2 Pɩyɛɛrɩ 1

1Mam Simon Peter se'em n de yameŋa la Yesu tontoneba la ayema la n golehɛ gɔŋɔ wa. N golehɛ bɔ'ɔra la yamam sɛba sakerɛ Yesu sore dɔlɔga la poan n ka tara makerɛ wo tomam me sakerɛ a sore dɔlɔga la poan n ka tare makerɛ se'em la. De dela ya sakerɛ Na'ayenɛ se'em n de yelemɛŋɛrɛdaana la to faanra Yesu Krista poan. 2Na'ayenɛ wan eŋɛ ya som ge bahɛ te ya tara sunma'ahom yɛhera ya mi'ilom enŋa Na'ayenɛ la to Daana Yesu sore dɔlɔga la poan. 3Ge Na'ayenɛ paŋsɛka n gane zan'an la bahɛ tɔ te to tara sɛla woo n nare to tara la to ta'an bɔna yelemɛŋɛrɛ bɔŋa poan. Dena wa me de bala yɛhera la to mi'ilom se'emdaana n yi' to te to lagom nyɛ' pɛngɛsɛka taaba te a nyɛta la la som sebo taaba te a me tara la. 4La dela dena mea poan te a bo to bo'olom sebo n gane zan'an, gee me ka tara makerɛ la te a biŋe a nɔɔrɛ te a bo to la. A eŋɛ bala te bo'olom la poan, ya wan ta ta'an yehe ya mea yelese'a n boe teŋa wa zuo de'a be'em, ge tara sagaŋɔ kena na la. Ya han yehe ya mea bala, ya wan lagom ana wo enŋɛ mea n an se'em la. 5Dena mea zuo, kpeŋe ya ya mɛhe la ya eta sɛla n ane soŋa pa'ahɛ ya sakerɛ la poan. Ya han eŋɛ bala, dekɛ ya yan mi' Na'ayenɛ se'em la pa'ahɛ ya toonsoma la poan. 6Ya han eŋɛ dene me, de ya sɛba n wan tara ya ya mɛhe soŋa soŋa, ge me ŋmebere ya yelese'ere woo poan. Ya han ŋmebera bala, nya bone ya bɔŋsɛka n de yelemɛŋɛrɛ bɔŋa, 7Ge ete ya sɛla n ane soŋa bɔ'ɔra taaba wo sɔɔnrɔ. Ya han eta bala, la nya sontii ya tare ya nɔŋerɛ ya sunya poan. 8Yele ana wa n de yelese'a n nare ya eta. Ya han eta yele ana wa, la wan bahɛ te ya maan sɛ' ze'ele soŋa soŋa ya mi'ilom to Daana Yesu Krista sore dɔlɔga la poan. 9Ge se'em n ka ete yele ana wa ane wo se'em n fɔ' ka nyɛta a nɛŋa la. A daana ka nyɛte, ge me le tamɛ te Na'ayenɛ pon bahɛ a yelebe'seto te a daa tom yia saŋa la bo en mɛ. 10Dene poan, n sɔɔnrɔ wa, Na'ayenɛ n de se'em n yi' ya ge me loe ya te ya dɛna a nɛreba. Ge la dela yamam te ya teregɛ la ya bɔna bala. Te ya han ana bala, ya kan malom vihe lebe ta bɔna bɔŋsɛka taaba. 11Dena poan, te ya wan ta ta'an bɔna zen'an te to Daana Yesu Krista se'em n de to faanra ta sɔna behera wuuha la. 12Yele ana mea zuo, n wan tɛnra ya daarɛ woo. Mam mi' te ya pon mina a, ge me sɛ' ze'ele soŋa soŋa yɛhera yelemɛŋɛrɛ la te ya sakɛ bo la. Ge bala zan'an, n sine ge kelom tɛnra ya mɛ. 13Mam tɛn'ɛhɛ dɛ te la dela ma'an te n bahɛ ya te ya tɛnra yele ana gura n kum. 14Mam me mi' te la kan yu'ɛ ge te n ki' wo to Daana Yesu Krista n daa pon yele mam la yelemɛŋɛrɛ se'em la. 15Bala, n wan kpeŋe n mea ge golehɛ gɔŋɔ wa bo ya na te ko tɛnra ya yele ana n han pon ta ki'. 16Ge la dagɛ la sɔlema te tomam dekɛ pa'alɛ ya te to Daana Yesu Krista yeti a lebe me na la paŋa. Ge la dela tomam mɛhe nyɛ' la to nini a paŋa la n zone se'em mɛ. 17To daa bo bini nyɛ' to Sɔ' Na'ayenɛ n daa bahɛ te a nyɛ' pɛnka la na'ahegɔ la. To daa le kelom wom Na'ayenɛ se'em n gane zan'an, ge me tara pɛnka n daa ta yi' na la. A daa yi' na yeti, Mam dayɔba'arɛ n wana te mam suunre kɛn'. 18Tomam mɛhe n daa wom yikana wa saazuo ha ton daa boe la Yesu Yenɛ toolom zoore la zuo. 19Bala to mi' soŋa soŋa to suunre poan te nɔtɔgɔheba n mɔɔlɛ yelesoma la se'em la seren dela yelemɛŋɛrɛ. Dene poan, ya sontii ya kpe'eŋe ya mɛhe, ge kelehe de soŋa soŋa. Te, magahɛ wo butolela n nɛɛre lika poan se'em la. Bala me, te Na'ayenɛ yetɔgom la me pa'ala tɔ yelemɛŋɛrɛ zen'en. De me wan ana bala gura te daanse'ere daarɛ te ya wan ta baŋɛ soŋa soŋa ya suunre poan te la dela Yesu n nɛɛre na wo belomŋma'arɛ n nɛɛre se'em la. 20Ge sɛla n gane zan'an te ya wan tɛnra dela dena wa. Te se'em ka boe n wan ta'an tɔgɛ a mɛŋa te nɛreba bɔkɛ yelese'ere te Na'ayenɛ nɔtɔgɔha golehɛ Yenɛ gɔŋɔ la. 21Se'ere n sɔe la, Na'ayenɛ n daa bahɛ te a nɔtɔgɔheba tɔgɛ yetɔgom sebo la dagɛ la sɛla te asaala mɛŋa tɛn'ɛhɛ tɔgɔra. Ge la daa dela Na'ayenɛ Sea la n daa pa'alɛ ba a yetɔgom la, ge daa bahɛ ba te ba mɔɔla dɛ.

will be added

X\