2 Pɩyɛɛrɩ 3

1Ge n zɔ'sonɔ wa, gɔŋkona wa nya pa'ahɛ la n gɔnɔ toyi' n bala te n golehɛ bo ya wa. N gɔnɔ toyi' mea zan'an la, n kpeŋe n mɛŋa mɛ golehɛ bo ya te ya tɛn'ɛhɛ mɛ soŋa soŋa yɛhera la yelese'a n de yelemɛŋɛrɛ la. 2N bote ya tɛnra la yetɔgom sebo te Na'ayenɛ nɔtɔgɔheba sɛba n yuun boe bo enŋa Na'ayenɛ ma'an yuun tɔgɛ yuuma yuuma ha la. Ya me le kelom tɛnra to Daana la to Faanra Yesu Krista n daa bo a nɔɔrɛ la se'em la. La dela a tontoneba la n tone bɔ'ɔra ya la n daa yele ya a nɔɔrɛ la n de se'em la. 3Ge yia poan, la sontii ya mina te teŋa wa zuo dabeha la han ta pɔnra ba'ahegɔ, nɛreba basɛba wan wa'ana. Ba han wa'an bala na, ba yete ba bɔna la bɔŋsɛka taaba te ba mɛhe potɛn'ɛra tɛn'ɛha bɔta. Ba me wan la'ara ya, 4ge yɛta te, Yesu biŋe a nɔɔrɛ mɛ te enŋa wan lebe na? Te a nya bɛɛ? To sɔyaabdoma pon ki', ge te sɛla nan kelom ka eŋɛ. Sɛla woo kelom ana wo Na'ayenɛ n yuun naam teŋa wa zuo te la yuun pon ana se'em la. 5Ge ba zagahɛ mɛ ka bɔta ba te'ɛn te Na'ayenɛ yuun yele la yelehom ma'an naam saazuo la teŋa wa zuo. Na'ayenɛ yuun naam teŋa wa zuo yɛhera la ko'om poan ge me yuun bahɛ te ko'om kae dɛ bahɛ teŋasoka. 6Gee te la yuun da le dela ko'om te Na'ayenɛ yuun dekɛ sagom teŋa wa zuo. Ko'bona dela ko'om sebo n yuun libe sɛla woo la. 7Ge Na'ayenɛ yelehom bomɔ mea n kelom bala te a maahom na sɛla woo nya boe teŋa wa zuo la saazuo te a ta sagom la bugum. A maahom ne bala gura la daanse'ere daarɛ te a ta gankera nɛresɛba n ka zote Yenɛ la. A han gankɛ ba ba'ahɛ a nya yete a sagom ba mɛ. 8Ge n zɔ'sonɔ wa, da tamɛ ya yele dena wa ma'an wa. De dela to Daana Na'ayenɛ zen'en, dayenɛ la yuun tuhure zan'an dela boyena bo en. Ba bayi' la zan'an ka tare yelehego bo en. 9Ge nɛreba basɛba tɛn'ɛhɛ te to Daana Na'ayenɛ gu'une sɛla te a biŋe a nɔɔrɛ te a eŋɛ la mɛ. Ge a ka gu'une de poan. Ge dene de se'ere dela a ton din'inha la suunre la ya. Se'ere n sɔe la, a ka bote se'em sagom. Ge a bote la nɛra woo tee a potɛn'ɛrɛ a be'emtooma poan. 10Ge daanse'ere daarɛ te to Daana Yesu lɛbera na la yete de ana me wo nayiga kena la. Ge de daarɛ vole wan vɔɔla saazuo ha te saazuo ha la mɛlom. Sɛla woo saŋgbanɛ zuo ha la wan di' la bugum sagom, ge te teŋa wa zuo la sɛla woo n boe bini la me wan mɛlom. 11Dene poan yele ana wa woo n yete a sagom se'em n bala. Te de han de'a bala, ya tɛn'ɛhe te nɛrebama taaba te la sona te yamam dɛna? Ya bɔna, ya vɔna toolom vom, ge kaanbe ya mɛhe bo Yenɛ. 12Wo yan gure Yenɛ dabaherɛ kpeŋe ya ya mɛhe ge bahɛ te de wa'an kalam kalam na. Te daanden daarɛ mea, sɛla woo n boe saŋgbanɛ zuo ha wan di' la bugum sagom ge te sɛla woo n me boe bini ha la, wɔlɔgɔ me wan nyɛlegɛ ba. 13Ge to mam gure la sɛla te Na'ayenɛ biŋe a nɔɔrɛ te a eŋɛ la. Sɛla te a biŋe a nɔɔrɛ te a eŋɛ la dela a yete a maan naam la saazuo paalega la teŋa wa zuo paalega. Bilam te tontɔɔ bɔŋa wan bɔna. 14Dene poan, n zɔ'sonɔ wa, yan gure de daarɛ mea la, kpeŋe ya mɛhe la ya da bɔna dɛngerɔ bɔŋa poan ge me da tara tuure Na'ayenɛ nɛŋa, ge me tara ya sunma'ahom la en. 15To Daana n din'inhe suunre ge ka lebe tɔtɔ tɔtɔ na la dela a bote ya baŋɛ mɛ te a bo nɛreba sore te ba ta'an tee ba potɛn'ɛra ge nyɛ' faanrɛ gee te a baŋɛ lebe na. Te la de'a la boyena mea n bala, te to sɔɔnsoŋa Paul daa tara yam sebo te Na'ayenɛ bo en te a daa golehɛ bo ya. 16A han ta goleha a gɔnɔ la woo yɛhera yele dena wa, a tɔgɔre la yele ana me. Ge yɛla a se'a boe a gɔnɔ la poan te a bɔkerɛ kpeem te nɛreba basɛba yete bama pa'ale la a vɔnrɛ, ge te la me dagana lan bala. Ba ete la Yenɛ gɔŋɔ la zen'en sese'ehe n gee la bala mea. Nɛrebana wa dela sɛba n ka mi' sɛla ge me tara potɛn'ɛra ayi' ayi' la sɛla te ba sakɛ bo. Bala, ba ete la sɛla n yete la sagom ba mɛŋa. 17Ge la han dɛna yamam n zɔdoma wa, yamam pon mina dena wa mɛ. Bala, tare ya ya mɛhe soŋa soŋa te nɛresɛba n dagɛ yelemɛŋɛrɛdoma wa da bahɛ ya te ya tue kan bɔna zen'sɛka te ya nyɛ' faanra wa. 18Ge ton kelom zo'ore ya mɛ yɛhera Na'ayenɛ zo'ohogɔ la a mi'ilom la poan, la ya sakerɛ to Daana la to Faanra Yesu Krista poan. Enŋa Yesu wan nyɛ' pɛnka nananawa ge me wan kelom nyɛta bala wuuha. Taarɛ.

will be added

X\