Samuel 5

1Te Israel yizuto la zan'an tigihe ba mɛhe David nɛŋan, n boe Hebron teŋa poan, ge yeti, Baŋɛ te to dela sɔɔnrɔ. 2Naba Saul na'am saŋa la poan zan'an hon n daa de te pɛɛntɛɛnra nɛŋadaana te Na'ayenɛ daa yele ho yeti, Ho wan ta dɛna mam nɛreba wa duŋkeema la ba naba. 3Israel keendoma n zan'an lagahɛ David zen'an Hebron teŋa poan, te David biŋe nɔɔrɛ la ba, Na'ayenɛ nɛŋan, ge te ba sɔ' David la kaam te a dɛna naba behera Israel. 4David dela yuum pihitan' ge di dɛna Israel zan'an naba tara tara la yuum pihinaahe. 5A kɛn' Hebron dɛna Yuda teŋa naba la yuuma ayopɔe la ŋmarehe seyoobe, ge nya keŋɛ ta kɛn' Yerusalem nya dɛna Israel la Yuda teŋhe zan'an naba yuuma pihitan' la atan'. 6Te naba David ihege la a pɛɛntɛɛnreba ta zabɛ la Yebusdoma la n sɔe Yerusalem teŋa la. Ba pon yele David yeti, Ho pon kan nyɛ fole kɛn' ka'lam na la. Fɔa bii wɔbega ma'an wan sa'ɛ ho bahɛ la. Ba tɛn'ɛha te David kan nyaŋɛ kɛn' ba teŋa la poan na la. 7Ge te David zagahɛ ge nyaŋɛ kɛn' to'e ba sokazen'en la n boe Zion Zoore la zuo te ba nya yi'ira ka David Teŋa. 8De daarɛ la David yeti, Hom se'emdaana n nyaŋɛ Yebusdoma wa, a daana doohe ko'om la nɔgbɛma ko wɔbehe la fɔɔhe la nɛresɛba te David yaɛ la. Bala zuo te la tɔgɛ gan'an te fɔɔhe la wɔbehe da kɛn'ɛra naba yire la poan na la. 9David nya pɔhɛ kɛn'ɛra la sokazen'en la, te a zabɛ to'e la, segɛ ka yu'urɛ te David Teŋa. A nya mɛ' kura zom kae ka mum. 10David yu'urɛ malom pa'aha. Se'ere n sɔe la Na'ayenɛ Pɛɛntɛɛnreba Yenɛ la n boe la en. 11Te Tire naba Hiram ton nɛreba David zen'an na la mɔlɔsonɔ tiihe la kpa'areba la kugumɛteba te ba mɛ naba yire bo en. 12Bala te David baŋɛ te Na'ayenɛ loe en te a dɛna Israel nakantɛ ge behera a sɔ'ɔlom soŋa a nɛreba la zuo. 13David n ze'ele Hebron teŋa wa'an Yerusalem teŋai na la, te David biŋe pɔgɔbɔ'ɔrenhe, ge di pɔgɔba zo'e zo'e pa'ahɛ, dɔgɛ dayɔɔhe la pɔyɔɔhe zo'e zo'e pa'ahɛ. 14Kɔmsɛba te a dɔgɛ Yerusalem poan pa'ahɛ la dela Samua la Sobab la Natan la Solomon la 15Ibhar la Elisua la Nepeg la Yapia la 16Elisama la Eliada la Elipelet. 17Pilistidoma la n ta wom te David n de Israel zan'an naba la, te ba ihege ɛɛra en. Ge David me baŋɛ keŋɛ a teŋa la zen'sɛka n de paŋa zen'an la ta bɔna bilam. 18Pilistidoma wa keŋɛ ta tiihom ba mɛŋa la Arepaim Bɔn'ɔn la poan. 19David soke Na'ayenɛ yeti, N zabɛ la ba yoi? Ho wan soŋɛ mam? Te Na'ayenɛ lebehe en yeti, Keŋɛ paɛ ba ge ho wan nyaŋɛ. 20Te David to'ohɛ ba Baal Perazim teŋa poan nyaŋɛ ba bilam. A yeti, Na'ayenɛ tanhɛ la mam poan na yue n diŋdoma wo ko'om n tanhɛ uura se'em na la. Bala te ba' yi'ira zen'an la Baal Perazim. 21Pilistidoma wa zɔ ge bahɛ ba baga la bilam, te David la a nɛreba la va ba keŋɛ. 22Pooren te Pilistidoma wa le wa'ana tiihom Arepaim Bɔn'ɔn la poan. 23David le soke Na'ayenɛ te Na'ayenɛ yeti, Da doohe ya ba poore, kae ya ba mum la ya pɔhɛ tuntuuro la n boe zen'an la. 24Ya han ta wom kinkima tuntuuro la zuto, ya paɛ zabɛ la ba. Se'ere n sɔe la mam Na'ayenɛ keŋɛ tole nɛŋa ta nyaŋɛ Pilistidoma la bo' ya. 25Te David eŋɛ wo Na'ayenɛ la n bo en a nɔɔrɛ se'em la nyaŋɛ Pilistidoma wa, ze'ele Gibeon teŋa ko ba bala ta paɛ Gezer teŋa.

will be added

X\