2 Korẽntɩ 9

1La ka pakɛ te n golehɛ gɔŋɔ bo ya yɛhera bo'olom sebo te ba tara te ba ta bo Na'ayenɛ nɛreba la n boe Yuda teŋa poan la. 2Mam mi' te ya bote ya soŋɛ. Bala n me pon ŋmɛ' n nyɔn'ɔn mɛ ya zuo bo nɛresɛba n boe Makedonia teŋa poan la mɛ. N daa yele ba yeti, To sɔɔnrɔ sɛba n boe Greek teŋa poan la, daa pon maahom la yuunse'ere n tole ha la te ba soŋɛ. Bala, ya ninmɔ'ɔrɛ la bala me bahɛ te nɛra basɛba me zo'e zo'e mɔ'ɛ nini mɛ te ba soŋɛ. 3Bala, n tone to sɔɔnrɔ wa me na ya zen'en. Bala te la kan kɔ'ɔn dɛna la to tɔgɔre la yetɔgom ma'an ŋmɛ'ɛra to nyɔn'ɔn ya zuo. Ge ya wan maahom yan tare sɛla te ya soŋɛ la gura to wo mam pon yele se'em la. 4Han dagana bala nɛresɛba n boe Makedonia teŋa poan la han wa'ana nyɛ te ya ka maahom gura to, la wan dɛna vi' bɔ'ɔra tɔ. La me wan dɛna vi' bo yamam me la tomam n ba' nam ya se'em la zuo. 5Bala, mam tɛn'ɛhɛ dɛ te de dɛna ma'an to sɔɔnrɔ wa diŋɛ n yia wa'ana. Ba han wa'an bala na, ba wan maahom bo'olom sebo te ya biŋe ya nɔɔrɛ te ya bo la. Bala, te n han ta paɛ na, ya wan maahom dɛ gura mam. Bilam te la wan pa'alɛ te ya mea n bote te ya bo zuo, ge la dagɛ la la dela pɛnregerɛ zuo te ya bo. 6Ge tɛnre ya dena: te se'em n borɛ bonbuula fiin wa me nyɛte la dia fiin wa. Ge se'em me n borɛ bonbuula kekeko me nyɛte la dia kekeko. 7La nare te nɛra woo bo n tɛn'ɛhe a potɛn'ɛrɛ poan te a bo se'em. A daana da bo ge nyɔna bii a dekɛ dɛ te de dɛna pɛnregerɛ. Se'ere n sɔe la, Na'ayenɛ nɔŋɛ se'emdaana n bo'ore bo'olom la popeelom. 8Yenɛ me ta'an bahɛ te ya tara gana yan tara se'em la. Bala te ya wan tara kekeko soŋora toonsonɛ woo poan. 9Wo ban golehɛ Yenɛ gɔŋɔ la poan yele se'em la. La yeti, A bo'ore nahadoma mɛ la a suunre zan'an, te a tontɔɔtooma la ka tara ba'ahegɔ. 10Dene poan, Na'ayenɛ se'em n bo'ore bonbuula te ba bota ge bɔ'ɔra dia te ba dita la wan bo ya bonbuuse'a woo te ya bɔta te ya tara. A me wan bahɛ te ba yehe zo'e wom te ya nyɛ' dia ya etesoŋɔ la zuo. 11A me wan kelom bahɛ ya te ya tara daarɛ woo la ya ta'an me soŋora daarɛ woo. Bala te nɛreba zo'e zo'e wan pɛngɛ Na'ayenɛ yɛhera ya bo'olom la te ba to'e to zen'en la. 12Te toon wa te ya tom wa soŋɛ la Na'ayenɛ nɛreba n nare te ba tara sɛla la, la me lagom bahɛ te nɛreba pɛngera Na'ayenɛ la ba sunya zan'an. 13Ge te yan tom toondena wa bahɛ te nɛreba baŋɛ ya ane se'em wa, nɛreba zo'e zo'e wan pɛngɛ Na'ayenɛ yɛhera nɛreba nɛŋan te ya nana Yelesoma la n tɔgɔre Krista yele la. Ba me kelom pɛngɛ en yɛhera la soŋore se'ere te ya soŋora ba la nɛresɛba me woo la. 14Dene poan, ba wan soha bɔ'ɔra ya la ba sunya zan'an zan'an la som sebo n bo deyema te Na'ayenɛ eta bɔ'ɔra ya la zuo. 15Bala, bahɛ ya te to bo Na'ayenɛ fara la a bo'olom sebo n ka tare magahegɔ wa.

will be added

X\