2 Samuel 18

1David lagahɛ boraa se'ehe n boe la en la, te a loe basɛba te ba behera nɛre tuha, te sɛba me behera nɛre kɔbehe. 2David yelege pɛɛntɛɛnreba la tansuga atan', te Yoab sɔna tansugure deyema beha, te Yoab yebega Abisai n de Zeruiah bia me sɔna tansugure deyema beha, te Gat boraa Itai me sɔna tansugure se'ere n gee la beha. Naba la nya yele nɛreba la yeti, Mam mɛŋa wan doohe ya keŋɛ pɛɛnbɔn'ɔn la poan. 3Ge pɛɛntɛɛnreba lebehe yeti, La kan ta'an eŋɛ te ho doohe keŋɛ. Se'ere n sɔe la, te han ta zɔta, ba ka eere tomam. To porogerɛ han pon ki, ba ka eere tomam. Hom ma'an wa dela tomam tuha pia. Bala zuo la, la wan ana soŋa te ho yee bɔna teŋa poan ka'lam ge soŋora to na. 4Naba la yeti, Sɛla te ya behɛ te la ane soŋa te n eŋɛ, n wan eŋɛ. Ge a nya zɛ'a teŋa nayaŋa la nɔɔrɛn, ge te a pɛɛntɛɛnreba la, tagalɛ taaba tansugure tansugure tɔla yɛha, te sɛba dɛna kɔbehe, te sɛba dɛna tuha. 5Naba la bo Yoab la Abisai la Itai a nɔɔrɛ yeti, Mam zuo, da ta muguhe ya bodibipaalega Absalom wa. Naba la n bo'ore nɛŋadoma la a nɔɔrɛ doohe ban wan eŋɛ Absalom se'em la, nɛra woo wom mɛ. 6Pɛɛntɛɛnreba la sige pɛɛnbɔn'ɔn la poan ha te bama la Israeldoma sɛba n dole Absalom poore la ta tɛn'. Pɛɛnbɔn'ɔn la boe la Epraim teŋa mɔɔ la poan. 7David pɛɛntɛɛnreba la ta nyaŋɛ Israel pɛɛntɛɛnreba la. De daarɛ mea te ba kɔrom nɛreba te la ka tana eta. Nɛreba tuha pihiyi' n lu teŋa de daarɛ. 8Te zaberɛ la nya kɔ'ɔn to'e teŋa la zen'an woo, te de daarɛ te mɔɔ la poan ko nɛreba gaŋɛ so'a. 9Te Absalom ta to'ohɛ David pɛɛntɛɛnreba la. Bala ma'an te Absalom ban' la yehoboŋa, te ka perɛ ka mɛŋa tikantɛ yila poan, te Absalom mɛŋa zuo kɛn' tikantɛ la yila poan ha, te a mike. Te a zuo bɔba bɔna zuin ha, te a na'ma bɔba me yula teŋa na, ge te yehoboŋa la ton foe keŋɛ. 10Boraa kayema n nyɛ, a yele Yoab yeti, Mam nyɛ la Absalom te a yula tikantɛ zuo ha. 11Yoab lebehe soke boraa la n yele en la yeti, Bene? Hom nyɛ en la! Bene te ho ka kɛ' en bilam bahɛ teŋa na? Te n nya wan bo' ne ho sanlenpeele kpila pia la pɛɛntɛɛnra sɛganɛ, ho han nyaŋɛ ne tom bala. 12Ge boraa la lebehe yeti, Mam han pon behɛ te mam nu'o wa tebegɛ mɛ woo sanlenpeelega dɔya tuhure tebehom, mam kan sakɛ zɛnkɛ n nu'o kalom naba dayɔa wa. Tomam tobai te naba bo hom la Abisai la Itai a nɔɔrɛ yeti, mam zuo ta gu'ure ya bodibipaalega Absalom wa. 13Le pa'ahɛ, mam han eŋɛ ne en sɛla n ka ane soŋa, te sɛla me kan nyaŋɛ sogɛ naba nɛŋan wa, ho mɛŋa wa kan pa' ne n poore. 