2 Korẽntɩ 8

1To sɔɔnrɔ, to bote ya baŋɛ Na'ayenɛ som la n daa soŋɛ lagaŋseto n dole Yesu sore bɔna Makedonia teŋa poan la se'em. 2Ba daa nyɛ daaŋɔ ba bɔŋa poan ge daa sina ge kelom ŋmibe sɛ' ze'ele de poan. Ge bala zan'an, ba poorɛ daa pee mɛ te ba bo bo'olom la ba sunya zan'an zan'an la ban daa pon ba' dɛna nahadoma wa. 3N yete ya la yelemɛŋɛrɛ wa te ba bo la sɛla te ba tara. Ba bo gana ban tare se'em mɛ. La dela ba mɛhe bo'olom poan. 4Te ba daa belom to ge kɔ'ɔn eŋɛ ba potɛn'ɛra te to bo ba sore te ba me lagom soŋɛ Na'ayenɛ nɛreba la n boe Yuda teŋa poan la. 5Ban daa eŋɛ sɛla wa, la daa gaŋɛ sɛla te to mam daa tɛn'ɛha to sunya poan la mɛ. Yia poan, ba daa dekɛ la ba mɛhe bo to Daana Yesu ge te Na'ayenɛ paŋa poan ba me daa dekɛ ba mɛhe bo tomam me. 6Bala, to yele Titus se'em n pohɛ toonɛ la te a teregɛ a mea la a kelom tona dɛ ge me soŋɛ yamam me te ya tom ba'ahɛ nɔŋerɛ toonɛ wa n boe deyema wa. 7Ya dela sɛba n ka koŋe yelese'ere woo wo ya sakerɛ Yesu sore dɔlɔga poan la, la yan mɔɔlɛ Yelesoma la se'em la, la ya mi'ilom Yesu sore dɔlɔga la, la yan mɔ'ɛ nini soŋora se'em, la yan tare nɔŋerɛ bo to se'em la. Bala, to bote ya me tona nɔŋerɛ tooma la la ya sunya zan'an zan'an. 8La dagɛ la mam yete ya la yelese'a la yelese'a te la sona te ya dɔla. Ge n bote n dekɛ la yamam mɛhe nɔŋerɛ n ane se'em te n makɛ behɛ nɛresɛba n mɔ'ɛ nini te ba soŋɛ sɛba me n ane se'em. 9Ge ya pon mina to Daana Yesu Krista n daa ete som se'em bɔ'ɔra nɛreba. A daa dela se'em n daa ka koŋe yelese'ere woo poan. Ge bala zan'an, a daa eŋɛ a mɛŋa naha yamam zuo. A daa eŋɛ bala te a nɔŋɔ la poan, a wan bahɛ te ya kan koŋe yelese'ere woo poan. 10Ge mam potɛn'ɛrɛ n de se'em yɛhera yele dena wa dela dena: mam tɛn'ɛhe te la ane soŋa te ya tom ba'ahɛ sɛla te ya daa pɔhɛ yuunse'ere n tole ha la. Yamam n daa de yiadoma te ya tara dena wa ya potɛn'ya poan, ge me daa pon tom mɛ. 11Dene poan, de ya sɛba n wan ba'ahɛ toonɛ la nananawa. Mɔ'ɛ ya nini la ya ba'ahɛ dɛ wo yan daa mɔ'ɛ nini se'em pɔ'ɔhara te ya tom dɛ la. Bala, dekɛ ya sɛla woo te ya tara la la ya tom dɛ ba'ahɛ. 12Ge ya han mɔ'ɛ nini te ya bo bo'olom, Na'ayenɛ behera la sɛla te ya tara te ya bo la ge tɔ'ɔra ya bo'olom la. Ge a kan behera la sɛla te ya ka tara te ya bo la. 13La dagɛ la mam zegere te n dekɛ la yɛla zo'e zo'e din' ya la n ta'an bahɛ te nɛreba basɛba nyɛ' vo'ohogo. 14Ge la dela yan tara kekeko nananawa la, la de ma'an te ya soŋɛ sɛba n nare soŋorɛ. Bala te yamam me han ta nara soŋorɛ ge te ba tara kekeko, ba wan soŋɛ ya. Dena poan, te ya wan lagom soŋɛ taaba boyena ge te se'em kan gana se'em, 15wo ban golehɛ Yenɛ gɔŋɔ la poan yele se'em la. La yeti, Sɛba n ne vaɛ zo'e la ne ka makɛ te sɛla gee, sɛba n ne vaɛ fiin ne ka makɛ te la pɔ'ɛ. 16To pɛngɛ Na'ayenɛ la n bahɛ te Titus mɔ'ɛ nini wo tomam me n mɔ'ɛ nini se'em te to soŋɛ ya la. 17La dagɛ la Titus ma'an poorɛ n pee yɛhera la ton yele en te a eŋɛ sɛla la. Ge la dela a mɛŋa n tɛn'ɛhɛ bɔta te a wa'an na soŋɛ ya. A me mɔ'ɛ nini mɛ de poan. 18Ge to lagom dekɛ to sɔɔn ayema pa'ahe en te ba wa'an na. Lagaŋseto woo n dole Yesu sore la bo'ore sɔɔn wa na'ahegɔ mɛ la Yelesoma la te a mɔɔla la zuo. 19Le yɛ'ɛha, lagaŋseto n dole Yesu sore mea la n loe en te a lagom ɛɛra la tɔ tona nɔŋerɛ toonɛ la. To han tona bala, to Daana Na'ayenɛ wan nyɛ pɛnka ge te la me wan pa'alɛ te to bote to soŋora nɛreba. 20To tare to mea soŋa soŋa yɛhera bo'olom sebo te nɛreba bo la ba sunya zan'an zan'an la. Se'ere n sɔe la, to ka bote se'em leen nyɔna yɛhera i yele. 21Tomam potɛn'ya dela to eŋɛ sɛla n de ma'an, ge dagɛ la to eŋɛ dɛ Na'ayenɛ nɛŋan ma'an, ge nɛreba mɛ nɛŋan. 22Dene poan, to tone to sɔɔn wa la nɛreba la na. To magahɛ en yɛla zo'e zo'e nyɛ' en te a kɔ'ɔn dɛna la se'em n bote a soŋora daarɛ woo. Ge te nananawa te n nya nam ya wa, a kɔ'ɔn mɔ'ɛ la nini te a soŋɛ. 23La han dɛna Titus, a dela mam tadaana ge me le lagom tona la mam te to soŋɛ ya. To sɔɔnrɔ sɛba n dole en la dela sɛba te lagaŋseto n dole Yesu sore la loe ba te ba ze'ele bo ba te to Daana Krista nyɛ' pɛnka. 24Bahɛ te ba baŋɛ te ya nɔŋɛ ba. Bala te lagaŋseto woo n dole Yesu sore la wan baŋɛ sera sera te la de ma'an te to ŋmɛ'ɛre to nyɔn'ɔn ya zuo la.

will be added

X\