2 Samuel 17

1Ahitopel ta yele Absalom yeti, Bahɛ te n ganhɛ boraahe tuha pia la ayi', la n dige David yu'uŋɔ wa. 2N ta nyɛta en la, te a taregɛ mɛ te a giinla kɔ'ɔhɛ, te n vuunhɛ en te nɛresɛba woo n boe la en la zɔ, ge te n ŋmɛ ko' naba la ma'an, 3ge tare nɛreba zan'an lebe ho zen'en na.Te boraa la te ho eera ka kum la vɔnrɛ dela nɛreba zan'an lebega na, te ba se'em pon kan pɔgɔlom. 4Te kan'aŋɔ kona wa ana soŋa bo Absalom la Israel keendoma la. 5Absalom yeti, Yi ya Arkdoma boraa Husai na te to wom enŋa me n tare se'ere te a yele. 6Husai n paɛ Absalom nɛŋan na la, te Absalom yele en yeti, Ahitopel n yele se'e n wana, to eŋɛ enŋa n yele to se'em la? Han dagana bala, hom tare la dene? 7Husai yele Absalom yeti, Zina, kan'aŋɔ seko te Ahitopel dekɛ bo ho wa, ka ane soŋa. 8Ho mi te ho sɔ la a boraahe la dela sɛba n mi zaberɛ soŋa, ge te ba suunre me nyie wo gbegenɛ te fan' mɔɔ poan ha te ka suunre nyii se'em la. Le pa'ahɛ ho sɔ la dela pɛɛntɛɛnra, a ka ginhere yu'uŋɔ la a pɛɛntɛɛnreba la. 9Nananawa wana ma'an a sogɛ la yoko seko bii zen'sɛka poan ha. Bala tomam pɛɛntɛɛnreba wa han yɛ'a, ta lu David la a nɛreba la nu'uhen, te se'em wom, ba wan yeti, ba kɔrom pɛɛntɛɛnreba sɛba n dole Absalom poore la mɛ. 10La han deŋɛ eŋɛ bala, pɛɛntɛɛnreba sɛba n boe ho nɛreba wa poan te ba suunre kanbɛ wo gbegenɛ suunre la, wan zɔta dabeem. Se'ere n sɔe la, Israel zan'an mi' te ho sɔ wa dela pɛɛntɛɛnra te sɛba woo n dole en la me ana bala. 11Mam kan'aŋɔ dela, ho kan'ahɛ Israeldoma zan'an na te zo'e wo kolaa tentɔnɔ la, te hom mɛŋa bɔna nɛŋa te ba ta keŋɛ ta zabɛ la en. 12Bala te en sogɛ bɔna zen'an woo te wan nyɛ en, bibige a zuo wo mɛgelom n lute teŋa na se'em la, te a kan vo'e, bem te sɛba n dole en la. 13A han zɔ kɛn' la teŋsɛka poan, to wan tare mi'inhe ta lo teŋkaŋa ve'e ka ta bahɛ bɔn'ɔn poan ha, te kugure la deyena mɛ kan yee teŋkaŋa poan. 14Absalom la Israel buuri la zan'an yeti, Ark boraa Husai kan'aŋɔ wa ane soŋa nyana Ahitopel kan'aŋɔ wa. Se'ere n sɔe la, Na'ayenɛ la mɛŋa n bahɛ te Husai kan'aŋɔ la di Ahitopel kan'aŋɔ la te a tare sagaŋɔ wa'an Absalom zuo na. 15Husai nya yele malemadoma Zadok la Abiatar yeti, Ahitopel n bo Absalom la Israel keendoma la kan'aŋɔ seko n bala, ge mam me n bo kan'aŋɔ seko me n bala. 16Bala, bahɛ te sɔɔleŋa paɛ David zina te a da gan'arɛ mɔɔ la poan zina yu'uŋɔ. Yakɛ Yordan. Han dagana bala, naba la a nɛreba la wan bibige en na. 17Bala ma'an la, te Yonatan la Ahimaaz ne bɔna la En Arogel teŋai, ge gura, te pugula n de yameŋa, ne tare sɔɔleŋa na bo ba, te ba tare na yele David. Se'ere n sɔe la, la ba han nyɛ ba te ba kɛn'ɛre teŋa la poan na, la dela ba nyɔnpɔnhega. 18Ge te bodibila kayema nyɛ ba, wa'ana yele Absalom, te bama me baŋɛ kanbelɛ kalam ta kɛn' boraa kayema yire, Bahurim teŋa poan, te loa bɔna yire la zenzakai, te ba sige loa la poan, 19Boraa la pɔga dekɛ sɛla yeregɛ pin' loa la nɔɔrɛ, ka'ɛ ka ki yeregɛ bini te nɛra kan baŋɛ. 20Absalom nɛreba wa'ana paɛ yire la ba soke pɔka la yeti, Ahimaaz la Yonatan la doohe la bɛha? Te pɔka la yele ba yeti, Ba yakɛ bɔka wa ha. Te boraahe la doohe ba na'ma ta koŋɛ, ge lebe kule Yerusalem. 21Ban tole ba'ahɛ la, Ahimaaz la Yonatan ze'ele loa la poan doe na, keŋɛ ta yele naba David yeti, Ihege, la ho yakɛ ko'om wa, ge Ahitopel n bo kan'aŋɔ seko n bala. 22Bala te David la a nɛresɛba woo ihege yakera Yordan Kolaa la. Te beere ta yelegera te ba zan'an yakɛ ba'ahɛ. 23Ahitopel n nyɛ te ba ka doohe enŋa kan'aŋɔ la, te a ihege lo' a boŋa, ban' lebe kule a mɛŋa teŋa. Ta paɛ maahom a yire soŋa ge lo' a mɛŋa yule, ki te ba pin' en a sɔ yɔɔ poan. 24David wa'ana paɛ Mahanaim teŋa, ge te Absalom tee yakɛ Yordan Kolaa la Israel boraahe la woo n dole en la. 25Absalom tee dekɛ la Amasa ze'ele Yoab na'arɛ te a dɛna pɛɛntɛɛnreba la nɛŋadaana. Amasa sɔ wa dela Israel boraa Yeter. Yeter daa di Nahas pɔyɔa Abigail n de Zeruiah, Yoab ma, yebega. 26Te Absalom la Israeldoma sɛba n dole en la tiihom Gilead teŋa poan. 27David n wa'ana paɛ Mahanaim teŋa poan la, Ammon teŋa Araba boraa Nahas dayɔa Sobi la Lo Debar teŋa boraa Amiel dayɔa Makir la Arogelim teŋa Gilead boraa Barzilai 28tare gɔtɔ la laahe la yɔgɔrɔ laahe la ki la mui la zom te ba dogɛ la kikanra la tiya 29la seerom la iilom la piihe la iilom man'aha, tare na bo David la a nɛreba la te ba di. Ba daa yeti, Ho nɛreba wa n keŋɛ pɔgɔtia la poan bala la, kom n tare ba, te ba taregɛ, te ko'nyuuro tara ba.

will be added

X\