2 Samuel 20

1Nɛreyaalega ayema bɔna bini te a yu'urɛ yi'ira Sheba, te a sɔ yu'urɛ yi'ira Bikri, dɛna Benyamin nɛra. Sheba kɔ'ɔn peebe a tentanɛ, ge kaahɛ yeti, Tomam ka tare tɔntɛ David poan, te ka tare tɔntɛ Yesse dayɔa wa poan. Israeldoma, nɛra woo lebe a sogorɛ deo poan. 2Te Israeldoma la woo bahɛ David, ge doohe Bikri dayɔa Sheba wa poore, ge te Yudadoma la dɔla ba naba David poore, ze'ele Yordan Kolaa, tara tara la Yerusalem. 3Naba David n wa'ana paɛ a yire Yerusalem poan, a dekɛ a pɔgɔbɔ'ɔrenhe pia la te a daa bahɛ ba te ba leen beha yire la, tee loŋe yire te a nɛreba gura ba. David behera ba, ge a ka le nɛɛra ba soŋɔ poan. Ba daa boe la yire denɛ poan wo pɔkɔnpa la, ta ki. 4Naba nya la ta yele Amasa yeti, Yi' Yuda teŋa boraahe la woo lagahɛ n zen'an na dabeha atan' wa poan, ge lagom bɔna ho mea bini. 5Ge Amasa n doohe lagahɛ Yuda teŋa boraahe la, te dabahese'a te naba la pa'alɛ en la ta tole. 6David yele Abisai yeti, Bikri dayɔa Sheba wan pɔgɔlom tɔ gana Absalom n daa pɔgɔlom to se'em la. Bala, dekɛ mam pɛɛntɛɛnreba wa dige en. Han dagana bala, a wan ta sogɛ teŋkanra poan te to kan le paɛ en. 7Te Yoab pɛɛntɛɛnreba la Keretdoma la Peletdoma la sɛba woo n mi' zaberɛ la, naɛ taaba ze'ele Yerusalem teŋai digera Bikri dayɔa Sheba poore. 8Ban ta paɛ taŋkantɛ la n boe Gibeon teŋa poan la, te Amasa to'ohɛ ba na. Yoab yɛ a zaba fuo la ko sɛ ganɛ, te so'a bɔna ka fulugɔ poan nya lo lama a sea, te n boe nɛŋa la te so'a la foe yula. 9Te Yoab soke Amasa yeti, N sɔɔn, la ane ho som? Ge te a nya dekɛ a zuɔ nu'o gin' a tɛɛŋa te a kɔkɛ en. 10Amasa me ka nyɛ so'a la n boe Yoab nu'en la, te Yoab lo' Amasa poorɛ la so'a la, te a pooren lɔgɔrɔ yehe na, te a ki. A kɔ'ɔn lo' en la boyena ma'an. Te Yoab la a sɔɔn Abisai nya dige bikri dayɔa Sheba. 11Yoab boraahe la kayema ze'ele lɛm Amasa n gan' teŋa la ge yeti, Se'em woo n bote Yoab, ge dɛna David denɛ, a daana dɔla Yoab. 12Amasa gan'an a ziim la poan, sore kantɛ la zuo, te nɛra woo ne paɛ na ze'ele. Boraa la n nyɛ te nɛra woo ne paɛ na ze'ele la, te a obegɛ Amasa sore la zuo, tare en keŋɛ samanɛ poan ha, ta biŋe, dekɛ fuo pin' en. 13En dekɛ Amasa sore la zuo la, te nɛra woo le taɛ Yoab poore digera Bikri dayɔa Sheba. 14Sheba zɔ doohe Israel buuri la woo poan tole ta paɛ Abel teŋa n boe Bet Maaka teŋa poan, te Bikridoma la woo tiihom taaba doohe Sheba kɛn' teŋa la poan na. 15Yoab boraahe la wa'ana sogɛ gan'an Bet Maaka teŋa la yeŋa kae gura Sheba, tin' dɔtɔ kae teŋa la dangɔɔma la, tin' dɔtɔ la te to zom, te ba nya gbi'ira dangoone la te de lu. 16Pɔka boe teŋa la poan tara yam, ze'ele dangoone la zuo ha yi bahɛ na yeti, Behɛ ya! Yele ya Yoab te a wa'an ka'lam na, n bote n tɔgɛ mɛ la en. 17Yoab paɛ pɔka la n yage zen'an bɔba la, te ka soke en yeti, Hom n de Yoab la? Te a lebehe yeti, Ɛɛn, mam n bala. Te pɔka la yele en yeti, Kelehe ho tontona wa yetɔgom wa ya. Te Yoab yeti, N kelehe. 18Pɔka la yeti, Deendoma la yuum ne yeti, keŋɛ ya Abel teŋa ta ɛ, te yele wa maalɛ. 19Tomam dela sunma'ahomdoma la birikindoma Israel teŋa la poan. Ho eere te ho sagom la teŋsɛka n de sɔɔn la Israel teŋa. Bene zuo te ho wan sagom Na'ayenɛ la sɔ'ɔlom? 20Yoab lebehe yeti, Aai! Mam ka wa'ana te n sagom! 21Dagɛ bala zuo te mam wa'ana. Boraa kayema, te ka yu'urɛ dela Sheba, te ka sɔ yu'urɛ dɛna Bikri, ze'ele Epraim teŋa na la, en zaberɛ la naba David. Nyɔkɛ ya kaŋa ka ma'an tehe na, ge n wan bahɛ teŋa wa. Te pɔka la lebehe yele Yoab yeti, To wan fike a zuo doohe dangoone wa zuo lobe bahɛ ho na. 22Pɔka la nya lebe, ta doohe nɛreba la, la a yam la, te ba fike Bikri dayɔa Sheba zuo, dekɛ doohe dangoone la zuo lobe bo Yoab na. Te Yoab nya peebe tentanɛ, te a nɛreba la nya bahɛ teŋa la, ge yeregɛ kule yiya. Te Yoab me lebe kule Yerusalem teŋai, naba la zen'an. 23Yoab wa n de Israel zan'an pɛɛntɛɛnreba la nɛŋadaana. Yehoiada dayɔa Benaiah dɛna Keretdoma la Peletdoma la me nɛŋadaana. 24Adoniram me dɛna tontoneba nɛŋadaana. Ahilud dayɔa Yehosapat me goleha yɛla biŋera. 25Seva me dɛna gɔŋgoloha. Zadok la Abiatar me dɛna malemadoma, 26Ira, se'em n ze'ele Yair teŋa na la, me dɛna David malemadaana.

will be added

X\