2 Samuel 15

1Bala woo pooren, te Absalom ɛ yire toroko la yiri ge ganhɛ boraahe pihinuu bo a mea. 2Daarɛ woo, a ne deŋɛ ihege mɛ ta zɛ'a sose'ere n dole kɛn'ɛra teŋa la nayaŋa la poan na la. Te se'em han tara a yele yɛ'a naba zen'an na te a gankɛ bo en, Absalom ne yi nɛra la mɛ soke en yehe teŋsɛka na la a yu'urɛ. Te nɛra la han pa'alɛ en te enŋa ze'ele la Israel buuri la teŋkana la kana poan na, 3Absalom ne yele nɛra la yeti, Ho nyɛ ya, ho yele wa dele ninmɔ'ɔrɛ yele, ge naba la ka loe nɛra ze'ele te a beha nɛreba yɛla. 4Ge a ne le yeti, Ba han sakɛ ne te mam dɛna kema teŋa wa poan! Te se'em woo tare a yetɔgom sebo, a ta'an wa'an mam zen'an na, te mam wan bahɛ te a daana nyɛ sera gankere. 5Nɛra se'em ne han paara a zen'an te a sure teŋa po'ohɛ en, a ka sakere, a ne gin' la nɛra la mɛ ze'ele saazuo kɔkɛ en. 6Israel buuri la poan se'em woo n ne tara a yele yɛ'a na te naba gankɛ, Absalom ne eŋɛ a daana la bala nya nyaŋɛ zun nɛreba la woo potɛn'ɛrɛ. 7Yuuma anaahe poan, te Absalom yele naba yeti, Mam bote ho bo mam la sore te n keŋɛ Hebron, ta yɔ mam n daa biŋe n nɔɔrɛ te n wan yɔ sɛla la bo Na'ayenɛ la. 8Se'ere n sɔe la, mam ho tontona wa n daa boe Gesur teŋa poan la, n daa biŋe la nɔɔrɛ te, Na'ayenɛ la han tare mam lebe Yerusalem na, mam wan keŋɛ Hebron ta na'ahɛ en. 9Naba la yeti, Kena, ge ho wan nɛ kanpone. Te Absalom keŋɛ Hebron teŋai. 10Te Absalom tom nɛreba te ba doohe Israel teŋa la zan'an poan la ba yeti, Ya han ta wom tentanɛ peebego, ya yeti, Absalom boe la Hebron teŋa ge dɛna Israel naba. 11Te boraa kɔbehe seyi' n ze'ele Yerusalem teŋa poan doohe Absalom keŋɛ. A yi ba mɛ te ba dɛna a saama doohe en keŋɛ ge ba ka mina yele se'ere te en ete. 12Absalom n ta bɔna Hebron kaanbera a kaanbegɔ la, a tom yi' David kan'ana Ahitopel n boe Giloh te a wa'ana. Te nɛresɛba n pa' Absalom poore la malom pa'ahera. 13Nɛra ayema wa'ana yele David yeti, Israel nɛreba la zan'an sunya lo' mɛ la Absalom. 14David nya yele a nɛreba sɛba n boe la en Yerusalem poan la yeti, Ihege ya te to te'ele zɔ! Han dagana bala, te kan peɛn Absalom nu'uhen. Kalam te to keŋɛ ya. Han dagana bala, a wan dige nyɔkɛ tɔ, tare namehegɔ wa'an to zuo na, ge dekɛ so'a zabɛ la teŋa wa. 15Naba la nɛreba la lebehe en yeti, Te maahom ya te to eŋɛ hom n daana naba n bote te eŋɛ se'em la. 16Naba la yehe la a yiredoma zan'an, ge gee a pɔgɔbɔ'ɔrenhe pia ma'an te a bahɛ ba yire la poan te ba gura yire la. 17Te naba la yehe la a nɛreba zan'an, kena ta paɛ yire se'ere n boe ba teŋa la fehegan ha la, ze'ele bilam. 