2 Samuel 10

1Le yɛ'ɛha te Ammon naba Nahas wa ki' te a dayɔa Hanun wa soe di na'am la. 2David tɛn'ɛhe yeti, N wan eŋɛ naba Nahas dayɔa Hanun wa soŋa wo a sɔ n yuun ete mam soŋa se'em la. Bala te David tom nɛreba te ba ta po'ohɛ naba Hanun, a sɔ kum la. David nɛreba la n ta kɛn' Ammondoma teŋa poan na la, 3te Ammon nabibihe yele ba daana Hanun yeti, Ho tɛn'ɛhe te la dela ho sɔ kum wa te David ton kooma wa? Aai, la dagɛ bala, a tom ba kalam na te ba ɛ kae behɛ ge sa'ɛ tɔ to teŋa wa poan. 4Te Hanun bahɛ te nɛreba gin' David nɛreba wa siie ba tɛɛhe, ge toonhɛ ba futo la sea beene, ge sa'ɛ ba te ba keŋɛ. 5La daa de vi' bo ba la ba lebe kule, te David daa ta wom ba eŋɛ a yamehe la se'em la, te a bo nɔɔrɛ te ba yee Yeriko teŋa poan gura te ba tɛɛhe la puhe. 6Ammondoma la n daa baŋɛ te ba ka eŋɛ David soŋa la, ba yɔ Aram teŋa pɛɛntɛɛnreba tuha pihiyi' n kɛn'ɛra Bet Arehob la Zoba, pa'ahɛ Maaka naba la a boraahe tuhure la Tob boraahe tuha pia la ayi' te ba soŋe ba. 7David n wom bala la, a tom Yoab la a pɛɛntɛɛnreba la zan'an te ba keŋɛ. 8Te Ammondoma la me maahom yehe na zɛ'a nayaŋa sɛka n dole kɛn'ɛra ba teŋa la poan la, ge te Aram pɛɛntɛɛnreba la n kɛn'ɛra Zoba la Arehob la Tob la Maaka teŋhe poan la me maahom ba mɛŋa bɔna teŋa la pooren ha. 9Yoab daa nyɛ te pɛɛntɛɛnreba la ze' la ba nɛŋa la pooren zan'an la, te a loe la Israel kansaŋehe te ba tole zabɛ la Aramdoma. 10A yele a sɔɔn Abisai la pɛɛntɛɛnreba te ba tole to'ohɛ Ammondoma wa. 11Yoab yele a sɔɔn wa te, Aramdoma la han kpe'em gana mam, ho wa soŋe mam. Ge te Ammondoma la me han kpe'em gana hɔ mam me wa soŋe hɔ. 12Kpe'em ya mɛ te to zabɛ nyaŋɛ to'e to nɛreba wa la teŋa wa n de Yenɛ denɛ wa. Na'ayenɛ wan tom sɛla n wan tigɛ a nini. 13Te Yoab la a pɛɛntɛɛnreba zabɛ nyaŋɛ Aramdoma la te ba zɔ a zen'an. 14Ammondoma n nyɛ te Aramdoma la zɔ mɛ, ba zɔ la a sɔɔn Abisai nɛŋan ta kɛn' teŋa la poan. Yoab bahɛ enŋa la Ammondoma zabere la ge lebe Yerusalem na. 15Aramdoma wa n baŋɛ te Israel nyaŋɛ ba mɛ la, te ba kan'ahɛ ba mea lagom taaba. 16Hadadezer tom yi' Aramdoma sɛba n boe Euprates Kolaa la yakenɛ deyema ha la na, te ba wa'ana tiihom Helam teŋa te Sobak n de Hadadezer pɛɛntɛɛnreba la nɛŋadaana bɔna ba woo nɛŋa. 17David n ta wom bala la, te a lagahɛ Israel pɛɛntɛɛnreba la zan'an, bɔna nɛŋa a mɛŋa, te ba yakɛ Yordan Kolaa kɛn' Helam teŋa la poan na. Te Aramdoma maahom yehe wa zabɛ la David. 18Ge la mɔ'ɛ Aramdoma wa, te ba zɔ mɛlom Israel buuri wa nɛŋan, te David la a nɛreba la ko Aram basɛba n tukure yiri toroto poan zabera la kɔbehe seyopɔe, ge ko sɛba me n kene na'ma zabera la me tuha pihinaahe, ge pɔgɔlom Sobak n de Hadadezer zaba nɛŋadaana la, te a ki. 19Nadoma sɛba woo n boe Hadadezer nu'uhen la n baŋɛ te Israel buuri la nyaŋɛ ba mɛ la, te ba keŋɛ ta dekɛ mɛŋa eŋɛ Israel nu'uhen, dɛna ba yamehe. Yehe bilam yɛ'ɛha, Aramdoma wa ka le sakera te ba le soŋɛ Ammondoma wa se'ere poan le yɛ'ɛha.

will be added

X\