2 Nadoma 17

1Yuda naba Ahaz na'am dia yuuma pia la ayi' poan te Elah dayɔa Hoshea di Israel na'am, kɛn'ɛra Samaria teŋa, zin'ire na'am gɔŋɔ la zuo yuuma awae'. 2A tona be'em Na'ayenɛ nɛŋan, ge a ka ane wo Israel nadoma sɛba n tole ge bo en la. 3Asiria naba Salmaneser wa'ana zabɛ la Hoshea n daa de a yameŋa yɔɔra koba bɔ'ɔra en. 4Ge Asiria naba wa ta baŋɛ mɛ te Hoshea wa kaare la a booren. Se'ere n sɔe la, Hoshea daa ta tom la nɛreba Mizraim naba So zen'an, ge ka le yɔɔra koberɛ bɔ'ɔra Asiria naba wo yuunɛ woo te a ne eŋɛ se'em la. Bala te Salmaneser la nyɔkɛ en bobe en ta pagɛ en. 5Asiria naba wa nya sagom teŋa la zan'an ta paɛ Samaria na. Yuuma atan' te a gan'an pigira teŋa wa. 6Hoshea na'am dia yuuma awae' poan te Asiria naba wa'ana zabɛ nyaŋɛ Samaria, ge pɛnregɛ Israel nɛreba yehe ba teŋa la poan lebe Asiria poan. A ta bahɛ te ba bɔna Hala la Gozan Habor Kolaa la nɔgbenɛ teŋhe la Media teŋkanra poan. 7Dena wa n eŋɛ la dela, Israeldoma tue ba Na'ayenɛ ba Yenɛ n tare ba Mizraim teŋa yehe na, ge fan' ba naba Faro nu'uhen bahɛ la mɛ. Ba na'ahera baga, 8ge dɔla nɛresɛba te Na'ayenɛ dige ba Israeldoma wa ninin bahɛ la malema la malema se'a te Israel nadoma la mɛhe eŋɛ biŋe la. 9Israel nɛreba wa pin' Na'ayenɛ ba Yenɛ la yelehom la mɛ, sɛla n ka nare ba eŋɛ n bala. Ba doohe mɛ kuŋkuma zuto kaanbegɔ zen'enhe ba teŋhe la woo poan bo ba mɛhe ze'ele teŋa la limihego dewoko la n boe zen'an la, ta paɛ teŋa la teŋasoka na. 10Ba doohe sɛ la toolom kuga la Aserah bagarɛ kuŋkune woo zuo la tikantɛ woo tilin. 11Ba kena kuŋkuma kaanbegɔ zen'sena wa woo poan nyɔ'anra ko'ɛnka wo Kanaan teŋhe nɛreba n daa eta se'em te Na'ayenɛ dige ba Israeldoma wa ninin bahɛ la. Ba wa tom la toonfɛn'ɛha nyiihe Na'ayenɛ suunre. 12Ba tona bɔ'ɔra baga, sɛla te Na'ayenɛ yele ba yeti da eŋɛ yele dena wa la. 13Na'ayenɛ kelom dɔla la nɔtɔgɔheba la behera woo poan kan' Israel la Yuda wa yeti, Ŋmɛregɛ ya be'em la poan na. Dɔla mam bo nɔya la malema la n boe Pa'alegɔ zan'an la te mam bo ya sɔdoma te ba dɔla la, ge te n dekɛ ko doohe n yamehe, nɔtɔgɔheba la, te ba tɔgɔra bɔ'ɔra ya la. 14Ge bala zan'an, ba la ka kelehe, ge kanbɛ ba sunya wo ba yaabdoma n yuun ka nam Na'ayenɛ ba Yenɛ la ge kanbɛ ba sunya se'em la. 15Ba zagahɛ Na'ayenɛ malema la a nɔbiŋere la te a biŋe la ba sɔdoma la mɛ, ge zagahɛ a kan'aŋɔ seko te a kan'an ba la ninmɔ'ɔrɛ la. Ba dɔla ponpɔrɔŋɔ, ta bahɛ yoo ba mɛhe. Ba dɔla teŋse'ehe n kae ba mum la etegɔ seko te Na'ayenɛ bo ba nɔɔrɛ yeti ba da tɔgɔha se etegɔ la. 16Ba zagahɛ Na'ayenɛ ba Yenɛ la nɔɔrɛ mɛ ge kure baga ayi' n de nagabibihe ge sɛ Aserah bagarɛ. Ba na'aha saazuo lɔgɔrɔ wa zan'an, ge dɛna Baal bagarɛ yamehe. 17Ba tara ba dayɔɔhe la ba pɔyɔɔhe nyɔ'anra bugum poan kaanbera. Ba bogora bakolo la sɔɔntooma, dekɛ ba mɛhe koohe bo be'em Na'ayenɛ nɛŋan, nyie Na'ayenɛ suunre. 18Bala te Na'ayenɛ suunre damɛ la Israel, te a foe a nu'o ba poan. Te ba sagom ka gee la ayena me, han dagana Yuda yizuo la ma'an. 19Te Yudadoma me ka dɔla nɔse'ere te Na'ayenɛ ba Yenɛ la bo la, ge dɔla malema se'a te Israeldoma biŋe bo ba mɛhe la. 20Bala te Na'ayenɛ zagahɛ Israel nɛreba la zan'an. A namehe ba dekɛ ba eŋɛ faanreba nu'uhen tara tara te ba zan'an ta yeregɛ a nɛŋan. 