2 Zã 1

1Mam Yon se'em n de keema la, n golehere gɔŋɔ wa bɔ'ɔra pɔgɔsoŋa wa se'em te Yenɛ loe la ka kɔma. Ge la dagɛ la mam ma'an n nɔŋɛ hɔ. Sɛba woo n mi' yelemɛŋɛrɛ la me nɔŋɛ ho mɛ. 2Se'ere n sɔe la to dole la yelemɛŋɛrɛ la ge enŋa me wan bɔna la tɔ daarɛ woo. 3To Sɔ' Yenɛ la a Dayɔa Yesu Krista tare zo'ohogɔ ge zɔ' to ninbɔn'ɔn ge bo to sunma'ahom. Wana wa wan bɔna tomam sɛba n tare nɔŋerɛ la yelemɛŋɛrɛ. 4N poorɛ daa pee ya la mam n daa baŋɛ te ho kɔma basɛba dole yelemɛŋɛrɛ la wo to Sɔ' Na'ayenɛ n bo to a nɔɔrɛ se'em la. 5Bala, n soma, n yeti ho mɛ te ho bahɛ te to nɔŋɛ taaba. Te dena wa dagɛ la yelepaalɛ te n golehɛ bɔ'ɔra ho wa. Te dela nɔse'ere te to pon wom pin'ileŋɔ ha. 6Te nɔŋdena wa te n yɛta wa vɔnrɛ dela to nana a nɔɔrɛ la to bɔŋa poan. Te nɔɔrɛ la te ya zan'an la pon wom pin'ileŋɔ poan ha dela dena wa: ya zan'an bɔna la nɔŋerɛ. 7Ponpɔrɔŋdoma zo'e zo'e yehe yeregɛ teŋa wa zuo zan'an poan mɛ. Nɛresɛba n ka sakɛ te Yesu Krista ka wa'ana wo nɛresaala n ane se'em la. Nɛrebana dela ponpɔrɔŋdoma ge me dɛna Krista diŋdoma. 8Behɛ ya soŋa la ya da bɔ'ɔrege yan tom sɛla zuo la bahɛ ge ya wan ta to'e ya yɔɔrɛ. 9Ge nɛrese'em n ka dole Yesu Krista n pa'alɛ se'em la, ge tara potɛn'ya ayi' ayi', dagɛ Yenɛ nɛra. Ge nɛrese'em n dole a pa'alegɔ la dela to Sɔ' la a Dayɔa la nɛra. 10Bala, se'em han wa'an ya yire na ge ka dɔla la pa'alekona wa, da to'e ya en. Da pon yele ya en te sunma'ahom wan bɔna la en. 11Te nɛrese'em daana n bo nɛra ena wa zaanrɛ lagom de'a la boyena la en tona be'em. 12N tare yɛla zo'e zo'e te n yele ho, ge n kan golehɛ ba eŋɛ gɔŋɔ poan bo ho na. N tɛn'ɛhe te n nyɛ' ho dabeha wa. Te han wa'ana, to wan nyɛ' taaba sɔnhɛ. Bala, te to wan tara popeelom. 13Ge ho soma se'em te Yenɛ loe te a dɔla Yesu sore la kɔma po'ohere ho na.

will be added

X\