2 Korẽntɩ 3

1Ge mam n yele wana wa la dagɛ la to nya bote to ŋmɛ la to nyɔn'ɔnrɔ yɛhera to mɛhe yele. Bii la wan ta'an dɛna la to bote la se'em n golehɛ gɔŋɔ yɛhera to tom soma n ane se'em bo ya bii yamam golehɛ de taaba bala bo se'em wo nɛreba sɛba n ete bala laa. 2Yamam mɛhe ane me wo gɔŋɔ la te ba golehɛ eŋɛ to suunre wa poan te nɛra woo nyɛ kɔ ge kaanlɛ la. 3Dena wa pa'alɛ soŋa soŋa te Krista mɛŋa n golehɛ gɔŋkona nya dekɛ kɔ tom tomam. La me dagɛ la a dekɛ la sɛla n golehɛ nyɛta la nini, ge a golehɛ a Sea la a ka golehɛ a kugu zuo ge a golehɛ a la to sunya poan. 4Tomam tare potɛn'dena wa mɛ to bɔŋa Yesu poan, Yenɛ nɛŋan. 5Ge yelese'ere ka boe to zen'en n wan bahɛ tɔ te to tɛn'ɛha te to wan ta'an tom toondena wa. Paŋa sɛka te to tara la yehe la Na'ayenɛ zen'en na. 6Te la dɛna la enŋa Na'ayenɛ n bo'ore to sore te to tona nɔbiŋere paalɛ la tooma. Nɔbiŋere paalɛ la me dagɛ Pa'alegɔ la n tare kum kena na la. Ge nɔbiŋere paalɛ la yehe la Yenɛ Sea la zen'en, ge Sea la n tare vom kena na. 7Pa'alegɔ la n koore te ba yuun kerehɛ a golehegɔ eŋɛ kuga zuo la. Yuun han tara na'ahegɔ te Israeldoma koŋɛ ba kpa' beha Moses nɛŋa la, la ka nyaka la n pon kan yuue ge saalom. 8La nya wan eŋɛ la wane te Sea la tooma kan tara na'ahegɔ gana bala. 9Kum yɛla han tara na'ahegɔ bala, tontɔɔ yɛla la wan perɛ mɛ la na'ahegɔ n gane bala. 10Bala, sɛla te ba daa pon na'ahara la, ka le tara na'ahegɔ. Se'ere n sɔe la na'ahegɔ kantɛ n gane zan'an n tee soe. 11Sɛla la n kan bɔna wuuha wa yuun han wa'ana la na'ahegɔ, ge na'ahegɔ seko n wan wa'ana bɔna wuuha wa gana bala. 12Bala, ton tare beere potɛn'ɛrɛ wa zuo, to bɔŋa ka tara dabeem. 13Tomam ka ane wo Moses n yuun ane se'em la. A dekɛ tanɛ pin' a nɛŋa te Israeldoma la da nyɛta a nɛŋa la, na'ahegɔ seko n bahɛ te a nɛŋa la nyagera n kan le bɔna la zuo. 14Ba yuun ka bɔkɛ sɛla la fiin me. Ge tole na yehe zina, tanɛ la wɔn te de pin' la ba yam te ba han kaanla gɔnɔ la yɛhera nɔbiŋere kɛka la, ba ka tara bɔkerɛ de poan. Han dagana la nɛra n sakɛ bo Yesu Krista, a daana kan ta'an pilige tanɛ la bahɛ a zen'en. 15La nananawa, ba han kaanla Moses Pa'alegɔ la, tanɛ la kelom pin' ba yam mɛ te ba ka tara bɔkerɛ de poan. 16Ge ba ta'an pilige tanɛ la wo ban golehɛ Yenɛ gɔŋɔ poan yele se'em la. La yeti, Ge a han ne kɛn' te a ta tɔgɛ la Daana la, a ne pilige tanɛ la bahɛ mɛ. 17Bala, nananawa, to Daana Na'ayenɛ se'em te to porɛ a yu'urɛ kalam wa dela a Sea la. Te zen'an te to Daana Yenɛ Sea la bɔna la, fai boe la bilam. 18Bala tomam zan'an ka pin' to nɛhe, te Yenɛ na'ahegɔ la nɛɛra to poan. Yenɛ n de Sea la n bahere tɔ te to ana wo Yenɛ n an se'em la.

will be added

X\