21Na'ayenɛ n yelege Israel yehe David yire poan bahɛ la, te ba bobe Nebat dayɔa Yeroboam naba. Te Yeroboam bahɛ te Israel ka dɔla Na'ayenɛ, ge tare ba te ba tue tuukantɛ. 22Israeldoma wa kɔ'ɔn tone la tuure se'a te Yeroboam tue la, kan yehe ba mɛhe bo poan, 23tara tara te Na'ayenɛ ta foe a nu'o ba poan wo enŋa n pon tabalɛ tɔgɛ se'em doohe a yamehe n de nɔtɔgɔheba la poan la. Bala te ba nyɔkɛ Israeldoma ba mɛŋa teŋa poan pɛnregɛ ba loŋe Asiria teŋa la zina. 24Asiria teŋa naba wa tee vaɛ la nɛreba Babilon la Kuta la Ava la Hamat la Separvaim teŋhe poan na te ba sɔe Israel nɛreba la na'arɛ kɛn'ɛra Samaria teŋkanra la poan, sɔna Samaria zin'an ka poan. 25Ban pɔhɛ wa'ana zin'ire bini la, ba ka na'ahere Na'ayenɛ. Te Na'ayenɛ dekɛ gbegema tuunle ba na, te gbegema la aanhom ba basɛba. 26Te ba yele Asiria naba ha yeti, Teŋse'ehe nɛreba te ho pɛnregɛ ba na tee kɛn'ɛhɛ Samaria teŋkanra la poan la ka mi' teŋa la yenɛ la kihire. Bala te de dekɛ gbegema tuunle ba na, te gbegema la koora ba. Se'ere n sɔe la ba ka mi' teŋa la yenɛ la kihire. 27Asiria naba nya bo nɔɔrɛ yeti, Tare ya Samaria teŋa malemadoma la te ya pɛnregɛ ba na la ayena te a keŋɛ ta bɔna ha pa'ala ba teŋa la poan yenɛ la malema n de se'em. 28Bala te malemadaana wa te ba pɛnregɛ ba ze'ele Samaria teŋa na la ayema lebena, kɛn'ɛra Betel, ge pa'alɛ ba ban wan na'aha Na'ayenɛ se'em. 29Ge la bala zan'an, teŋhe woo nɛreba maalɛ la ba bagarɛ ba bagarɛ, tare ba ze'ele Samariadoma la kaanbegɔ zen'enhe la teŋa la woo poan. 30Sɛba n yehe Babilon na la maalɛ la Sukot Benot bagarɛ, te sɛba n yehe Kuta na la me maalɛ Nergal bagarɛ, te Hamatdoma maalɛ Asima bagarɛ, 31te Avadoma maalɛ Nibhaz la Tartak baga, te Separdoma tara ba kɔma nyɔ'anra bugum poan bɔ'ɔra ba baga Adramelek la Anammelek. 32Ba po'ohe Na'ayenɛ, ge ba me loohe la nɛreba yoo ba poan te bama kaanbera ba kaanbegɔ zen'enhe la poan bɔ'ɔra ba. 33Ban po'ohe Na'ayenɛ se'em n bala, ge me kaanbera ba baga wo bama n yehe teŋse'ehe poan na la. 34La zina wa, ba kelom dɔla la ba deemen deemen etegɔ mea. Ba ka na'ahere Na'ayenɛ ma'an, ba ka dole a malema bii a nɔze'elego bii a pa'alegɔ bii a nɔɔrɛ la te a bo Yakob yaahe la te enŋa mɛŋa segɛ ba Israel la. 35Na'ayenɛ n daa biŋe la nɔɔrɛ la ba, a bo ba nɔɔrɛ yeti, Da na'ahere ya baga bii ya pɔnta na'ma bɔ'ɔra ba bii ya tona bɔ'ɔra ba bii ya kaanbera ba. 36Ge ya na'ahere Na'ayenɛ se'ere n tare ya ze'ele Mizraim teŋa yehe na la a mɛŋa nu'o paŋa la. Enŋa ma'an te ya wan na'aha. Enŋa te ya wan pɔnta na'ma bɔ'ɔra ge kaanbera bɔ'ɔra en. 37Ya ma'ɛn ya mɛhe ge dɔla a malema la a nɔze'elego la a pa'alegɔ la a nɔɔrɛ te a bo ge golehɛ bo ya la. Ge da kaanbere ya baga. 38Da tamɛ ya nɔbiŋere la te n daa biŋe la ya la. Ge daa kaanbere ya baga. 39Ya na'ahera Na'ayenɛ ya Yenɛ la. Enŋa n wan yehe ya, ya diŋdoma nu'uhen bahɛ. 40Ge la bala, ba ka kelehe, ge kelom tona la ba malema la. 41Teŋhe sena wa n po'ohe Na'ayenɛ, ge kaanbera ba baga la te ba maalɛ la se'em n bala. La zina wa, ba kɔma la ba kɔma me kɔma kelom eta mɛ wo ba yaabdoma la.

will be added

X\