2 Samuel 4

1Saul dayɔa Is Boset n ta wom te Abner ki la Hebron teŋai la, te a giinla kɔ'ɔhɛ, te Israel nɛreba zan'an suunre sagom. 2Ge Saul dayɔa wa tare la kpɛ'ɛndoma bayi' n de zaba nɛŋadoma. Ayema yu'urɛ dela Baana, te ayema la me yu'urɛ dɛna Arekab. Ba sɔ dela Arimon Benyamin yizuo nɛra, te a yehe Beerot teŋa poan na. Beerot wa dela Benyamin teŋa kayema. 3Se'ere n sɔe, Beerot teŋa nɛreba wa, zɔ mɛ loŋe Gitaim teŋa, ta sogɛ bilam la zina. 4Saul dayɔa Yonatan me tare la dayɔa te ka dɛna kɔɔrɔŋɔ te ka yu'urɛ dɛna Mepiboset. Ka wa dɛna la yuuma anuu, ge te ba ze'ele Yezreel pɛɛnbɔn'ɔn poan wa'ana mɔɔlɛ Saul la a dayɔa Yonatan kum yele. Te pɔgɔsɛka n behere en la, ihege la en te a zɔ ge gbe'era la dabeem, te bia la fan' lu teŋa te ka na'ma yare kaarom. 5Te Beerot boraa Arimon wa dayɔɔhe Arekab la Baana ihege wontɛɛŋsegeleka keŋɛ Is Boset yire, te naba wa zin' faaha la wontɛɛŋa sabebehom wo lan pon dɛna se'em la. 6Ba kɛn' yire la poan na wo ba wa'ana te ba to'e la dia la, kɔ'ɔn paɛ naba la zen'an lu a puurɛ la so'a ko ge le'ehɛ yehe te nɛnɛra ka nyɛ ba. 7Ban kɛn' na la te naba la gan' la a gɔrɔgɔ zuo vɔ'ɔha, te ban ko en fike a zuo, te ba nya tare a zuo la doohe Arabah sore la poan yu'uŋkoŋɔ mea poan lebe kule. 8Ba tare zuo la wa'ana bo David, Hebron teŋai, ge yeti, Naa, naba, ho dima Saul dayɔa Is Boset se'em n kɔ'ɔn ɛɛra ho vom la zuo n wana. Naa, Na'ayenɛ la mɛŋa n lerege Saul la a kɔma bo ho wa. 9Te David lebehe Beerot Arimon dayɔɔhe Arekab la Baana yeti, N pɔ' Na'ayenɛ wa n sure beha wa, se'em n faanre mam vom mam diŋdoma nu'uhen daarɛ woo baha wa, 10se'em n daa wa'ana yele mam te Saul ki ya, ge daa tɛn'ɛhe te a yeti mam la yelesonɛ la, mam daa nyɔkɛ en mɛ Ziklag teŋa poan kɔrɔgɛ. A yɔɔrɛ n daa bala te n yɔ en, en tare sɔɔleŋa sɛka wa'ana la zuo! 11La nya wan ana la wane, potɔpa han ko nɛre tontɔɔ a mɛŋa yire poan, a gɔrɔgɔ zuo! N ka tare sore te n dekɛ nɛra la taala yɔ ya, la n ko ya yehe teŋa wa poan? 12Te David bo pɛɛntɛɛnreba la nɔɔrɛ te ba ko ba, ku'uhɛ ba nu'uhen la na'ma, ge degehɛ ba iŋhe la yule lɛm bulega n boe Hebron teŋa poan. Ge dekɛ Is Boset zuo na pin' Abner yɔɔen n boe Hebron teŋa poan la.

will be added

X\