2 Nadoma 5

1Naaman dela Aram naba zaba nɛŋadaana, dɛna nɛrekantɛ, tara zuo a daana wa nɛŋan. Se'ere n sɔe la, Naaman wa zuo te Na'ayenɛ bo Aram teŋa nyaŋerɛ. Ge boraa n de pɛɛntɛɛnra kantɛ bala mea la, ka iŋa n sagom. 2Saŋa kayema ha te Aram teŋadoma ta daa zabɛ la teŋa kayema lagom nyɔkɛ Israel pugula, te pugula wa ta dɛna Naaman wa pɔga yameŋa. 3Pugula ta yele ka kpɛ'ɛma Naaman pɔga daarɛ deyema yeti, Mam daana han keŋɛ ne nɔtɔgɔha la n boe Samaria teŋan la zen'an, a wan tebɛ ne a iŋsagaŋɔ! 4Naaman keŋɛ ta yele Aram naba Israel teŋa pugula la n yele se'em. 5Naba la yele Naaman yeti, Keŋɛ. N me wan golehɛ gɔŋɔ pa'ahɛ te ya tare ta bo Israel naba la. Te Naaman maahom dekɛ sanlenpeelega bɔɔrehe pia la sanlema kpila tuha ayoobe la fuo la ko kurega sugumnɔɔren pia. 6A nya wa'ana paɛ, tare gɔŋɔ la ta bo Israel naba, te gɔŋɔ la poan golehɛ yeti, Ho han to'e gɔŋɔ, ho mina te mam n tom n yameŋa Naaman ho zen'an na, te ho tebɛ a iŋsagaŋɔ. 7Israel naba n kaanlɛ gɔŋɔ ba'ahɛ la, a aanhom la a futo bahɛ, ge yeti, Mam dela Yenɛ, wan ta'an ko kum bii n bo vom? Te ho ihege tom sɔɔleŋa kana wa na te n tebɛ boraa wa iŋsagaŋɔ wa? Behɛ en dole sɔrɔɔ seko te a logohɛ mam! 8Yenɛ nɛra Elisa n ta wom te Israel naba aanhom la a futo la, te a tom soke naba la ha yeti, Bene zuo te ho aanhena ho futo? Bahɛ te a wa'an n zen'an na te a wan baŋɛ te nɔtɔgɔha boe Israel teŋa poan. 9Te Naaman la a yiri la a yiri toroto la wa'ana ze'ele Elisa yire zanɔɔren. 10Elisa tom nɛre na yele Naaman yeti, Keŋɛ ta muhe Yordan Kolaa la poan sugumnɔɔren boyopɔe, ge ho iŋa la wan tee, te ho nyɛ ho tebegɔ. 11Ge Naaman suunre nyie, te a gɛn' yɛ'ɛha, ge yeti, Mam tɛn'ɛhɛ ne te lan de mam la, a wan yehe ne na ze'ele yi' a Na'ayenɛ a Yenɛ la yu'urɛ la, ge kalom mam zen'an, tebɛ mam n iŋsagaŋɔ. 12Abana la Parpar kolaahe la n boe Damaskus teŋa la ko'om ka ane soŋa gana Israel teŋa wa kolehe wa zan'an ko'om me yoi? N kan ta'an ne sɔ kolose'ehe poan nyɛ n tebegɔ? Te a ŋmɛregɛ la sunsunyiim yɛ'ɛha. 13Naaman yamehe la paɛ en yeti, N sɔ, nɔtɔgɔha wa han yele ne ho te ho eŋɛ ne sɛla n kpe'em gana wana, ho kan eŋɛ ne? Bii enŋa n yeti, keŋɛ ta sɔ la ho nyɛ ho tebegɔ? 