2 Samuel 1

1Ban ko' Saul zaberɛ poan la te David n keŋɛ te zabɛ nyaŋɛ Amalekdoma la lebena na la, David wa'ana yee la Ziklag teŋai dabeha ayi'. 2Dabeha atan' daarɛ la, te boraa kayema ze'ele Saul tigihego la poan wa'ana la a fu'anhena te tentɔnɔ yeele en a zuo. En keŋɛ na paɛ David zen'an, a lu la teŋa na'ahɛ en. 3David soke en yeti, Hom ze'ele la bɛha na? Te a lebehe yeti, Mam peɛn la Israeldoma tiiheŋɔ la poan zɔ na. 4Te David soke en yeti, La ane la wane bini ha? Te a lebehe yeti, Tomam pɛɛntɛɛnreba la zan'an zɔ zaberɛ la poan mɛ, te to boraahe la zo'e zo'e ki. Saul la a dayɔa Yonatan lagom ki mɛ. 5David soke en yeti, Hom eŋɛ la wane baŋɛ te Saul, la Yonatan ki mɛ? 6A lebehe yeti, Mam yage la Gilboa zoore la zuo, ge nyɛ diŋdoma zaba yiri toroto, la i ban'areba n pɔnre Saul, te a mɛŋa dekɛ a kanɛ lo' a mɛŋa lu gan'an. 7En nya ŋmɛregɛ nyɛ mam, yi' mam, te mam sakɛ, 8te a soke mam yeti, hom dela ane? Te mam lebehe yele en yeti, mam dela Amalek nɛra. 9A yele mam yeti, wa'an ka'lam na la ba'ahɛ mam, ge n pon ba'ahɛ mɛ ge ka kiira. 10Bala te n keŋɛ paɛ ko' en. Se'ere n sɔe la, mam mi' te a pon kan le vo'e. N nya vuke muŋa sɛka te a vuge la baŋa la n pire a nu'en la tare na te n bo hom n Daana wa. 11David nya aanhom a lɔgɔrɔ la sunsagaŋɔ te a boraahe la woo me eŋɛ bala mea. 12Ba kele ge zagahɛ ba mɛhe tara tara la zanɔɔrɛ bo Saul la a dayɔa Yonatan la Na'ayenɛ pɛɛntɛɛnreba la Israel nɛreba la zan'an n wom te ba zo'e zo'e ki mɛ la zuo. 13David soke boraa wa n wa'ana yele en sɛla n eŋɛ wa yeti, Hom yehe la bɛha na? Te a lebehe yeti, Mam dela Amalek teŋa nɛra ge kɛn'ɛra ya teŋa wa. 14David soke en yeti, Dabeem ka tare hɔ la hom zɛnkɛ ho nu'o kalom se'em te Na'ayenɛ la sɔ' la? 15A nya yi a boraahe la kayema, yele en yeti, Wa'ana ŋmɛ' en! Te boraa la wa'ana ŋmɛ' Amalek boraa wa, te ka lu teŋa ki. 16David yeti, Ho taala dɔla hɔ! Ho mea nɔɔrɛ n ya'ɛ yeti hom n ko se'em te Na'ayenɛ la sɔ' la. 17Te David yoon fabelegɔ yoonɛ dena wa bo Saul la a dayɔa Yonatan. 18A bo nɔɔrɛ te Yuda nɛreba zamehɛ fabelegɔ yoonɛ wa ge de golehɛ eŋɛ la Yasar Gɔŋɔ la poan. 19Israel soŋa la n bala kɔrom gan'an ho zen'kanra la poan la! Behɛ bonkpe'eŋo la n lu se'em! 20Da tɔgɛ de yele Gat teŋa poan bii Askelon sɔrɔtɔ la zuo wom dɛ. La wan dɛna nyeema bo Pilistia teŋa pɔyɔɔhe. Da bahɛ ya te baga kaanbereba pɔyɔɔhe wa wa'. 21Gilboa zɔya wa, da bahɛ te mɛgelom bii saa ni ho zuo le yɛ'ɛha bii ho tara samana soma. Ba ganlom panhedoma zaba zabɛ te'elega la la bilam, Saul zaba tɛ'ɛlega la n sɔn' la kaam la, ka le bɔna. 22Ziim ka'ahegɔ la panhedoma kɔrɔŋɔ poan, Yonatan pɛɛma ka lute teŋa bii Saul so'a foe zaŋa. 23Saul la Yonatan n daa vɔe la nɛreba la daa nɔŋɛ ba mɛ. Ban daa pon ta ki la, ba ka yelege ba mɛhe ba zen'en. Ba daa korehe gana yebehe, kpe'em gana gbegema. 24Israel pɔyɔɔhe wa, kele ya Saul zuo. Enŋa n daa yɛɛle ya la lɔgɔsonɔ te la sekera te vɔ'ɔha fai. 25Behɛ bonkpe'eŋo la n lu se'em pɛɛnbɔn'ɔn poan! Yonatan n bala te ba kɔrɔgɛ biŋe ho zen'kantɛ poan la. 26La daam mam gaŋɛ la ho kum wa, Yonatan. Ho daa tare la nɔŋerɛ n ka tare makerɛ bɔ'ɔra mam. De gane pɔka n tare nɔŋerɛ se'ere bɔ'ɔra ka sera. 27Behɛ bonkpe'eŋo la n lu se'em! Te zaba pɛɛma yeregɛ!

will be added

X\