2 Samuel 3

1Zaberɛ la n sige Saul nɛreba la David nɛreba teŋasoka, yuura te David paŋa malom pa'ahera ge Saul paŋa ton sigera teŋa. 2David bɔna Hebron teŋa poan wi'ira. Dayɔse'ehe te a dɔgɛ bini dela Amnon, se'em ma n de Ahinoam ze'ele Yezreel teŋa na la. 3Sɛka n tagalɛ dela Kileab se'em ma n de Abigail Karmel boraa Nabal n ki ge bahɛ pɔgɔsɛka la, tagela Absalom se'em ma n de Maaka Gesur naba Talmai pɔyɔa la. 4Naahe daana dela Adoniya se'em ma n de Hagit, tagela Sepatia se'em ma n de Abital la, 5tagela Itream se'em ma n de Egla la. David dɔgɛ dayɔsena wa woo la Hebron teŋai. 6Saul nɛreba la David nɛreba n boe zaberɛ la poan se'em ma'an la, te Abner bɔna Saul yire kpɛmeha a mɛŋa. 7Te Saul tara a pɔgɔbɔ'ɔreŋa te yu'urɛ dɛna Arizpa, te ka sɔ yu'urɛ dɛna Aiah ge daarɛ deyema te Saul dayɔa Is Boset yele Abner yeti, La eŋɛ la wane te hom ta'an ta nɛ mam sɔ pɔgɔbɔ'ɔreŋa wa soŋɔ poan? 8Is Boset sokere wa nyie Abner suunre mɛ, te a soke yeti, Mam nya dela bonyoo Yuda teŋa wa poan? Mam pɔhɛ na mam na'ahere ho sɔ Saul yire wa nɛreba la a sɔɔnrɔ la a zɔdoma la bala tara tara la zina, ka sakɛ n dekɛ ho eŋɛ David nu'uhen. Ge zina wa ho nyɛ mam taalɛ mɛ dooha pɔka wa poan! 9Yenɛ wan eŋɛ Abner n yeti a eŋɛ en se'em la, a eŋɛ gaŋɛ bala. Na'ayenɛ la n pɔ' te a wan eŋɛ se'em bo David la, n wan tom dɛ bo en. 10Saul yire na'am la wan yehe, ge te David na'am la sɔe sɔna Israel la Yuda zan'an, ze'ele Dan teŋa ta paɛ Beerseba teŋa. 11Is Boset sina kan ta'an lebehe se'ere. Se'ere n sɔe la, a ba' zɔta Abner mɛ. 12Abner nya tom nɛreba David zen'an, Ane n ton sɔna teŋa la? Biŋɛ nɔɔrɛ la mam, te n pa' ho poore soŋɛ hɔ te Israel zan'an zan'an kɛn' ho nu'uhen. 13David lebehe yeti, La ane soŋa, n wan biŋe nɔɔrɛ la hɔ, ge yelese'ere te n bɔta te ho eŋɛ dela, ho han ka tare Saul pɔyɔa Mikal la wa'ana, da malom bahɛ te mam niho nyɛ hɔ. 14David nya tom a nɛreba Saul dayɔa Is Boset zen'an te ba ta yele en yeti, Bo' mam n pɔga la te n daa tare Pilistidoma yo'gɔnɔ kɔbega, yɔ ge yeti n di ka la na. 15Bala te Is Boset bahɛ te ba keŋɛ ta to'e ka ka sera Paltiel, Lais dayɔa la zen'an. 16Ge pɔka la sera Paltiel dɔla ka poore ge kɛla bala tara tara la Bahurim teŋai. Te Abner ta ŋmɛregɛ yele en yeti, Lebe kule! Te a yare ŋmɛregɛ lebe kule. 17Abner tom sɔɔleŋa bo Israel keendoma la yeti, Yan bote David dɛna ya naba dagɛ zina. 18La nya paɛ ya! Se'ere n sɔe la, Na'ayenɛ daa biŋe a nɔɔrɛ bo David ti, mam wan doohe la n tontona David wa poan fan' n nɛreba Israeldoma wa Pilistidoma wa la sɛba woo n de ba diŋdoma la nu'uhen bahɛ. 19Abner tɔgɛ bo Benyamin doma la me ge nya keŋɛ Hebron teŋa te a ta yele David sɛla woo te Israel la Benyamin nɛreba la n sakɛ te ba eŋɛ se'em. 20Abner n doohe mɛ la boraahe pihiyi' wa'an David zen'an Hebron