14Te Naaman sige Yordan Kolaa la poan, ta muhe ko'om la poan sugumnɔɔren boyopɔe, wo Yenɛ nɛra la n yele se'em la, nya nyɛ a tebegɔ, te a iŋa la saalom ana wo bilɛa la. 15Naaman la a nɛreba la zan'an nya tuluge lebe Yenɛ nɛra la zen'an na. A paɛ na dɔnbelɛ a nɛŋan yeti, Nananawa, mam mi' te teŋparɛ wa n gan' wa, Yenɛ ka boe zen'an, han dagana Israel teŋa wa ma'an poan. Ge n belone ho mɛ, to'e mam ho yameŋa wa n tare sɛla te n bo ho wa. 16Elisa yele en yeti, Mam pɔ' la Na'ayenɛ se'ere te mam tona bɔ'ɔra wa yeti mam kan to'e ho sɛsɛla. Te Naaman belom en wuu, te a zagahɛ te enŋa kan to'e. 17Naaman yele en yeti, Han dɛna bala, yi bahɛ te yiribonhe seyi' vaɛ teŋa tentɔnɔ ta bo mam. Se'ere n sɔe la, mam ho yameŋa wa kan la kaanbɛ nyɔ'an bo'olom bo bage se'ere, han dagana Na'ayenɛ wa. 18Ge yele yenɛ te n bɔta te Na'ayenɛ di suguru bo mam dela, n daana la ne han ta kɛn' Arimon bagarɛ zɔŋɔ la poan te a kaanbɛ, te n ne lagom kɛn' ta kpa' duma Arimon zɔŋɔ la poan, Na'ayenɛ di suguru bo mam yele dena wa poan. 19Elisa yele en yeti, Kena, sunma'ahom bo ho sore. Te Naaman keŋɛ ta zaan fiin ha, 20te Elisa yameŋa Gehazi tɛn'ɛhɛ yeti, N daana wa bahɛ Aram boraa wa la yoo, la en ka to'e a bo'olom la te a bo en la. Mam pɔ' Na'ayenɛ, te n wan dige boraa wa ta kperegɛ sɛla ka zan'an. 21Bala te Gehazi ihege dɔla Naaman poore. Naaman ta nyɛ la nɛra n zote dɔla a poore na, te a ze'ele a yiri toroko la poan ɛnkɛ sige teŋa kanbela to'oha en, ge sɔkera en yeti, Ho kenɛ la ho mɛŋa? 22Gehazi yeti, Ɛɛn. N daana n tom mam na te n yeti, te nɔtɔgɔheba bayi' n ze'ele Epraim zoore teŋa la wa'an a zen'an na. Bala, ho bo ba sanlenpeelega la bɔɔrega ge bo ba futo yɛɛhom sugumnɔɔren boyi' boyi'. 23Naaman yeti, Bahɛ te n bo ba sanlenpeelega bɔɔrehe ayi'. A belom en la bala te a ta sakɛ, te a nya lo' sanlenpeelega la bɔɔrehe seyi' poan, la futo yɛɛhom boyi' boyi' la to' a yamehe seyi', te ba bɔna nɛŋa te Gehazi dɔla. 24Ban wa'ana paɛ zoore la zuo la, te a to'e lɔgɔrɔ la kɛn' yire la poan, ge te boraahe la lebe. 25Gehazi nya kɛn' a daana Elisa zen'an. Te Elisa soke en yeti, Gehazi, hom keŋɛ la bɛha? Te a yeti, Mam ho yameŋa ka veehe zen'an. 26Ge Elisa yele en yeti, Mam ka dole ne ho mɛ saa poan, te nɛra ayema ta ze'ele a yiri toroko zuo ɛnkɛ sige to'oha ho na? Saŋkana n de ligiri la futo la kaam tiihe vatɔ la tiihe wɔla vatɔ la piihe la lɔlehe la yamehe boraahe la yamehe pɔgɔhe to'ohego? 27Wana wa zuo, Naaman iŋsagaŋɔ wa wan yee la hom la ho yaahe poan yɛ'ɛha. Bala te Gehazi iŋa sagom bilam, pelege anba anba, te a yehe Elisa zen'an keŋɛ.

will be added

X\