2 Korẽntɩ 5

1Ge to mi te to iŋhe ane me wo sogorɛ te ba tin' teŋa wa zuo la. Ba han ta sagom to iŋhe wa, to tare iŋhe saazuo ha n ane wo yire te ba mɛ' la. Na'ayenɛ mɛŋa n mɛ' yire dena ge te de me wan bɔna wuuha. 2Te nananawa, la daane tɔ mɛ te to kɔ'ɔn bote ne te to bɔna yire se'ere n bo saazuo ha. 3La han ta eŋɛ bala, tɔ wan mina te to tara saazuo iŋa. 4Ge ton nan boe teŋa wa zuo sogorɛ la poan la, la daane to mɛ ge te to me ka nyɛta vo'ohogo. Se'ere n sɔe la, la dagɛ la to ka bote la teŋa wa zuo iŋa la, ge to bote la saazuo iŋa la pin' to. Bala te sɛla vɔe la wan pin' sɛla n kiire la. 5Na'ayenɛ n de se'em n maahom tɔ gura tee dena wa. A me bahɛ te a Sea la bɔna la tɔ te a pa'alɛ te a wan seren eŋɛ sɛla woo te a yete a eŋɛ bo to la. 6Dene poan, to sɛ' ze'ele mɛ soŋa soŋa daarɛ woo. Se'ere n sɔe la, to mi te to han vɔna teŋa wa zuo, to me zaan mɛ la Na'ayenɛ saazuo yire la. 7Tomam boe mɛ la tomam n nam bo sɛla, ge dagɛ tomam n nyɛte sɛla. 8To me kɔ'ɔn sɛ' ze'ele mɛ soŋa soŋa daarɛ woo. To bote te to bahɛ teŋa wa zuo ge keŋɛ ta bɔna to Na'ayenɛ saazuo yire la poan. 9Ge se'ere n gane zan'an dela to han bɔna la teŋa wa zuo la bii to boe la saazuo yire la ha, to bote to eta la Na'ayenɛ suunre nyɛlom. 10Se'ere n sɔe la, to zan'an wan ba'ahom wa'an Krista nɛŋan me na te a gankɛ tɔ. A han gankɛ to bala, Na'ayenɛ wan bo nɛra woo sɛla te a nara te a to'e, a han daa eta la sɛla n de som bii sɛla n de be'em n daa nan boe teŋa wa zuo la. 11To me mi to zɔta to Daana Na'ayenɛ n de se'em mɛ. Bala to teregere mɛ te to bahɛ nɛreba basɛba me te ba sakɛ bo Yesu. Na'ayenɛ mi ton ane se'em zan'an mɛ. Mam me tare potɛn'ɛrɛ te ya me mi tomam ya sunya poan. 12To ka le zegera mɛ te to yele ya te ton de nɛresoma se'em. Ge to te ton zegera mɛ te to bahɛ ya te ya nyɛ sore te ya ŋmɛ'ɛra ya nyɔn'ɔnrɔ to zuo. Bala te ya wan ta'an tɔgɛ lebehe sɛba n ŋmɛ'ɛre ba nyɔn'ɔnrɔ yɛhera la asaala n nyɛte sɛla la ba nini, ge dagɛ la ba suunre poan la. 13Ge to han zaala, to ane bala la Na'ayenɛ zuo. To me han le ka zaala, to ane bala la yamam zuo. 14Krista nɔŋerɛ la n tare tomam. Se'ere n sɔe la, tomam baŋɛ te Krista wa ma'an n ki bo asaala woo. Bala asaala woo tare tɔntɛ a kum la poan mɛ. 15A daa ki bo nɛra woo te nɛresɛba n diŋɛ vɔna la da eta sɛla te bama mɛhe bɔta. Ge ba bɔna bo enŋa Krista. Enŋa n de se'em n daa ki' ge te Na'ayenɛ daa vo'e en bama zuo. 16Dene poan, nananawa, to ka le gankɛ se'em yɛhera ton nyɛ en te a ana se'em la zuo. To daa han pon gankɛ Krista yɛhera la ton nyɛ en te a ana se'em la zuo, nananawa, to ka le eŋɛ bala. 17Bala nɛra han naɛ la Krista, a daana nya dela nɛrepaalega. A etekɛgɛhe la ka le bɔna, ge sɛla woo nya dela paalɛ. 18Yele ana wa woo ze'ele la Yenɛ zen'an na. Enŋa n doohe Krista poan dekɛ tɔ naɛ a mɛŋa, ge bo tomam naarɛ yelehom wa. 19Yelehom wa dele, Yenɛ doohe la Krista poan dekɛ asaala woo teŋa wa zuo naɛ la a mɛŋa ge ka behera ba tuure la, ge nya dekɛ naarɛ yelehom mea bo tomam. 20Bala, tomam dela Yenɛ bitonohe, te la nya ana wo Yenɛ dole la tomam poan yi'ira ya la. Bala, to belone ya mɛ Krista zuo, te ya naɛ la Yenɛ. 21Yenɛ daa eŋɛ se'em n ka tare tuure wa mɛ te a dɛna tuure daana tomam zan'an zuo, te la bahɛ te to dɛna tontɔɔdoma wo enŋa Yenɛ mɛŋa la.

will be added

X\