2 Korẽntɩ 4

1Ge Na'ayenɛ n zote nɛreba ninbɔn'ɔn la zuo te a bahɛ te to tona toondena wa. Bala, sɛla ka boe wan sagom to sunya. 2To ka sakɛ te to tona vitooma ge to ka tone toonse'a te nɛreba eta ge ka bɔta te nɛra woo mina ba ete sɛla la. To me dagɛ ponpɔrɔŋdoma bii to tɔgɔra yelese'a n dagɛ yelemɛŋɛrɛ yɛhera Na'ayenɛ yetɔgom la poan. Le yɛ'ɛha, sɛla woo poan, to kɔ'ɔn tɔgɔra la yelemɛŋɛrɛ. Bala Na'ayenɛ nɛŋan, to kpeŋe to mɛhe bahɛ te nɛra woo baŋɛ to ane se'em. 3Ge tomam mɔɔle Yelesoma se'a wa han pin mɛ, a yi pin la sɛba n ye' sagaŋɔ poan la nɛŋan. 4Ba ka sakɛ bo Yelesoma. Se'ere n sɔe la Dima la n de teŋa wa zuo yenɛ la bahɛ te ba potɛn'ɛra bɔna lika poan. A bahɛ ba te ba ka nyɛta nɛɛhom sebo n nɛɛre bɔ'ɔra ba la. Nɛɛhom wa me ze'ele la Yelesoma la te to mɔɔla yɛhera pɛngɛsɛka te Krista se'em n kɔ'ɔn tara Na'ayenɛ wɔne nyɛta la. 5La dagɛ la to mɔɔla la to mɛhe yɛla. Ge to mɔɔle la Yesu Krista te enŋa n de to Daana ge tomam mɛhe me n de ya yamehe Yesu zuo. 6Te Na'ayenɛ n de se'em n daa yeti, Bahɛ te nɛɛhom wan nɛɛ lika poan. Ge la dela Na'ayenɛ dene mea n bahɛ te a nɛɛhom la nɛɛra to sunya poan. Nɛɛhom la n nɛɛre bala, la bahɛ to mɛ te to mina Na'ayenɛ pɛnka la n ane se'em. Pɛnka la nya nɛɛre Krista nɛŋa poan. 7Ge tomam tare toolom lɔgɔrɔ tona wa la yɔgɔrɔ dogorɔ wa poan. Bala n wan pa'alɛ yeti, paŋa la n gane zan'an la ze'ele la Yenɛ zen'an na ge dagɛ tomam zen'an. 8Daarɛ woo to ne nyɛ la daaŋɔ ge bala zan'an ka sagom tɔ. Le yɛ'ɛha me daanse'ere to ne tɛn'ɛha la potɛn'ya ayi' ayi', ge bala zan'an poan, tomam kelom nam Na'ayenɛ mɛ. 9To tare diŋdoma kekeko, ge to me kelom tara zɔdoma. Ba ne ta eŋɛ tɔ sɛla n ka ane soŋa, ge ba ka sagone tɔ. 10Saŋa woo tomam kɔ'ɔn bɔna la Yesu kum la nyɔnpɔnhega poan, bala te Yesu vom la me wan bɔna to iŋhe la poan. 11To bɔŋa poan daarɛ woo to ki la Yesu zuo. To ete bala te nɛreba nyɛ Yesu bɔŋa n ane se'em to zen'en. 12Bala te tomam ane wo to ki mɛ ge te yamam ton vɔna tomam zuo. 13Ge la golehɛ yeti, Mam sakɛ la zuo te n tɔgɔra wa. Bala mea te tomam tɔgɔra sɛla te to sakɛ wa. 14To mi te Na'ayenɛ se'em n daa bahɛ te to Daana Yesu vo'e la me wan bahɛ tɔ te to lagom la Yesu vo'e. Ge nya tare tomam la yamam wa'an a nɛŋan na. 15Dena wa woo dela yamam zuo. Ge nɛreba zo'e zo'e han nyɛ' Na'ayenɛ som la, ba wan na'aha Yenɛ la pɛnka kaanbegɔ kekeko. 16Te dena mea zuo, sɛla ka boe wan sagom to sunya. Ge la tomam iŋhe ka le kpe'em, ge to suunre kɔ'ɔn kpe'em mɛ daarɛ woo. 17Ge namehe seko te to nyɛta wa ane wo de dagɛ la sɛsɛla la ge kan bɔna bala wuuha. Ge pɛngɛsɛka te to yeti to ta nyɛ la gane namehe kona wa ge me wan bɔna wuuha. 18Se'ere n sɔe la, to potɛn'ɛrɛ kɔ'ɔn ka bɔna la yelese'a n nyɛte la nini. Ge la boe mɛ la yelese'a n ka nyɛte la nini. Sɛla n nyɛte la nini ka boe yuura, ge sɛla n ka nyɛte la nini bo mɛ wuuha.

will be added

X\