2 Samuel 21

1Naba David saŋa la poan, kom n wa sige teŋa la poan yuuma atan'. Te David mɔɛn nini soke Na'ayenɛ kom la yele. Na'ayenɛ lebehe en yeti, Ziim ka'ahegɔ n boe Saul yire la zuo. Se'ere n sɔe la a kɔrom Gibeondoma la. 2Bala te naba David yi Gibeondoma wa na, tɔgɛ la ba. Gibeondoma wa dagɛ sɔɔn la Israeldoma la, ge ba dela Amoridoma la te ba yuun ko ge gee basɛba fiin wa la n bala. Israel nɛreba yuun pɔ mɛ te ba kan ko basɛba fiin wa n gee la, ge Saul n wa'ana bɔta te a tom te la pee Israel la Yudadoma la suunre la te a doohe teŋa la poan zan'an te a piihe Gibeondoma wa zan'an bahɛ. 3David soke Gibeondoma wa yeti, Ya bote n eŋɛ ya la som bone taaba? Bene te n wan dekɛ lu ya te ya kan'somɔ bahɛ Na'ayenɛ sɔ'ɔlom wa zuo? 4Ba lebehe yele en yeti, La dagɛ sanlema la ligiri n wan maalɛ tomam la Saul bii tomam la a yiredoma wa yele, bii to bɔta te ba ko' nɛra Israel teŋa wa poan tomam zuo. Te David soke ba yeti, Yamam bote n eŋɛ la bene bo ya? 5Ba lebehe yele naba la yeti, Boraa sɛka n daa zegere te ka piihe tomam zan'an ba'ahɛ, te to yu'urɛ saalom Israel sɔ'ɔlom wa poan la, 6dekɛ ka dayɔɔhe seyopɔe bo to na, te to tare se ta yule Na'ayenɛ nɛŋan Gibeon n de Saul se'em te Na'ayenɛ loe teŋa poan. Te naba David yeti, Ɛɛn, n wan dekɛ ba bo ya. 7Ge naba la daa ka dekɛ Mepiboset, se'em n de Saul dayɔa Yonatan dayɔa la bo ba. Se'ere n sɔe la, Na'ayenɛ yu'urɛ te David la Saul dayɔa Yonatan wa tabelɛ ze'ele biŋe nɔɔrɛ la taaba. 8Ge naba nyɔkɛ Amoni la Mepiboset n daa dela Aiah pɔyɔa Arizpa dayɔɔhe seyi' la te a dɔgɛ la Saul la bodibinto seto tonuu la te Saul mɛŋa pɔyɔa Mikal la n ele Barzilai dayɔa Adriel la n ze'ele Mehola teŋa na la te ba dɔgɛ. 9A dekɛ ba bo la Gibeon buuri wa, te tare ba ta lo' yule zoore la zuo Na'ayenɛ nɛŋan. Bodibinto toyopɔe wa lagom ki la daanyenɛ. Ba ki la daanse'ere daarɛ te ba pɔhɛ te ba kɛ' mui la. 10Aiah pɔyɔa Arizpa dekɛ sunsagaŋɔ futo ta yeregɛ taŋa n lɛm ban yule kɔma la zen'an la. A bɔna bilam digera ziiro seto n wan wa'an wontɛɛŋa na di a kɔma la te yu'uŋɔ. Te a kelom bɔna bini degera mɔen dunhe se'ehe n wan wa'ana obe a dayɔɔhe la iŋgana la. A boe la bilam tara tara te sigisaa ta ni. 11David n ta wom Aiah pɔyɔa Arizpa n de Saul pɔgɔbɔ'ɔreŋa wa n eŋɛ se'em la, 12a keŋɛ mɛ ta guruge Saul la a dayɔa Yonatan konba Yabes Gileaddoma teŋa tare na. Se'em ma'an te Pilistidoma la yuun ko Saul la a dayɔa Gilboa pɛɛnbɔn'ɔn la poan lo' ba yule Bet San teŋa yeŋa ha la, Yabes Gileaddoma wa n yuun keŋɛ ta zun' kum wa yagehɛ tare keŋɛ ba teŋa la ta pin' ba teŋa la poan. 13David keŋɛ la bilam ha ta tare Saul la Yonatan konba wa'ana, vaɛ a dayɔɔhe se'ehe te ba lo ba yule la me konba na. 14Te ba nya pin' Saul la a dayɔa Yonatan konba Zela teŋa n boe Benyamin teŋa poan, Saul sɔ Kis yɔɔ la poan. Baa eŋɛ sɛla woo te naba bo nɔɔrɛ te ba eŋɛ la zan'an. Te Na'ayenɛ nya zɔ ba ninbɔn'ɔn ge bo teŋa la dia. 15Te zaberɛ deyema le ta sige Pilistidoma la Israeldoma teŋasoka. David la a pɛɛntɛɛnreba la keŋɛ pɛɛntɛɛnrɛ la poan. Te ba bɔna zaberɛ la poan zabera la Pilistidoma la, tara tara te David ta taregɛ zaberɛ la poan. 16Arapa yaaŋa ayema Isbi Benob, te a kanɛ ma'an ma'an tebehom wan koohe nyɔgom kpila kɔbehe setan' te a me yɛ zaba lɔgɔpaala, yeti enŋa wan ko naba David. 17Ge Zeruiah dayɔa Abisai n daa wa'ana faan naba David bahɛ, la en ko Pilistia boraa wa. Te David pɛɛntɛɛnreba la ze'ele naba David nɛŋan pɔ' te, ho kan le doohe to keŋɛ zabere. Ho da bahɛ te Israeldoma nɛɛhom wa ta kiŋe. 18Te bilam tole, te zaberɛ deyema le lu Israel la Pilistidoma teŋasoka Gob pɛɛnbɔn'ɔn la poan, te Sibekai la n de Husai boraa la ko Sap n de Arapa yaaŋa la. 19Te zaberɛ deyema le lu Israel la Pilistidoma wa teŋasoka, Gob pɛɛnbɔn'ɔn la poan, te Yaare Oregim dayɔa Elhanan la n de Betlehem nɛra la ko Goliat se'em n de Gat nɛra te a kanɛ zuo kurugo la tebegɛ wo kuta zaarɛ la. 20Te zaberɛ le ma'an sige Gat teŋa me poan, te Arapa yaaŋa nɛra wagelɛ ayema n daa tare nu'dibilihe pia la seyi' la na'dibilihe pia la seyi'. 21En daa ta zɛɛna Israel, te David sɔɔn Simea dayɔa Yonatan ko' en. 22Arapa yaahe banaahe wa n daa boe Gat teŋa poan la, te David la a nɛreba la n ko ba zan'an.

will be added

X\