2 Samuel 24

1Na'ayenɛ sunsunya le nyie la Israeldoma te a dekɛ David sa'ahɛ la ba. A yele David yeti, Doohe kaanlɛ Israel la Yuda nɛreba wa. 2Naba la yele Yoab, se'em n de a pɛɛntɛɛnreba nɛŋadaana, la yeti, Doohe yehe ya Israel wa poan zan'an, Dan teŋa wa'ana yehe Beerseba teŋa, la ya kaanlɛ pɛɛntɛɛnreba wa zan'an, te n baŋɛ ba kanlɛ. 3Ge Yoab yele naba yeti, Na'ayenɛ ho Yenɛ la wan malom pa'ahɛ ho pɛɛntɛɛnreba kɔbehe kɔbehe, te ho nini nyɛ. Ge bene zuo te hom n daana wa bɔta te ho tom toondena wa? 4Ge naba kɔ'ɔn zɛ'a la enŋa n yele se'em la, te Yoab la zaba nɛŋadoma la ze'ele naba David zen'an yehe keŋɛ ta doohe kaanlɛ Israel pɛɛntɛɛnreba la zan'an. 5Ban yakɛ Yordan Kolaa la mɛ, te ba kɛn' Aroer teŋa poan kolaa gɔbega nu'o bɔba. Ta nya tɔɔra Gad tɔla Yazer teŋa ha. 6Ba ze'ele bilam tole Gilead keŋɛ Tatim Hodsi teŋa la Dan Yaan teŋa wa'ana paɛ Sidon teŋa poan. 7Tire teŋse'ehe n kanregɛ la poan la Hivdoma la Kanaandoma teŋhe la woo poan. Ge ba me keŋɛ Negev n boe Yuda, Beerseba poan la. 8Ba dekɛ la ŋmarehe sewae' la dabeha pihiyi' n kae teŋa la ba'ahɛ ge lebe Yerusalem poan na. 9Yoab nya tare pɛɛntɛɛnreba la kanlɛ la ta bo naba la. Israel poan, ba nyɛ la boraahe tuha kɔbehe senii n wan ta'an keŋɛ pɛɛnbɔn'ɔn la poan, te Yuda teŋa poan me tara boraahe n ane bala mea tuha kɔbehe senuu. 10Pooren te la ɛnkɛ David paleŋa, te a nya baŋɛ te n kaanlɛ pɛɛntɛɛnreba la, a tom la be'em. Te David po'ohɛ Na'ayenɛ yeti, Mam tom la be'em kantɛ la mam n tom se'em la. Nananawa, Na'ayenɛ, mam po'ohe la hom, te ho dekɛ n taala wa beŋe mam. Se'ere n sɔe la, mam tom la gɔɔnɛ. 11David n ta ihege bolika, te Na'ayenɛ tɔgɛ bo a nɔtɔgɔha Gad se'em n behere bɔ'ɔra David la yeti, 12Keŋɛ ta yele David ti Na'ayenɛ yeti, n bo ho la yɛla atan'. Loe deyema, te n denɛ eŋɛ ho. 13Te Gad wa'an David zen'an na yele en yeti, Ho bote la yuuma atan' kom sige ho teŋa wa zuo na bii, ho diŋdoma dige ho ŋmarehe setan' bii, dabeha atan' too lu ho teŋa wa poan na? Yɛla la n bala, tɛn'ɛhɛ soŋa, la ho loe hom bote n lebe ta yele se'em n tom mam na la se'em. 14David lebehe Gad yeti, Sunsagaŋɔ ma'an n nyɔkɛ mam, n ka mi' mam wan loe sɛla, Bahɛ te to lɛ Na'ayenɛ mɛŋa nu'uhen. Se'ere n sɔe la, enŋa ninbɔn'zɔrɛ zo'e ya. Ge da bahɛ te n lu nɛresaala nu'uhen. 15Bala te Na'ayenɛ tom too bahɛ Israel teŋa zuo na bolika kaŋa, tara tara la saŋsɛka te a pa'alɛ la. Te Israel teŋa poan zan'an, ze'ele Dan ta paɛ Beerseba, nɛreba tuha pihiyopɔe n ki. 16Yenɛ soŋora la n ta tɛɛn a nu'o tɔ Yerusalem teŋa te a sagom ka la, te Na'ayenɛ le tee a potɛn'ɛrɛ la nɛreba la, ge yele Yenɛ soŋora la n tare ne sagaŋɔ la yɛ'a teŋa la nɛreba la zuo na la yeti, La seke ya! Bahɛ ho nu'o la. Bala ma'an la te Yenɛ soŋora la boe la Yebus boraa Arauna la dia tɔa zen'an la poan. 17David n nyɛ Yenɛ soŋora se'em n sagone nɛreba la, te a yele Na'ayenɛ yeti, Mam n tom be'em, mam ma'an n tom be'em, ge piihe wa me tom la dene? Mam sonhere ho mɛ te ho bahɛ te ho kpa'aherɛ la paga mam la n sɔ yire wa ma'an zuo. 18Daanden daarɛ mea te Gad wa'an David zen'an na, yele en yeti, Keŋɛ Yebus boraa Arauna dia tɔa zen'an la poan ta maalɛ kaanbegɔ zen'an bilam bo Na'ayenɛ. 19Te David doohe Gad nɔɔrɛ la keŋɛ wo Na'ayenɛ n bo en a nɔɔrɛ la se'em la. 20Arauna n bɔna ha ge behɛ na, te naba la a yamehe kene tɔɔra en na, te Arauna yehe zɔ to'ohɛ ba ha, ta pɔnra ba lu teŋa na'ahɛ naba la. 21A nya soke yeti, Naa naba, ho wa'an ho yameŋa wa zen'an na bo? Te David lebehe en yeti, N wa'ana te n da' la ho dia tɔa zen'an wa, mɛ kaanbegɔ zen'an bo Na'ayenɛ, te a pakɛ too wa nɛreba wa zuo. 22Arauna lebehe David yeti, N daana naba, dekɛ la ho kaanbɛ hom n bote sɛla de zuo. Lɔlehe la n wana, dekɛ kaanbɛ nyɔ'an bo'olom la. Tanduuhe la yɔgɔhe la n wana, te bama dɛna dɔɔrɔ. 23Naba, mam Arauna dekɛ lɔgɔtona wa zan'an bo ho mɛ. Na'ayenɛ zɔ ho ninbɔn'ɔn ge lebehe ho soŋa. 24Ge naba yele Arauna yeti, Aai, mam wan yɔ hɔ ge to'e. Mam kan dekɛ zaŋa bonɔ kaanbɛ bo Na'ayenɛ mam Yenɛ la. Bala te David yɔ dia tɔa zen'an la lɔlehe la sanlenpeelega kpila pihinuu. 25David mɛ kaanbegɔ zen'an bilam bo Na'ayenɛ, nya kaanbɛ nyɔ'an bo'olom la sunma'ahom bo'olom. Te Na'ayenɛ kelehe n fabele la ge pakɛ too la Israel zuo.

will be added

X\