2 Nadoma 16

1Aremalia dayɔa Peka na'am dia yuuma pia la ayopɔe poan te Yotam dayɔa Ahaz di Yuda na'am. 2Ahaz dela yuuma pihiyi' ge di na'am la, behɛ Yuda teŋa yuuma pia la ayoobe Yerusalem poan. A ka ana wo a yaaba David ge tooma ka tegɛ Na'ayenɛ a Yenɛ la nini. 3A me nɛ la Israel nadoma la woo na'taka la, pon ta dekɛ a dayɔa nyɔ' kaanbɛ. Yelebe'o seko zuo te Na'ayenɛ dige teŋhe la Israel ninin la n bala. 4A me kaanbera ge nyɔ'anra ko'ɛnka kuŋkuma kaanbegɔ zen'enhe la zɔya zuto la tikantɛ woo tilin. 5Aram teŋa naba Arezin la Israel naba Aremalia dayɔa Peka nya yehe na te ba tɛn' pɛɛma la Yerusalem. Ba wa'ana gilige naba Ahaz la a teŋa la mum, ge ka nyaŋɛ en. 6Saŋkaŋa poan te Aram teŋa naba Arezin to'e Elat teŋa Yudadoma nu'uhen bo Aram, ge dige Yudadoma la Elat poan, ge te Edomdoma sɔe bɔna ka poan la zina. 7Ahaz tom nɛreba Asiria naba Tiglat Pileser zen'an yeti, Mam dela ho yameŋa la ho dayɔa. Zom na fan' mam Aram la Israel nadoma wa n zaberɛ mam wa nu'uhen bahɛ. 8Te Ahaz vaɛ sanlema la sanlenpeelega Na'ayenɛ Yire la naba yire la poan tom te ba tare ta bo Asiria naba. 9Asiria naba wa to'e a nɔɔrɛ la, maahom keŋɛ Damaskus ta zabɛ nyaŋɛ ka. A nyɔkɛ ka nɛreba tare lebe Kir teŋa te ba ta dɛna yamehe, ge ko naba Arezin. 10Ahaz nya keŋɛ Damaskus te a to'ohɛ Asiria naba Tiglat Pileser la. A paɛ nyɛ la kaanbegɔ zen'an bilam, golɛ zen'an la ka naanɛ n ane se'em woo la lɔgɔseto woo n dekɛ maalɛ kaanbegɔ zen'an la bo malemadaana Uria. 11Te malemadaana Uria wa mɛ kaanbegɔ zen'an wa wo naba Ahaz n golɛ Damaskus teŋa kaanbegɔ zen'an la se'em bo en na la. A mɛ dɛ doohe la bala, ge te Ahaz baŋɛ lebe Yerusalem na. 12Ahaz n ta ze'ele Damaskus lebe na, te a keŋɛ paɛ kaanbegɔ zen'an wa behɛ ka keŋɛ zom ka zuo. 13A kaanbɛ a nyɔ'an bo'olom la boom bo'olom ka zuo, kaanbɛ daam bo'olom bini, ge dekɛ a sunma'ahom bo'olom la ziim ka'ahɛ yeele kaanbegɔ zen'an la loga kae. 14Ge a ton ɔnbegɛ Na'ayenɛ Yire la poan nyɔgom daka la n ze' Na'ayenɛ nɛŋan Yenɛ Yire la nɛŋan na la yehe na, dekɛ ka ta ze'ele enŋa kaanbegɔ zen'an la zuɔ bɔba. 15Naba Ahaz wa nya bo malemadaana Uria nɔɔrɛ yeti, Kaanbegɔ zen'kantɛ wa zuo te ho wan kaanbera bolika nyɔ'an bo'olom la zanɔɔrɛ boom bo'olom la naba nyɔ'an bo'olom la a boom bo'olom la teŋa wa nɛreba nyɔ'an bo'olom la ba boom bo'olom la ba daam bo'olom. Ne dekɛ nyɔ'an bo'olom dunhe ziim la zan'an ka'ahɛ yeele kaanbegɔ zen'kana wa loga kae. Ge nyɔgom daka wa n wan dɛna mam mɛŋa denɛ. 16Te malemadaana Uria eŋɛ sɛla woo wo naba Ahaz n bo en nɔɔrɛ se'em la. 17Naba Ahaz ŋma gɛɛrehe yehe laahe ze'elehe la. A yehe Ko'kantɛ suga nyɔgom lɔlehe la zuo la mɛ, dekɛ ka sugule kuga zuo. 18A pilige sogorɛ deo soma se'a n ne dekɛ pin' zenzaka la Vo'ohogo Daarɛ po'ohegɔ la, ge pagɛ nayahe se'ehe te Yuda nadoma dɔla kɛn'ɛra Na'ayenɛ Yire la poan na la. A eŋɛ wana woo te a pee la Asiria teŋa naba. 19Naba Ahaz toonse'a woo n gee la golehɛ eŋɛ la Yuda nadoma yɛla gɔŋɔ la poan. 20Ahaz kule paɛ a yaabdoma te ba pin' en la a yaabdoma, David Teŋa la, te a dayɔa Hezekia sɔe a na'arɛ dɛna naba.

will be added

X\