2 Samuel 12

1Te Na'ayenɛ la tom a nɔtɔgɔha Natan David zen'an. Te Natan wa'an David zen'an na yele en yeti, Boraahe seyi' n boe teŋa kayema poan, te kayema la dɛna dakanrɛ, te kayema la dɛna naha. 2Dakanrɛ la tare piihe la nii kekeko, 3te naha la me ka tara sɛsɛla, pebila koyena ma'an te a da' te ko bɔna la en. A lagom zɔ'ɔra la naha la a kɔma, dita laa sɛka poan te naha la dita la, ge nyuura wanɛ se'ere poan te naha la nyuura la ge naɛ la en gan'an wo ko dela a pɔyɔa la. 4Saana ta wa'an dakanrɛ la yire na, te a ka bɔta te a nyɔkɛ a pehego la bii a nahɔ boyema dogɛ saana la n wa'an a zen'an na la, ge ton nyɔkɛ naha la pehego la dogɛ bo saana la n wa'an a zen'an na la. 5David sunsunya nyie la dakanrɛ la n eŋɛ se'em la, te a yele Natan yeti, Mam pɔ' Na'ayenɛ wa n boe wa te boraa kana kɔ'ɔn dɛna la ka ki. 6La dela a lebehe yɔ pebila la sugumnɔɔren bonaahe lebehe, la en pon ka zɔta ninbɔn'ɔn ge eŋɛ se'em la. 7Natan nya yele David yeti, Hom n de boraa la. Te Na'ayenɛ Israel Yenɛ la yeti ya, mam sɔ' hɔ la kaam te ho dɛna Israel zan'an naba ge le fan' hɔ Saul nu'uhen. 8Mam n to'e ho daana Saul yire bo ho, ge dekɛ a pɔgɔba zan'an eŋɛ ho nu'uhen. Mam dekɛ Israel la Yuda yiya eŋɛ ho nu'uhen. Bala han pon kelom ka seke ne ho, n wan pa'ahɛ ne hɔ. 9Bene n sɔe, te ho zagahɛ Na'ayenɛ la yelehom la, ge tom sɛla n ka ane soŋa a nɛŋan? Ho ko Hiti boraa Uria wa mɛ la so'a, ge sɔe di a pɔga te ka dɛna ho pɔga. Ho ko en la Ammondoma so'a. 10Bala zuo la, so'a kan malom bahɛ ho yire wa, la hom n zagahɛ mam la zuo. Ge ho di Hiti boraa Uria pɔga te ka dɛna ho pɔga la. 11Na'ayenɛ la yeti, N wan maahom daaŋɔ ho mea yire poan te ko daam hɔ. Ge te n faanra ho pɔgɔba la, bɔ'ɔra nɛrese'em n kpɛ' la hɔ la, te a tara se gan'an ho nini. 12Hom sogɛ mɛ eŋɛ, ge mam wan tom dena wa la wontɛɛŋpeelega wa poan. 13Te David yele Natan yeti, Mam tom be'em Na'ayenɛ la nɛŋan. Te Natan lebehe yele en yeti, Nananawa, Na'ayenɛ la bahɛ ho be'em la, ho kan le ki. 14Ge la kelom dɛna la yoo, ho kɛhɛ Na'ayenɛ la mɛ la toondena wa te ho tom wa, bisɛka te pɔka la dɔgɛ la ho la wan ki. 15Natan n lebe kule, te Na'ayenɛ la bahɛ te la leen ŋmɛ' bisɛka te Uria pɔga dɔgɛ la David la, te ka bɛn' ta gaŋɛ. 16David belom Yenɛ la bia la zuo zagahɛ a mɛŋa gan'an teŋa yu'uŋɔ la poan ta yelegɛ beere. 17Te a yire keendoma la lagahɛ na zɛ'a la en, bɛlona en te a ihege en gan' teŋa la, te a zagahɛ, ge me kan di dia la ba. 18Dabeha ayopɔe daarɛ la, te bia la ki. David tontoneba la zɔta dabeem la ba yele en te bia la ki mɛ, ge yele ba mɛhe yeti, bia wa n daa nan vɔe la, to han ne tɔgɛ bo en, a ka kelehe to, nya bii bia la n ki? Te han yele en, a ta'an pɔgɔlom a mɛŋa. 19David n wom te a tontoneba la waahena la taaba la, te a baŋɛ te bia la ki mɛ. Te a soke ba la yeti, Bia la ki mɛ? Te ba lebehe yeti, Ɛɛn, ka ki mɛ. 20Te David vaɛ ihege saazuo, keŋɛ ta sɔ a iŋa, son kaam tee a lɔgɔrɔ yɛ'. A nya keŋɛ ta kɛn' Na'ayenɛ yire la poan, po'ohɛ, ge yehe kule a mɛŋa yire, ta soke te ba tare dia na ze'ele en te a di. 21A tontoneba la yele en yeti, Ho eŋɛ la wane n bala wa? Bia wa n daa vɔe la, hom daa zagahɛ ho mɛŋa ge kaaha, te ka nan ki te ho ihege ton di? 22A lebehe yele ba yeti, Bia la n daa nan vɔe la, te mam daa zagahɛ n mɛŋa ge kaaha te daanse'ere Na'ayenɛ la wan zɔ n ninbɔn'ɔn, te bia la da ki. 23Ge bia la ki ya, n zagahɛ mɛŋa la le dɛna la dene? N wan ta'an le tare ka lebe me na yoi? Mam n wan keŋɛ kaŋa zen'an, ge kaŋa kan le lebe mam zen'an na. 24David nya sugulom a pɔga Batseba, te David le ta nɛ ka soŋɛ, te ka yee sea. Ta dɔgɛ bodibila, te David segɛ ka yu'urɛ Solomon. Te Na'ayenɛ la nɔŋɛ bodibila la, 25ge bo a nɔtɔgɔha Natan a yelehom, te a wa'ana segɛ bia la yu'urɛ Yedidia. 26Bala ma'an te Yoab zabera la Ammondoma teŋa Araba nyaŋɛ ba teŋkantɛ la. 27Yoab nya tom nɛreba David zen'an na yeti, Mam zabɛ nyaŋɛ Araba teŋa la, ge nyaŋɛ to'e ba ko'om teŋa la me. 28Bala, lagahɛ pɛɛntɛɛnreba n boe la ho la, la ho keŋɛ zabɛ to'e teŋa la. Ge han dagana bala ge te mam keŋɛ ta zabɛ to'e ka, mam wan dekɛ n yu'urɛ segɛ ka. 29Bala te David lagahɛ pɛɛntɛɛnreba sɛba n yee la, keŋɛ ta zabɛ la Araba teŋa la, to'e ka, 30ge vuke naba muŋa la a zuin. Ka tebehom dɛna sanlema bɔɔrega, ge te ba dekɛ sanlenkuga maalɛ ka. Te ba tee dekɛ ka vuge David zuo. David vaɛ teŋa la poan lɔgɔrɔ n zo'e tare na, 31ge nya vaɛ teŋa la nɛreba te ba tona la so'ahe la kuto kunya la kuto leehe, ŋmɛ'ɛra birikihe nyɔ'ɔra. En eŋɛ Ammondoma wa ba teŋhe la woo poan n bala. Ge te David la a nɛreba la lebe kule Yerusalem na.

will be added

X\