2 Samuel 2

1Wana n tole la, te David soke Na'ayenɛ la yeti, N keŋɛ Yuda teŋhe wa ka poan? Te Na'ayenɛ la lebehe en yeti, Ɛɛn. Te David lebehe soke yeti, Teŋkane poan te n wan keŋɛ? Te Na'ayenɛ la lebehe yeti, Hebron. 2Te David keŋɛ Hebron teŋa, la a pɔgɔba bayi', Ahinoam Yezreel pɔyɔa la Abigail se'em sera n de Karmel nɛra Nabal n ki la. 3David me vaɛ boraa se'ehe woo n boe la en la, boraa woo la ka nɛreba, te ba zan'an keŋɛ ta kɛn'ɛra Hebron teŋhe la poan. 4Yuda nya nɛreba lagahɛ na, sɔ' David la kaam bilam te a dɛna ba naba sɔna Yuda teŋa la zan'an behera. Te la ta lu David tobai te Yabes Gilead teŋadoma n pin' Saul. 5A tom nɛreba Yabes Gilead teŋadoma la zen'an la sɔɔleŋa yeti, Na'ayenɛ la wan kan' som bahɛ ya zuo, la yan pa'alɛ ya daana Saul yan nɔŋɛ en se'em, pin' en la zuo. 6Na'ayenɛ la nɔŋerɛ kantɛ la a zo'ohogɔ la wan perɛ ya. Mam mɛŋa me wan yɔ ya la yan tom toonsonɛ dena wa. 7Bahɛ ya te ya giinla kpeŋɛ, te kpe'em. Se'ere n sɔe la, ya daana Saul ki ya, ge Yuda nɛreba la sɔ' mam la kaam te n dɛna ya naba. 8Ge Ner dayɔa Abner, se'em n de Saul pɛɛntɛɛnreba la nɛŋadaana la, me ta dekɛ la Saul dayɔa Is Boset tare en keŋɛ Mahanaim, 9Ta bobe en Gilead la Asuri la Yezreel la Epraim la Benyamin la Israel teŋa la zan'an teŋa na'am. 10Saul dayɔa Is Boset dela yuum pihinaahe ge dɛna Israel teŋa naba, behɛ teŋa la yuuma ayi'. Ge te Yuda teŋadoma me pa' David poore, te a dɛna ba naba. 11David di Yuda teŋa na'am, Hebron teŋa poan la yuuma ayopɔe la ŋmarehe seyoobe. 12Ner dayɔa Abner la Saul dayɔa Is Boset la a tontoneba ze'ele Mahanaim teŋa poan yehe keŋɛ Gibeon teŋa. 13Zeruiah bia Yoab la David tontoneba to'ohɛ ba Gibeon bɔka la poan. Te bana la bɔna bɔka la yakenɛ deyema ha te David nɛreba la me bɔna bɔka la yakenɛ deyema la me na. 14Abner nya yele Yoab yeti, Bahɛ te ho boraahe la to'ohɛ mam boraahe wa te to behɛ. Te Yoab me yele en yeti, Bahɛ te ho boraahe la tole na. 15Te ba tole yehe na, te ba kaanlɛ Benyamin la Saul dayɔa Is Boset nɛreba la te ba dɛna boraahe pia la seyi', te David nɛreba la me dɛna boraahe pia la seyi'. 16Te boraahe la gin' taaba zuto, lo' la so'ohe, naa taaba lu ki. Bala, te zen'kaŋa la yu'urɛ dɛna Helkat Hazurim bɔna Gibeon teŋa poan. 17Zaberɛ la ta mɔ'ɛ gaŋɛ me, ge te David nɛreba nyaŋɛ Abner la Israel boraahe la n doohe en na la. 18Zeruiah kɔma setan' Yoab la Abisai la Asahel boe bini mɛ. Asahel la zote ma woo walega la 19te a tabɛ Abner poore kaŋkaŋe. 20Abner ta behɛ pooren, soke en yeti, Hom bala, Asahel? Te a lebehe yeti, Ɛɛn. 21Abner yeti, Bahɛ mam ge ŋmɛregɛ ho zuɔ bii gɔbega, la ho gin' n boraahe la kayema ge fan' kan tare sɛla woo la ge bahɛ mam. Ge Asahel sina ge digera en. 22Abner le yele Asahel yeti, Bahɛ mam dika! Han dagana bala ge te mam ko hɔ, n kan la ta'an ze'ele ho keema la Yoab nɛŋan. 23Ge Asahel sina ge digera, bala te Abner dekɛ a kanɛ lo' a poorɛ, te kanɛ la tooɛ yehe a pooren. Te Asahel lu' ki, te nɛra se'em woo n paɛ zen'an te a ki ga'an la ne zɛ'a mɛ kɛle. 24Ge Yoab la Abisai yehe digera Abner. Te yene ta yɛ'a lua, te ba paɛ Ama zoore la n gan' Gia teŋa nɛŋan la, Gibeon pɔgɔtia sore la bɔba la. 25Benyamin teŋa boraahe la nya yehe na pa' Abner poore, la nɔyene, nya ze'ele ba mɛŋa soŋa zoore la zuo. 26Abner yi Yoab na yeti, So'a la kelom kɔrɔna yɛ'ɛha? Hom ka mi' te ba'ahegɔ la wan ta dɛna yabega? La wan yuue la wane ma'an te ho wan yele ho boraahe te ba bahɛ ba mɛŋa sɔɔnrɔ wa dika? 27Yoab lebehe yeti, Yenɛ wa yu'urɛ zuo, hom wa han ka ya'ɛ ne ho nɔɔrɛ tɔgɛ wana, te wan dige ne ho bala te beere ta yiligɛ. 28Yoab peebe tentanɛ, te a nɛreba la zan'an ze'ele, ka dige Israeldoma wa, bii ba kɔ' zaberɛ la ba le yɛ'ɛha. 29Te Abner la a boraahe la keŋɛ Arabah la poan bala yu'uŋkoŋɔ mea poan, ta yakɛ Yordan Kolaa la, paɛ Bitron keŋɛ bala na kɛn' Mahanaim teŋa la. 30Yoab nya bahɛ ba dika, ge nya lebe na lagahɛ a boraahe la woo. David nɛreba la pia la bawae' n ka boe bini, te Asahel ka pa'ahɛ. 31Ge te David nɛreba la me ko Abner boraahe la n de Benyamin doma la kɔbehe setan' la pihiyoobe. 32Ba dekɛ Asahel iŋa la pin' en ba ba yiredoma yɔɔ poan, Betlehem teŋai. Yoab la a boraahe la nya ihege yu'uŋkoŋɔ mea kena lɛbera kula. Te beere ta yiligɛ, te ba paɛ Hebron.

will be added

X\