2 Nadoma 13

1Yuda naba Ahazia dayɔa naba Yoas na'am gɔŋɔ zuo yuuma pihiyi' la atan' poan te Yehu dayɔa Yehoahaz di Israel na'am, kɛn'ɛra Samaria teŋa ge behere Israel zan'an. A zin'ire a na'am gɔŋɔ zuo la yuuma pia la ayopɔe. 2Yehoahaz tom be'em Na'ayenɛ nɛŋan, kɔ'ɔn nɛ Nebat dayɔa Yeroboam tuure la te a tom bahɛ te Israel zan'an tue la poan, ka yehe a mɛŋa de poan. 3Te Na'ayenɛ sunsunyiim taɛ bahɛ Israel zuo, te a bahera te Aram naba Hazael tana ba saŋa woo, ta ta' la Hazael dayɔa Ben Hadad saŋa ha. 4Yehoahaz nya kaahɛ bo Na'ayenɛ, te Na'ayenɛ kelehe en. Se'ere n sɔe la, a nyɛ Aram teŋa nɛreba la n muguhere Israel se'em la. 5Bala te Na'ayenɛ bo ba faanra, bahɛ te Israel fan' ba mɛŋa Aram teŋa nɛreba wa nu'uhen, nya bɔna fai ba yiya poan wo lan yuum pon ana se'em la. 6Ge la bala zan'an, ba ka yehe ba mɛŋa Yeroboam yire tuure la te a tom bahɛ te Israel zan'an tue la. Ba kelom dɔla tuure la, te Aserah bagarɛ dɔɔrɔ la kelom zɛ'a Samaria teŋa poan. 7Yehoahaz pɛɛntɛɛnreba ta gee boraahe pihinuu ma'an n mi' zaba yiri ban'an, te a zaba yiri toroto gee pia, te pɛɛntɛɛnreba sɛba n kene na'ma gee tuha pia ma'an. Se'ere n sɔe la, Aram naba n sagom ba, yeregɛ ba wo ki urugo te ba yɛɛla toore poan te ko yeregera se'em la. 8Yehoahaz tooma a se'a la sɛla woo te a eŋɛ la a kpe'eŋo yɛla zan'an golehɛ eŋɛ la Israel nadoma yɛla gɔŋɔ la poan. 9Yehoahaz kule paɛ a yaabdoma, te ba pin' en Samaria teŋa poan, te a dayɔa Yehoas sɔe a na'arɛ dɛna naba. 10Yuda naba Yoas na'am gɔŋɔ zuo yuuma pihitan' la ayopɔe poan, te Yehoahaz dayɔa Yehoas di Israel na'am, zin'an Samaria teŋa, behɛ Israel yuuma pia la ayoobe. 11A tom la be'em Na'ayenɛ nɛŋan, ka yehe a mɛŋa Nebat dayɔa Yeroboam tuure la te a tom bahɛ te Israel zan'an tue la poan. 12Yehoas tooma a se'a la sɛla woo te a eŋɛ la a kpe'eŋo yɛla la zan'an la en zabɛ nyaŋɛ Yuda naba Amazia se'em la golehɛ eŋɛ la Israel nadoma yɛla gɔŋɔ la poan. 13Yehoas kule paɛ a yaabdoma, te ba pin' en Samaria teŋa nadoma yɔɔrɔ la poan, te Yeroboam sɔe a na'arɛ dɛna naba. 14Te ban'an n ŋmɛ' Elisa dɛna ka wan ko' en, te Israel naba wa Yehoas ihege keŋɛ a zen'an, ta kɛla a nɛŋan yeti, N sɔ! N sɔ! Behɛ Israel zaba toroto wa la yiri ban'areba wa! 15Elisa yeti, Dekɛ tanhɔ la pɛɛma na. Te a dekɛ tanhɔ la pɛɛma na. 16Te Elisa yele Israel naba yeti, Ve'e tanhɔ la. Te en ve'e tanhɔ la, te Elisa dekɛ a nu'uhe pagalɛ Israel naba wa nu'uhe zuo. 17A yele en yeti, Yu'ɛ takole se'ere n tɔ dapɔya bɔba ha wa. Te a yu'ɛ. Elisa yele en yeti, Tɛn'! Te a tɛn'. Elisa yeti, Na'ayenɛ faanrɛ pɛɛnɛ n bala! Pɛɛn se'ere n wan fan' ya Aram nu'uhen bahɛ n bala! Ho wan zabɛ la Aramdoma wa Apek poan ko ba lipi. 18A nya le yeti, Le dekɛ pɛɛma la. Te Israel naba wa dekɛ pɛɛma la. Elisa yeti, Dekɛ pɛɛma la ŋmɛ' teŋa. Te a dekɛ pɛɛma la ŋmɛ' teŋa botan' ge go'e. 19Na'ayenɛ nɛra wa suunre nyie la en, te a yele en yeti, La sone ne te ho ŋmɛ' ne paɛ bonuu boyoobe. Kanlɛ denɛ mea te ho wan nyaŋɛ ne Aramdoma wa kɔ'ɔn ba'ahɛ ne ba zan'an zan'an. Ge nananawa, ho yeti ho nyaŋɛ ba la sugumnɔɔren botan' ma'an. 20Elisa ta ki, te ba pin' en. Moab teŋa pɛɛntɛɛnreba me n daa ne makɛ salurugo beere yuunɛ woo poan, sa'ɛ Israel na. 21Saŋkaŋa mea poan te Israeldoma ta bɔna bini pin'ira boraa kayema, ba behɛ te pɛɛntɛɛnreba la n bala saara na te ba dekɛ boraa la lobe bahɛ Elisa yɔɔ la poan ha. Kum wa n ta lu yɔɔ la poan ha Elisa kɔnba zuo la, boraa la vo'e mɛ ihege zɛ'a. 22Aram naba Hazael mɛlɛhɛ Israel nɛreba la bala Yehoahaz na'am saŋa la woo poan. 23Ge Na'ayenɛ zo'ohɛ ba, zɔ ba ninbɔn'ɔn, ge sure behɛ ba, doohe la a nɔbiŋere la te a biŋe la Abraham la Isaak la Yakob la. Na'ayenɛ ka sagom ba bii a zagahɛ ba, tara tara la zina beere wa. 24Aram naba Hazael n ta ki la, a dayɔa Ben Hadad n sɔe a na'arɛ dɛna naba. 25Yehoahaz dayɔa Yehoas nya lebehe to'ohe teŋse'ehe woo te Ben Hadad sɔ naba Hazael yuun zabɛ fan' se a sɔ Yehoahaz nu'uhen la. Sugumnɔɔren botan' te Yehoas zabɛ nyaŋɛ en to'ohe Israel teŋhe la woo lebehe na.

will be added

X\