2 Nadoma 22

1Yosia dela yuuma anii ge dɛna naba, te a behɛ teŋa la yuuma pihitan' la deyena Yerusalem poan. A ma yu'urɛ dela Yedida n dɛna Adaiah n de Bozkat teŋa boraa la pɔyɔa. 2Yosia tooma tegɛ Na'ayenɛ nini, dɔla a sɔyaaba David n yuun dole se'em la, ka ŋmɛregera lɛbera zuɔ bii gɔbega. 3Naba Yosia na'am dia yuuma pia la anii poan te a tom Mesulam dayɔa Azalia dayɔa Sapan n de gɔŋgoloha te a keŋɛ Na'ayenɛ Yire yele en yeti, 4Keŋɛ malema nɛŋadaana Hilkia zen'an ta yele en te a kaanlɛ ligise'a woo te sɛba n behere Na'ayenɛ Yire la tɔ'ɔha nɛreba la zen'an la. 5Dekɛ i eŋɛ sɛba n behere Na'ayenɛ Yire la tooma la, te ba tara yɔɔra sɛba n boe Na'ayenɛ Yire la poan maala: 6kpa'areba la mɛteba la sɛba n mɛte kuga la. Bo te ba da' dɔɔrɔ la kuga se'a te ba ŋma la tare na malom maalɛ Na'ayenɛ Yire la. 7Ya han dekɛ ligiri la eŋɛ ba nu'uhen, da soke ya ba te ba pa'alɛ bama n dekɛ ligiri la tom se'em, ba dela birikindoma. 8Malema nɛŋadaana Hilkia wa yele Sapan n de gɔŋgoloha la yeti, Mam ɛ nyɛ Pa'alegɔ Gɔŋɔ la Na'ayenɛ Yire wa poan. A nya dekɛ gɔŋɔ la bo Sapan, te Sapan kaanlɛ gɔŋɔ la. 9Sapan nya lebe yele naba la yeti, Ho yamehe la vaɛ ligise'a woo n boe Na'ayenɛ Yire la poan la eŋɛ sɛba n behere de tooma la nu'uhen. 10A me yele naba la yeti, Malemadaana Hilkia bo mam la gɔŋɔ la. Ge te Sapan nya kaanlɛ gɔŋɔ naba nɛŋa la. 11Naba n wom Pa'alegɔ Gɔŋɔ la poan yɛla la, a aanhom la a futo bahɛ. 12A bo malemadaana Hilkia la Sapan dayɔa Ahikam la Mikaiah dayɔa Akbor la gɔŋgoloha Sapan la a mɛŋa yameŋa Asaiah nɔɔrɛ yeti, 13Keŋɛ ya ta soke Na'ayenɛ bo mam la nɛreba wa la Yuda zan'an, doohe la yelese'a n boe gɔŋɔ seko te ba nyɛ wa poan la. Se'ere n sɔe la, la pa'alɛ yeti Na'ayenɛ sunsunya n taɛ bahɛ to zuo, doohe la to yaabdoma n yuun ka nam yelese'a n boe gɔŋɔ wa poan la, ge ka tona dɔla wo lan golehɛ gɔŋɔ wa poan te to ana se'em la. 14Bala te malemadaana Hilkia la Ahikam la Akbor la Sapan la Asaiah ihege keŋɛ Hulda, pɔka n de nɔtɔgɔha, n kɛn'ɛra Yerusalem teŋa zuɔ bɔba la zen'an te ba ta soke ka behɛ. A sera dɛna Harhas dayɔa Tikva dayɔa Salum n behere naba futo biŋere zen'an. 15Te ka yele ba yeti, Na'ayenɛ Israel Yenɛ la yele ya nɛra se'em n tom ya na la yeti, 16Na'ayenɛ yeti, N wan seren tare sagaŋɔ wa'an zen'kana wa la ka nɛreba zuo na yelese'a woo te Yuda naba la kaanlɛ gɔŋɔ wa poan la wan tom. 17Se'ere n sɔe la, ba bahɛ mam mɛ ge kaanbera baga. Ba eŋɛ la bala tara ba nu'uhen te ba dekɛ maalɛ sɛla la nyiiha mam sunsunya. Bala zuo, mam sunsunyiim n taɛ bahɛ zen'kana wa zuo kan malom kiŋɛ. 18Ge han dɛna Yuda naba wa n tom ya te ya wa'ana soke Na'ayenɛ behɛ wa, ta yele ya en yeti, Na'ayenɛ Israel Yenɛ la yeti, doohe la hom wom yelese'a la zuo: 19ho suunre n sagom te ho ma'ɛn ho mɛŋa se'em mam Na'ayenɛ nɛŋan la hom wom mam tɔgɛ yelese'a bahɛ zen'kana wa la ka nɛreba zuo te ba wan lebege daboo te zɛrɛgerɛ paɛ ba, te hom sigehe ho mɛŋa se'em aanhom ho futo ge kaahɛ se'em la zuo, n wom ya. Na'ayenɛ yele se'em n bala. 20Bala, n wan bahɛ te ho paɛ ho yaabdoma. Ho wan sige ho yɔɔ poan la sunma'ahom. Ho nini kan nyɛ namehegɔ seko n wan sige zen'kana wa zuo na la. Te ba tare yelehom bona wa ta bo naba la.

will be added

X\