2 Korẽntɩ 6

1Dene poan, n belone ya mɛ te ton lagom tona bɔ'ɔra Na'ayenɛ la. La ka sone te ya beha Na'ayenɛ n ete som bɔ'ɔra ya la yoo. 2Te Na'ayenɛ yeti, N wan kelehe ho sohoga, n yehe la saŋa te n soŋɛ hɔ, n wan wa'ana fan' ho bahɛ. Bala nya kelehe ya, te nananawa n de se'em ma'an te ya sona te ya to'e Na'ayenɛ n ete som bɔ'ɔra ya la, zina n de daanse'ere daarɛ te ya sona te ya nyɛ faanrɛ. 3To ka bote se'em ta yeti enŋa nyɛ tuure to toonɛ wa poan. Bala, to zegere mɛ te to da eŋɛ yelese'ere n wan dɛna daaŋɔ bo se'em. 4Ge te ton wan eŋɛ se'em dela la sɛla woo te to eta, to bote to pa'alɛ mɛ te to dela Na'ayenɛ yamehe. Yɛhera la ton din'inhe suunre ŋmebera daaŋseko woo, la namehe seko woo, la sunsagaŋɔ seko woo te to nyɛta la. 5Ba daa ŋmɛ' tɔ ge pagɛ tɔ ge me daan tɔ. To daa me ne ba' tom ka ginha bii di dia. 6To daa de sɛba n daa ka ete sɛla n de dɛngerɔ ge me daa mina to dɔla Yesu sore n ane se'em. Le yɛ'ɛha, to daa din'inhe suunre ge me daa tara nɔŋerɛ. Bala, yele ana wa te to daa eta wa daa pa'alɛ mɛ te to dela Na'ayenɛ yamehe. La dela Yenɛ Sea la, la to yelemɛŋɛrɛ nɔŋerɛ la te to tara la. 7yetɔgom sebo n de yelemɛŋɛrɛ te to tɔgɔra bɔ'ɔra nɛreba la, la Na'ayenɛ paŋa poan n sɔe te to tana ana bala la. Tontɔɔ vom n de tomam zaberɛ lɔkɔ te to tara zabera ge me tara gu'ura to mɛŋa. 8Nɛreba basɛba bo'ore to na'ahegɔ ge te basɛba me ka bo'ore to na'ahegɔ. Le yɛ'ɛha me basɛba toora tɔ gee te basɛba me pɛngera tɔ. Ba ete tɔ wo to dela ponpɔrɔŋdoma la, ge to dela sɛba n tɔgɔre yelemɛŋɛrɛ. 9Ba le kelom eta tɔ wo to dela saama la, ge to mi te nɛra woo mi to mɛ. Ba kelom eta tɔ wo to ki' mɛ la, ge yamam nyɛ' to la te to kelom kɔ'ɔn vɔna mɛ. Ba namehɛ tɔ, ge ba ka ko' tɔ. 10Ba le kelom bahɛ te to suunre sagom, ge to tare popeelom mɛ daarɛ woo. To de nahadoma, ge to bahɛ te nɛreba kekeko de'a bontateba. Ba behere tɔ te to ka tare sɛsɛla, ge to mam n seren de sɛba n tare sɛla woo. 11Dene poan, to sɔɔnrɔ sonɔ n boe Korint teŋa poan wa, to tɔgɛ yelemɛŋɛrɛ bo ya. To yele ya to potɛn'ya n de se'ere zan'an. 12La dagɛ la tomam n ka nɔŋɛ ya, ge la dela yamam n ka nɔŋɛ tɔ. 13Ge nananawa, n tɔgɔre ya dena wa wo ya dela n kɔma la. Tare ya nɔŋerɛ bo to wo tomam me n tare nɔŋerɛ bo ya se'em la. 14Da zegere ya te ya lagom la sɛba n ka dole Yesu sore te ya de'a boyena tona. Se'ere n sɔe la, la kan ta'an eŋɛ. La wan eŋɛ la wane te sɛla n de yelemɛŋɛrɛ la sɛla n dagɛ yelemɛŋɛrɛ lagom dɛna boyena? La wan le eŋɛ la wane te sɛla n de nɛɛhom la sɛla n de lika lagom bɔna? 15La wan kelom eŋɛ la wane te Krista la Sagona la tara nɔyenɛ? Bene te se'em n dole Yesu sore wan tara te a lagom eŋɛ la se'em n ka dole Yesu sore? 16La wan eŋɛ la wane te Yenɛ Yire dɛna bagakaanbereba zen'an? Se'ere n sɔe la, to sunya poan n de Yenɛ Yire wo enŋa mea Na'ayenɛ n yele se'em la. A yeti, Mam wan dɛna ba Yenɛ, dɔla ba poore te ba dɛna n nɛreba. 17Bala, to Daana Na'ayenɛ daa yeti, Bahɛ ya ba! Yehe ya mɛhe ba zen'en. Da kalom ya sɛla n de dɛngerɔ, te n to'e ya. 18Gaŋɛ Zan'an Yenɛ yeti, N wan dɛna ya sɔ te yamam me dɛna n dayɔɔhe la n pɔyɔɔhe.

will be added

X\