18A nɛreba la woo wa'ana tole a nɛŋan la Keretdoma la Peletdoma la Gatdoma kɔbehe seyoobe la n doohe en Gat teŋa poan na la, zan'an wa'ana doohe naba la nɛŋan tole. 19Naba la yele Itai n de Gat teŋa boraa la yeti, Hom me dole to na bo? Lebe ta bɔna la napaale la. Se'ere zuo, ho dela saana ze'ele la teŋa kayema zɔ na sogɛ ka'lam. 20Zam ma'an te ho wa'an ka'lam na, la ane soŋa te n tara hɔ te ho ta ɛɛra tuuna la mam zen'an woo? Tare ho nɛreba te ya lebe te Na'ayenɛ la wan dekɛ a nɔŋerɛ la a zo'ohogɔ doohe ya poore. 21Ge Itai lebehe naba la yeti, Na'ayenɛ wa n boe wa, ge te hom dɛna naba wa, mam pɔ mɛ te zen'an woo te hom, n daana naba wa yɛ'a, mam wan doohe. Kum bii vom poan, mam ho yameŋa wa wan bɔna la bini la hɔ. 22David yele en yeti, Ye pa'ahɛ te to keŋɛ. Bala te Gat boraa Itai wa nya lagom pa'ahɛ nɛreba la poan, te kena, la a nɛreba sɛba zan'an la ba kɔma. 23Naba la a nɛreba n tɔla la, teŋa la nɛreba la zan'an kaaha. David la nɛreba la yakɛ Kidron bɔn'ɔn la, te ba zan'an yɛ'a tɔɔra pɔgɔtia la ha. 24Zadok la Levidoma sɛba n boe la en la n ziire Yenɛ nɔbiŋere daka la. Ba maahom daka la ba'ahɛ la te Abiatar kaanbe kaanbegɔ bala, gura te nɛreba la zan'an ta yehe teŋa la poan ba'ahɛ. 25Naba la nya yele Zadok yeti, Zi Yenɛ nɔbiŋere daka wa lebe teŋa la poan ta ze'ele. Na'ayenɛ la han zɔ n ninbɔn'ɔn, a wan tare mam lebena, te n nyɛ ka, la ka zɛ'a zen'an la. 26Ge a han le yeti a nini ka tegɛ la mam, la dela bala, a eŋɛ mam enŋa n bote sɛla. 27Naba le yele malemadaana Zadok yeti, Behɛ! Lebe ya kule la iŋma'ahom, hom la Abiatar la ya dayɔɔhe seyi', ho dayɔa Ahimaaz la Abiatar dayɔa Yonatan. 28Mam wan ta gura kolega doore zen'an la, gura te ho ta bo sɔɔleŋa na, sɛla woo n ete. 29Bala te Zadok la Abiatar zi Yenɛ nɔbiŋere daka la lebe Yerusalem teŋa poan, ta bɔna bilam. 30Te David zɔna Olive Zoore la, ge kɛla. A pin' a zuo, ge pirihe a tagara. Nɛresɛba woo n dole en la me pin' ba zuto, me kena ge kɛla. 31Te David ta wom te Ahitopel lagom pa'ahɛ Absalom toonɛ wa poan mɛ, te a soha yeti, Na'ayenɛ, bahɛ te Ahitopel kan'aŋɔ woo te a wan dekɛ kan'an Absalom dɛna sabeeo! 32David n ta paɛ zoore la saazuo ha la, zen'an te ba po'oha Yenɛ bini la, te Husai Arkdoma boraa, n bala paara na, te a fuo aanhom, te tentɔnɔ yeele a zuo. 33David yele en yeti, Ho han yeti ho dɔla mam, ho wan dɛna zeero bo mam. 34Ge ho han ton lebe kule yire, ta yele Absalom yeti, n wan dɛna ho tontona wo mam n pon dɛna ho sɔ tontona se'em la, la n tona bɔ'ɔra hɔ, bala wan bahɛ te n baŋɛ Ahitopel n tare kan'aŋɔ seko bɔ'ɔra Absalom. 35Malemadaana Zadok la Abiatar wan bɔna la hɔ bini. Sɛla woo te ho wom naba yire la poan, dekɛ yele ba. 36Ba dayɔɔhe seyi' la Ahimaaz la Yonatan boe la ba bini ha. Ho han yele ba sɛla woo, ba wan bahɛ te n toberɛ wom. 37Bala te David zɔ, Husai, lebe kule na, kɔ'ɔn paara teŋa la poan na, te Absalom me n bala kɛn'ɛra Yerusalem teŋa poan na.

will be added

X\