2 Nadoma 11

1Ahazia ma Ataliah la n ta baŋɛ te a dayɔa Ahazia ki ya la, te a ihege koora naba la dayɔɔhe la zan'an. 2Ge Yehoseba n de Naba Yohoram pɔyɔa, dɛna Ahazia tanya la, zun Ahazia dayɔa Yoas la naba dayɔɔhe la te ba koora la poan. La a pɔsɔɔ ta sogɛ bɔ'en behera en te ba da ko en. 3A boe pɔka wa zen'an la yuuma ayoobe, sogɛ bɔna Na'ayenɛ Yire la poan, ge te Ataliah dɛna naba beha teŋa la. 4Yuuma ayopɔe poan, Yehoiada yi' kpɛ'ɛndoma sɛba n behere naba la sɛba n behere naba yire la lagahɛ Na'ayenɛ Yire la poan na. Te a biŋe nɔɔrɛ la ba ge bahɛ te ba ze'ele Na'ayenɛ Yire la poan pɔ' nɔɔrɛ, ge te a dekɛ naba la dayɔa la pa'alɛ ba. 5Yehoiada bo ba nɔɔrɛ yeti, Ya wan eŋɛ se'em n wana. Yasɛba n boe ya porogerɛ botan' n kene Vo'ohogo Daarɛ la, boyena wan gura naba yire la la 6te deyema gura Sur nayaŋa la, te deyema gura nayaŋa sɛka n boe guruba la pooren ha la. 7Ya sɛba n ka tone Vo'ohogo Daarɛ dɛna tansuga ayi' la, yamam wan gura Na'ayenɛ Yire la naba la. 8Ya gilige naba wa mum, te ya woo zanla ya zaba lɔkɔ ya zaba lɔkɔ. Te se'em woo n lɛne na ya ko' en. Dole ya naba wa, a yɛhega la a lɛbɛga na. 9Te nɛŋadoma wa doohe malemadaana Yehoiada n pa'alɛ ba se'em la. Te ba woo sɛba n tone Vo'ohogo Daarɛ la sɛba n ka tone la zan'an wa'an malemadaana Yehoiada zen'an na. 10A nya wa dekɛ kana la zaba tɛ'ɛlehe se'ehe woo n de Naba David denɛ gan'an Na'ayenɛ Yire la poan la bo ba. 11Guruba wa woo maahom ze'ele, te ba woo zanla ba zaba lɔkɔ ba zaba lɔkɔ, gu' Na'ayenɛ Yire la gɔbega nu'o yɛ'a zuɔ nu'o bɔba, ge ze'ele kae kaanbegɔ daka la yire la zan'an behera naba wa bɔbɔrɛ woo. 12Yehoiada wa nya tare naba dayɔa wa yehe na, dekɛ muŋa vugule en. A bo en nɔze'elego gɔŋɔ ge sɔ' en la kaam. Te ba pa' nu'uhe ge voole yeti, Naa naba, sɔna zan'an! 13Ataliah n wom guruba la nɛreba la voole la, te a zɔ kɛn' Na'ayenɛ Yire la poan, nɛreba la zen'an. 14A yeti a behɛ te naba la n bala zɛ'a zɛɛnrɛ la zen'an wo na'am dia malema la n dole se'em la. Te zaba nɛŋadoma la tentana pɛɛbereba la zɛ'a lɛm en. Te nɛreba la woo zɛ'a la nyeema, te tentana la pɛɛbera. Te Ataliah aanhom a futo, ge kaahɛ yeti, Bɛnregɔ! Bɛnregɔ! 15Malemadaana Yehoiada la bo zaba nɛŋadoma la n behere pɛɛntɛɛnreba kɔbehe kɔbehe la nɔɔrɛ yeti, Foe ya en pɛɛntɛɛnreba wa poan na kɔrɔgɛ enŋa la se'em woo n dole a poore. Malemadaana wa n ton yeti, Da ko ya en Na'ayenɛ Yire wa poan. 16Te ba nyɔkɛ en doohe yiri n dole nayaŋa sɛka kɛn'ɛra naba yire na la ta ko' en bilam. 17Yehoiada biŋe nɔɔrɛ la Na'ayenɛ la naba la nɛreba la yeti ba dɛna Na'ayenɛ denɛ. A me biŋe nɔɔrɛ naba la a nɛreba la teŋasoka. 18Teŋa la nɛreba zan'an keŋɛ Baal kaanbegɔ yire la poan, ta gbi' de bahɛ. Ba gbi' Baal kaanbegɔ bimbina la mɛ, ge wɔnrɛ baga la n de Baal wɔnhom te ba mɛ ze'ele la buuri buuri, ge ko' Matan n kaanbere Baal bagarɛ la Baal kaanbegɔ bimbine la nɛŋan. Malemadaana Yehoiada nya loohe nɛreba te ba gura Na'ayenɛ Yire la. 19A loe zaba nɛŋadoma la sɛba n gure naba mɛŋa la sɛba woo n de guruba la teŋa la poan nɛreba zan'an, te ba nya tare naba la ze'ele Na'ayenɛ Yire la poan sige na, doohe guruba nayaŋa la na. Te naba la nya zin'ire naba gɔŋɔ la zuo. 20Te teŋa la nɛreba zan'an nyeena te gbiri gbiri ka bɔna. Se'ere n sɔe la ba ko Ataliah yehe naba yire la poan. 21Yoas ta dɛna la yuuma ayopɔe ge di na'am la.

will be added

X\