teŋa poan na, te David eŋɛ de'eŋɔ bo Abner la a borase'ehe n doohe en na la. 21Abner nya yele David yeti, N wan lebe la n ta maahom Israel nɛreba la woo bo hom n daana wa, te ba biŋe nɔɔrɛ la hɔ te ho dɛna ba naba, nya sɔna ho suunre n daa bote sɛla la beha. Te David bo Abner la sore te a lebe la sunma'ahom. 22La eŋɛ fiin wa, te David nɛreba la Yoab paana tara ban zabɛ nyaŋɛ ge fan' lɔgɔseto la zo'e zo'e wa'ana. Ge Abner ka boe bine la David. Se'ere n sɔe la David bahɛ en mɛ te a keŋɛ la sunma'ahom. 23Yoab la a boraahe la n paɛ na la, ba yele en te Abner wa'an naba David zen'an ge lebe. 24Bala te Yoab keŋɛ naba zen'an ta yele en yeti, Ho eŋɛ la bene wa? Abner wa'an ho zen'an na te ho bahɛ en te a keŋɛ bo? 25Hom ka mi' te Ner dayɔa Abner wa wa'ana pa'ahɛ ho mɛ te a baŋɛ ho kenɛ la ho lɛbega na n ane se'em, ge la a baŋɛ ho sɛla woo n eta se'em? 26Yoab n bahɛ David zen'an, yehena tom la a nɛreba te ba dige Abner. Te ba dige ta nyɔkɛ en Sira bulega la zen'an lebena, ge te David me ka mina te bala ete. 27Abner n lebe Hebron poan na la, te Yoab tare en lebe yehe teŋa la nayaŋa sɛka n dole yɛha la yeŋa ha, te a bote a tɔgɛ mɛ la a ma'an. Bilam te a ta lo' Abner puurɛ la so'a, Abner ki la n ko Yoab sɔɔn Asahel la zuo. 28Pooren te David ta wom yele la nya yeti, Mam la n sɔ'ɔlom wa zan'an tare la taalɛ la Ner dayɔa Abner kum wa! 29Taala la dɔla Yoab la a yiredoma zan'an te a yizuo la poan da go'ɛ kondɛgerɛ bii konkone bii se'em n tare doore du'uha bii ka ki so'a kum bii ka vibe la kom. 30Yoab la a sɔɔn Abisai n ko' Abner se'em n bala te a ko ba sɔɔn Asahel zaberɛ poan Gibeon teŋa poan. 31David nya yele Yoab la boraahe la woo n boe la en la yeti, Aanhom ya futo ge yɛ sunsagaŋɔ futo la ya kele Abner wa. Te naba David mea keŋɛ lɛm kum daka la. 32Ba pin' Abner Hebron teŋa poan, te naba David kaahɛ yɔɔ la poan voole. Te nɛra woo lagom taɛ la kaahega. 33Naba David kele fabelɛ sɔkera yeti, Abner wa sone te a ki wana yɛɛ wo gerego? 34Ba ka lo' ho nu'uhe bii ho na'ma wo nɛra ne lu a dima nu'uhen te a lo' en se'em la. Te nɛreba la zan'an le taɛ kaahega a zuo. 35Te nɛreba la wa'ana belom David wontɛɛŋa la te a di dia, te a yele ba yeti, Mam han dekɛ sɛla eŋɛ n nɔɔrɛn ge te wontɛɛŋa wa lu, Yenɛ eŋɛ mam me wana. 36Nɛra woo behɛ yele la te de pee ba suunre, ge naba la n ete sɛla woo te la pɛɛra ba suunre se'em la. 37Bala, te nɛra woo la Israel nɛreba la woo sakɛ te naba la nu'o ka boe Ner dayɔa Abner kum la poan. 38Naba la nya soke a nɛreba la yeti, Ya ka mi' te nabia n de nɛrekantɛ bahɛ Israel teŋa wa zina daarɛ wa? 39Zina dabaherɛ wa, mam dela taroma la n na'am wa zan'an, Zeruiah kɔma wa ba' tara la sunkanberɛ gaŋɛ mam. Na'ayenɛ la lebehe yɔ se'em puurɛ n yon'ɛn te a tona be'em sebo la woo.

will be added

X\