2 Nadoma 1

1Ahab n ta ki la, te la bɔna bɔna te Moab teŋa la yehe ba mɛhe Israel nu'uhen. 2Ahazia ze'ele a yire zuin ha Samaria teŋa poan yɛhe takole poan lu na paɛ teŋa pɔgɔlom ge nya tom nɛreba yeti, Keŋɛ ya Ekron teŋa bagarɛ Baal Zebub la poan, ta ɛ behɛ, n wan ihege? 3Ge Na'ayenɛ soŋora yele Tisbe boraa Eliya la yeti, Ihege to'ohɛ Samaria teŋa naba nɛreba wa te a tom wa. Yele ba yeti, Yenɛ n ka boe Israel teŋa wa poan zuo te ho nya tona nɛreba Ekron teŋa bagarɛ Baal Zebub poan te ba ta ɛ bo ho? 4Wana wa zuo Na'ayenɛ yeti, ho kan ihege, ho wan ki! Te Eliya keŋɛ. 5Nɛreba la n lebe ta paɛ naba wa, te a soke ba yeti, Bene te ya lɛbera na? 6Ba lerege en yeti, Boraa kayema n to'ohɛ tomam yeti, lebe ya naba sɛka n tom ya la zen'en ta yele en yeti, Na'ayenɛ yeti, Yenɛ n ka boe Israel teŋa wa poan zuo te ho tona nɛreba Ekron teŋa bagarɛ Baal Zebub poan te ba ta ɛ bo ho? Wana wa zuo, ho kan ihege, ho wan ki! 7Naba wa soke ba yeti, Boraa sɛka n to'ohɛ ya, yele ya yele ana wa la, ane la wane? 8Ba lerege yeti, Ka yɛ la ganɛ n ka nɔm, te gana lo' ka sea. Te naba la yeti, Tisbe boraa Eliya la n bala. 9Naba wa nya bahɛ te zaba nɛŋadaana ayema n behere pɛɛntɛɛnreba pihinuu, tom ba Eliya zen'an. Te a ta paɛ te Eliya yage la zoore zuo, te a yele Eliya yeti, Yenɛ nɛra wa, naba yeti ho sige wana! 10Eliya lebehe nɛŋadaana wa yeti, Mam han seren dɛna la Yenɛ nɛra, bugum ze'ele saazuo lu hom la ho boraahe pihinuu wa zuo na, di ya ko! Te Yenɛ bahɛ te bugum seren ze'ele saazuo lu ba zuo na, di nɛŋadaana wa la a boraahe pihinuu la sɔnpe. 11Te naba wa le bahɛ te zaba nɛŋadaana ayema n behere pɛɛntɛɛnreba pihinuu, te ba me keŋɛ ta paɛ, te nɛŋadaana la zom ta paɛ Eliya, yele en yeti, Yenɛ nɛra wa, naba yeti, tole sige wa'an kalam na! 12Eliya lebehe yele en yeti, Mam han seren dɛna la Yenɛ nɛra, bugum ze'ele saazuo lu hom, la ho boraahe wa zuo na di ya ko! Te Yenɛ bahɛ te bugum seren ze'ele saazuo lu ba zuo na di nɛŋadaana wa la a boraahe pihinuu la sɔnpe. 13Te naba wa le bahɛ te zaba nɛŋadaana pa'ahɛ botan' la pɛɛntɛɛnreba pihinuu. Te ba ta paɛ, te ba nɛŋadaana la zom ta paɛ Eliya, lu' aliko Eliya nɛŋan, yele en yeti, Yenɛ nɛra wa, da sagom mam la ho yamehe pihinuu wa! 14Behɛ, dagɛ bugum n sige na di zaba nɛŋadoma ba yi' la ba pɛɛntɛɛnreba pihinuu nuu la n wa'an yia na la? Mam belone ho mɛ te ho da ko mam! 15Te Na'ayenɛ soŋora yele Eliya yeti, Doohe en sige. Da zɔta dabeem la en. Te Eliya ihege doohe la nɛŋadaana wa sige keŋɛ naba la zen'an. 16Eliya paɛ yele naba wa yeti, Na'ayenɛ yeti, Yenɛ n ka boe Israel teŋa wa poan te ho wan soke baŋɛ zuo te ho tom nɛreba Ekron teŋa bagarɛ Baal Zebub poan te ba ta ɛ bo ho la? Wana wa zuo, ho kan' ihege, ho wan ki! 17Te Ahazia seren ki, wo Na'ayenɛ yelehom la te Eliya porɛ se'em la. Ge naba wa n ka tare bodibila la zuo, a yebega Yoram n sɔe a na'arɛ dɛna naba. Wana wa eŋɛ la Yehosapat dayɔa Yehoram n di Yuda teŋa na'am la yuuma ayi' poan. 18Ahazia tooma woo te a tom golehɛ eŋɛ la Israel nadoma yɛla gɔŋɔ la poan.

will be added

X\