2 Nadoma 20

1Dabeha aŋa poan la, te Hezekia lu ban'an yɛ'a kum. Amoz dayɔa Isaiah n de nɔtɔgɔha la wa'an a zen'an na yele en yeti, Na'ayenɛ yeti, maahom ho yire la soŋa. Se'ere n sɔe la, ho ban'an la ka ane soŋa, ho kan ihege. 2Hezekia ŋmɛregɛ a nɛŋa kpa' dangoone sohɛ Na'ayenɛ yeti, 3Na'ayenɛ, tɛnra mam. Se'ere n sɔe la, mam doohe ho mɛ la yelemɛŋɛrɛ la n suunre zan'an ge me tona som ho nɛŋan. Te Hezekia kele paɛ paɛ. 4Isaiah n ta paara teŋasoka zenzaka la poan te a yehe la, te Na'ayenɛ tɔgɛ bo en yeti, 5Ŋmɛregɛ lebe yele mam nɛreba daana Hezekia wa yeti, Na'ayenɛ ho yaaba David Yenɛ la yeti, mam wom ho sohoga la mam nyɛ ho nintam la. N wan tebɛ ho. Ho wan ihege ho ban'an wa poan dabeha atan' daarɛ, keŋɛ Na'ayenɛ Yire la poan. 6N wan pa'ahɛ ho vom yuuma pia la anuu. N wan fan' hom la teŋa wa Asiria naba nu'uhen. N wan gu'ura teŋkana wa, n yu'urɛ la zuo, la n yameŋa David zuo. 7Te Isaiah nya yeti, Tɔ ya mu'uro na booe nɔten kɛ'ɛŋa la te a nyɛ a tebegɔ. 8Hezekia soke Isaiah yeti, Bene n wan dɛna danlehom pa'alɛ te Na'ayenɛ wan tebɛ mam, te mam wa seren ihege keŋɛ Na'ayenɛ Yire wa poan dabeha atan' daarɛ? 9Isaiah yeti, Danlehom sebo te Na'ayenɛ bo te a wan eŋɛ sɛla te a biŋe nɔɔrɛ wa dela, wontɛɛŋa han nyɛɛn na, kura wa yilinyiliŋɔ wan tole la nɛŋa na'ma pia bii ka wan lebe la pooren na'ma pia? 10Hezekia yeti, Wontɛɛŋa la han nyɛɛn na, yilinyiliŋɔ la ye' la nɛŋa, ka kan nyaŋɛ lebe pooren. 11Te nɔtɔgɔha Isaiah sohɛ Na'ayenɛ te saŋkaŋa la te wontɛɛŋa la nyɛɛn tɔ kura wa te ba mɛ bo naba Ahaz la mɛ, te kura la yilinyiliŋɔ lebe na'ma pia pooren na. 12Bala ma'an la te Baladan dayɔa Merodak n de Babilon naba la tom la nɛreba la gɔŋɔ la a bo'olom Hezekia zen'an na. Se'ere n sɔe la a wom te Hezekia bɛn'ɛnre mɛ. 13Te ba paɛ na te Hezekia to'e ba soŋa, dekɛ ba doohe pa'alɛ a teŋa la lɔgɔrɔ n gan' zen'an, a sanlenpeelega la sanlema la nyɛga la tiihe kaam la a zaba lɔgɔrɔ la sɛla woo n boe a lɔgɔrɔ yire la poan la zan'an. Sɛla ka gee a yire la poan bii a teŋa la poan zen'sɛka te Hezekia ka pa'alɛ ba. 14Nɔtɔgɔha Isaiah nya wa'ana soke Hezekia yeti, Boraahe sena wa tare la bem sɔnhega na? Se ze'ele la bɛ na? Hezekia lerege yeti, Se ze'ele la zen'an n zaan na, Babilon teŋa. 15Nɔtɔgɔha soke en yeti, Se nyɛ la bem ho yire wa poan? Te Hezekia lerege en yeti, Se nyɛ sɛla woo n boe mam lɔgɔrɔ biŋere yire wa poan mɛ. Sɛla ka gee te mam ka pa'alɛ ba. 16Isaiah yele Hezekia yeti, Wom Na'ayenɛ n yele se'em. 17Dabeha kene na, te sɛla woo n boe ho yire wa poan la sɛla woo te ho yaabdoma bɔ biŋe tara tara la zina wa, ba wan zi ba zan'an keŋɛ Babilon. Sɛla kan yee ka'lam. Na'ayenɛ yele se'em n bala. 18Ho mɛŋa dayɔɔhe te ho dɔgɛ la, ba wan nyɔkɛ ba keŋɛ, te ba ta bɔna Babilon naba yire poan. 19Hezekia yela Isaiah yeti, Na'ayenɛ yelehom sebo te ho yele mam wa ane soŋa. Se'ere n sɔe, a tɛn'ɛhɛ bo a mɛŋa mɛ yeti, sunma'ahom han bɔna mam saŋa wa ma'an poan, la dagɛ yele. 20Hezekia toonse'a woo n gee la a paŋa la enŋa n tun' bulega se'em ge tun' ko'om dɔlɔga zen'an te ko'om zɛ'ɛta bulega la poan kɛn'ɛra teŋa la poan na se'em la zan'an golehɛ eŋɛ la Yuda nadoma yɛla gɔŋɔ la poan. 21Hezekia kule paɛ a yaabdoma te a dayɔa Manase sɔe a na'arɛ dɛna naba.

will be added

X\