14Yoab yeti, N pon kan sagom saŋa zɛ'a la hom. Ge te a dekɛ kana atan' tare paɛ, te Absalom nan vɔe tikantɛ la zuo ha, te a dekɛ kana la lo' a nyɔn'ɔn poan. 15Te bodibinto paalehe pia n seto n ziire Yoab pɛɛma la gilige Absalom kɛ' en te a ta ki. 16Yoab nya peebe tentanɛ, te a pɛɛntɛɛnreba la zan'an nya bahɛ Israel dika, ge lebena. Se'ere n sɔe la Yoab n peebe gu ba. 17Ba yulige Absalom na, dekɛ en lobe bahɛ boko kantɛ poan mɔɔ la poan, kan'ahɛ kuga perɛ boko la zom na. Te Israel nɛresɛba n dole Absalom poore la zan'an zɔ mɛlom kule ba yiya poan. 18Absalom n daa vɔe la, a daa loe la zen'an kayema Naba Bɔn'ɔn la poan bo a mɛŋa, sɛ kugure bini, te enŋa ka tare dayɔa te ka beere wan porɛ enŋa yu'urɛ. Te a sɛ kugure la dekɛ a mɛŋa yu'urɛ segɛ kugure la te zen'an la yu'urɛ yare yi'ira Absalom Kugure la zina wa. 19Zadok dayɔa Ahimaaz yeti, Bahɛ te n zɔ kalam ta mɔɔlɛ yelesonɛ wa bo naba te Na'ayenɛ fan' en a diŋdoma paŋa poan bahɛ. 20Yoab yele en yeti, Aai, da keŋɛ ta mɔɔlɛ yelesoma wa zina. Gura daanse'ere, ge dagɛ zina. Se'ere n sɔe la, naba dayɔa n ki. 21Yoab nya ton tom Kus teŋa nɛra ti, Keŋɔ la ho ta yele naba ho nini n nyɛ sɛla. 22Zadok dayɔa Ahimaaz le yeti, Lan pon ana se'em me, bahɛ te n me zɔ doohe Kus teŋa nɛra wa poore. Ge Yoab soke en yeti, Ho yeti ho zɔ to'e la bem? Ho ka tare yɔɔrɛ yelesonɛ la mɔɔlegɔ poan. 23Ahimaaz yeti, La han pon dɛna sɛla woo, mam wan zɔ doohe. Te Yoab yeti, Yi zɔ doohe! Te Ahimaaz zɔ doohe bɔn'ɔn sore la, zɔ gaŋɛ Kus boraa la. 24Bala ma'an la te David zin' la teŋa la nayahe seyi' la teŋasoka, te se'em n limihe bɔ'ɔra en la doohe nayahe la dangoone la zom ha te a behɛ. En behɛ ha la, a nyɛ te boraa n zote ka ma'an na. 25Te a voole yele naba na, te naba la yeti, A han kena la a ma'an na, yelesoma n boe a nɔɔrɛn. Te nɛra la zɔta na, ta pɔnra na. 26Te se'em n limihe la, le behɛ, te boraa kayema me zote na, te a le voole yi se'em n gure nayaŋa la yeti, Behɛ, boraa kayema me n bala zɔta ka na la! Te naba la lebehe yeti, Enŋa me tare la yelesoma kena na. 27Te se'em n limihe la yeti, Mam behɛ te yiya daana la zote woo Zadok dayɔa Ahimaaz la. Te naba la yeti, A dela nɛresoŋɔ, kena na la yelesoma. 28Ahimaaz yi naba voole yeti, Sɛla woo ane soŋa! A dɔnbelɛ teŋa naba nɛŋan yeti, Pɛnka dɛna Na'ayenɛ ho Yenɛ la! A nyɔkɛ boraa se'ehe n zabere la mam n daana naba wa la bo ho. 29Naba la soke yeti, La ane som la Absalom ha? Te Ahimaaz lebehe yeti, Naa, Yoab n yele ne te a tom mam na la, mam baŋɛ ne te daaŋɔ n boe, ge mam ka baŋɛ kon de daaŋseko. 30Naba la yele en yeti, Lebe ze'ele ke. Te a ŋmɛregɛ ze'ele, kɔ'ɔn zɛ'a bilam. 31Te Kus teŋa boraa la n bala paɛ na yeti, N daana naba, yelesoma te n tare na te n bo naba! Se'ere n sɔe la, Na'ayenɛ la n fan' hɔ zina dabaherɛ wa. A fan' ho la sɛba n daa ihege zabera la hom n daana la nu'uhen bahɛ. 32Naba la soke en yeti, La ane som la Absalom ha? Te Kus boraa wa lebehe yele naba la yeti, Naa, lan eŋɛ sɛba woo n ihege te ba pɔgɔlom hom n daana naba wa se'em la, bala mea n eŋɛ Absalom. 33Te la ve'e naba la, te a ihege zom sɔnhega bɔ'ɔrɔ la n togolom bɔna nayahe la zuo ha la ta kele bilam ha fabela yeti, Woo, n dayɔa Absalom! N dayɔa Absalom! Mam han ton ki ne, ge bahɛ ne hom, la ane ne soŋa. N dayɔa, woo, n dayɔa Absalom!

will be added

X\