2 Samuel 16

1David n keŋɛ zoe Olive Zoore la zuin la fiin wa la, te Ziba, Mepiboset tontona la, n to'ohɛ en bilam, la bonhe seyi' te a lo', te se ziira boroboro kɔbehe seyi' la tiihe wɔla n ku'e wama la kɔbega la mu'uro wama la kɔbega la daam la talaŋa. 2Te naba la soke Ziba yeti, Ho tare lɔgɔtona wa woo na bo? Te Ziba lebehe yeti, Bonhe la dela hom naba la ho yiredoma denɛ te ya ban'ara. Boroboro la tiihe wɔla la me dela ho nɛreba denɛ te ba di. Te daam la me dɛna sɛba n keŋɛ taregɛ pɔgɔtia wa poan la te ba nyu'. 3Te naba soke en yeti, Ho daana dayɔa la bɛɛ? Te Ziba lebehe naba la yeti, A yee la Yerusalem. Se'ere n sɔe la, a tɛn'ɛhe te zina Israel yiredoma wan dekɛ mam sɔyaabdoma sɔ'ɔlom lebehe bo mam. 4Te naba la yele Ziba yeti, Sɛla woo n de Mepiboset denɛ tee dɛna la hom denɛ. Te Ziba yeti, N daana, n po'ohɛ ya la hom n daana naba nini n tegɛ la mam wa. 5Naba David n ta paɛ Bahurim teŋa poan la, boraa kayema n de Saul yire poan nɛra. Ka yu'urɛ yi'ira Simei, dɛna Gera dayɔa. En yehe na, a kɔ'ɔn pɔta nɔbe'o bɔ'ɔra David. 6A gbɛ'ɛra kuga lɔbera David la a nɛreba la zan'an, ge te David pɛɛntɛɛnreba la bɔna a zuɔ la a gɔbega nu'o zan'an. 7Simei tanhera ge pɔta a nɔbe'o baha David zuo yeti, Yehe ka'lam, nɛrekoora wa, faanra wa! 8Na'ayenɛ la n nya yɔɔre hɔ, la hom ka'ahɛ Saul yire ziim, ge nya sɔe dɛna naba wa. Bala te Na'ayenɛ la nya fan' sɔ'ɔlom la eŋɛ ho dayɔa Absalom nu'uhen la, yanɛ n nya dite ho la. Se'ere n sɔe la, ho dela se'em n ka'ahɛ nɛreba ziim! 9Te Zeruiah bia Abisai soke naba la yeti, Bene zuo te baa kiiriŋa wan ta'an pɔta nɔbe'o bɔ'ɔra hom n daana naba? Bahɛ te n paɛ fike a zuo wa. 10Te naba la yeti, Zeruiah kɔma wa, ya yeti n eŋɛ ho la wane? Na'ayenɛ la n han yele en te pɔ' nɔbe'o bahɛ David zuo, ane n de enŋa wan ta'an soke ti, ho ete bala bo? 11Te David yele Abisai la a kpɛ'ɛndoma la yeti, Mam mea dayɔa n bala ɛɛra mam vom wa, nya bii Benyamin buuri nɛra wa! Bahɛ ya en ha te a pɔta a pɔ' be'ero, Na'ayenɛ la n bo en sore. 12Daanse'ere, Na'ayenɛ wan sure behɛ n ninbɔn'ɔn wa, ge lebehe som yɔ mam, la pɔ' be'o seko te ba pɔ' bo mam zina wa. 13Te David la a nɛreba la bɔna sore zuo kena, ge te Simei me bɔna kenkɛleŋa bela zoore la kaara dɔla ba pɔta nɔbe'o, lɔbera ba la kuga, ge fonbera ba la tentɔnɔ. 14Te naba la a nɛreba la woo tare tara ta paɛ Yordan Kolaa la poan na, taregɛ kɛra. Ba nya zin'ire bilam, te naba la vo'ohe. 15Te Absalom la Israeldoma sɛba n dole a pore la woo wa'ana kɛn' Yerusalem teŋa poan te Ahitopel lagom bɔna ba poan. 16Ark boraa Husai n de David zɔ' soŋɔ la nya paɛ Absalom nɛŋan na la yeti, Naa, naba! Naba naa bɔna bala! 17Absalom soke Husai yeti, Hom nɔŋɛ ho zɔ mea mɛ wa yoi? Bene zuo te ho ka doohe ho zɔ la poore? 18Husai lebehe en yeti, La dagɛ bala, se'em te Na'ayenɛ la Israel nɛreba loe la, mam dela enŋa denɛ, n wan tona bɔ'ɔra la enŋa. 19Ane te mam wan tom bo gana a dayɔa wa? Mam n daa tone bɔ'ɔra ho sɔ se'em la, bala mea te n wan tona bɔ'ɔra hom. 20Absalom nya yele Ahitopel yeti, Nya bo to ho kan'aŋɔ, to wan eŋɛ la wane? 21Ahitopel yeti, Kɛn' paɛ ho sɔ pɔgɔbɔ'ɔrenhe la te a bahɛ se te se beha yire la, te Israel nɛra woo baŋɛ te hom la ho sɔ dela dataahe la taaba. Bala te sɛba n pa' ho poore la wan kpe'em. 22Bala te ba tin' sogorɛ deo gɔhɔgɔ zuo ha bo Absalom, te Absalom tara a sɔ pɔgɔbɔ'ɔrenhe la gan'an Israel buuri wa woo ninin. 23Dabeha aŋa poan la, ba da behɛ te Ahitopel han bo ho kan'aŋɔ ko ane mɛ woo Yenɛ mɛŋa n kan'ane ho la. Bala David mɛŋa la Absalom ka de'ene la boraa wa kan'aŋɔ.

will be added

X\