2 Nadoma 8

1Te Elisa n daa ta yele Sunem pɔgɔsɛka bia te a vo'e la yeti, Nɔgɛ la ho yire nɛreba wa keŋɛ zen'sɛka woo te ho bɔta. Se'ere n sɔe, Na'ayenɛ tom la kom bahɛ teŋkana wa zuo na. Kom la wan sige ka zuo paɛ yuuma ayopɔe. 2Pɔka wa seren eŋɛ wo Yenɛ nɛra wa en yele en se'em la. A nɔgɛ la a yiredoma ta kɛn'ɛra Pilistidoma teŋa, tara tara la yuuma ayopɔe. 3Yuuma ayopɔe la n ta ba'ahɛ la, te pɔka la ze'ele Pilistia teŋa la poan lebe na, nya keŋɛ te a ta fabelɛ bo naba ge to'e ka yire la ka samanɛ. 4Bala ma'an la te naba la tɔgɔre mɛ la Elisa yameŋa Gehazi yeti, Yele mam toonkanra se'a woo te Elisa tom la. 5Gehazi n boe bini yɛta naba la Elisa n vo'e nɛra kum poan se'em la, te pɔgɔsɛka bia te a vo'e la en bala paɛ na yɛta naba ka yire la ka samanɛ yele. Te Gehazi yeti, N daana naba, pɔka la n wana. Ka dayɔa la n me wana te a vo'e ka la. 6Naba la soke pɔka la, te ka yele en. Te naba la loe yameŋa bo pɔka la ge yeti, To'e sɛla woo n de ka denɛ bo ka, ka samanɛ la ka samanɛ la n nyɛ sɛla yuuma ayopɔe la zan'an, pɔhɛ ka yɛhega daarɛ la ta paɛ zina wa la bo ka. 7Elisa ta keŋɛ la Damaskus teŋa, bala ma'an te Aram naba Ben Hadad bɛn'ɛnre mɛ. Te ban ta yele naba wa te Yenɛ nɛra la wa'an ka'lam na, 8te naba wa yele Hazael yeti, Behɛ bo'olom, la ho to'ohɛ Yenɛ nɛra wa. Soke a zen'an behɛ nya n wa ihege n ban'an wa poan? 9Hazael ihege ganhɛ Damaskus lɔgɔsonɔ woo poan lɔkɔ lɔkɔ, te yogoma pihinaahe zi yɛ'a Elisa zen'an. Ta paɛ kɛn' dɔnbelɛ a nɛŋan yele Elisa yeti, Ho dayɔa naba Ben Hadad n de Aram naba la n tom mam ho zen'an na, te a baŋɛ a wan ihege a ban'an wa poan? 10Elisa yele en yeti, Ta yele en yeti a wan ihege, ge Na'ayenɛ pon lilige pa'alɛ mam te a wan pon ki. 11Elisa yare beha Hazael ziin, te valom ta nyɔkɛ en, te la bahɛ te Elisa kele. 12Hazael soke yeti, N daana bene te ho kɛla? Elisa lebehe Hazael yeti, Mam nyɛte la be'em sebo te ho wan eŋɛ Israel nɛreba wa. Ho wan nyɔ' ba paŋa yiya wa mɛ la bugum, kɔrom ba bodibinpaalehe, nyɔkɛ ba kɔma fɔnbɛ ba aanhom zoɔnra zoɔnra, ge larom ba pɔgɔpoohedoma. 13Hazael yeti, Mam ho yameŋa wa n de baa wa dela ane wan ta'an tom toonkantɛ bona? Elisa lebehe en yeti, Na'ayenɛ n lilige pa'alɛ mam te hom yeti ho dɛna Aram teŋa wa naba. 14Hazael nya bahɛ Elisa lebe a daana Ben Hadad zen'an. Te naba ta soke en yeti, Elisa la yeti bo? Te Hazael lerege yeti, A yeti ho ihegere mɛ. 15Ge yiimbeere, te a pakɛ futebehegɔ la gɔrɔgɔ la zuo, buhe ko ko'omen, yaɛ na dekɛ pin naba la nɛŋa te naba la ki. Te Hazael nya sɔe a na'arɛ dɛna naba. 16Ahab dayɔa Yoram n wa di Israel na'am beha Israel teŋa la, a yuuma anuu poan, te Yuda teŋa naba Yehosapat dayɔa Yehoram me pɔhɛ di na'am beha Yuda teŋa. 17Yehoram wa dɛna la yuuma pihitan' la ayi' ge di na'am la, zin'an Yerusalem teŋa poan behɛ teŋa la yuuma anii. 18Te a nɛ Israel nadoma la woo etegɔ la nataka, wo Ahab yire etegɔ la. Se'ere n sɔe la, a pɔga dela Ahab pɔyɔa. Te a tom be'em Na'ayenɛ nɛŋan. 19Ge la bala zan'an, Na'ayenɛ kan sagom Yuda teŋa la, doohe la a nɔbiŋere la te a biŋe la a yameŋa David te a wan bo enŋa la a yaahe na'am la zuo. 20Yehoram saŋa la poan, te Edom teŋa doma zagahɛ te Yuda teŋa kan le sɔna bama ge me loe ba mɛŋa naba. 21Te Yehoram maahom a zaba yiri toroto, yakɛ Zair teŋa. Yu'uŋɔ te a ta ihege, kɔ zaberɛ la Edomdoma la ba zaba yiri toroto kpɛ'ɛndoma la en kae en bahɛ teŋasoka la, ge a pɛɛntɛɛnreba la ta zɔ kule. 22Edomdoma n yehe ba mɛhe Yuda nu'uhen se'em n bala tara tara la zina. Libna teŋa me yehe ba mɛŋa. 23Yehoram tooma la sɛla woo te a eŋɛ la golehɛ eŋɛ la Yuda nadoma yɛla gɔŋɔ la poan. 24Yehoram ta kule paɛ a yaabdoma, te ba pin' en a sɔyaabdoma n pin' zen'an la, David Teŋa la poan, te a dayɔa Ahazia sɔe a na'arɛ dɛna naba. 25Ahab dayɔa Yoram Israel na'am dia yuuma pia, la ayi' poan, te Yehoram dayɔa Ahazia di Yuda na'am. 26Ahazia ta dɛna la yuuma pihiyi' la ayi', ge di na'am la, behɛ teŋa la yuunɛ ma'an Yerusalem poan. A ma yu'urɛ dela Ataliah, dɛna Israel naba Omri yaaŋa. 27Ahazia wa nɛ Ahab yiredoma etegɔ la nataka, tona be'em Na'ayenɛ nɛŋan wo Ahab yiredoma la. Se'ere n sɔe la, a dɛɛma n de Ahab. 28Ahazia doohe la Ahab dayɔa Yoram n zaberɛ la Aram teŋa naba Hazael keŋɛ Aramot Gilead bɔn'ɔn la poan. Te Aram pɛɛntɛɛnreba la ta pɔgɔlom Yoram, 29te Yoram lebe Yezreel teŋa na te a tebɛ a pɔgɔloŋɔ la te Aram teŋa pɛɛntɛɛnreba ta pɔgɔlom en, enŋa la Aram naba Hazael n daa zaberɛ Aramah poan la. Te Yehoram dayɔa Ahazia n de Yuda naba la keŋɛ Yezreel teŋa te a ta behɛ Ahab dayɔa Yoram pɔgɔloŋɔ la.

will be added

X\