2 Korẽntɩ 2

1Dene poan, mam eŋɛ n potɛn'ɛrɛ yele dena wa poan mɛ. De dela n ka le wa'an ya zen'en na bahɛ te ya suunre sagom. 2Se'ere n sɔe la, mam han eŋɛ ya te ya suunre sagom, ane nya wan le bɔna eŋɛ mam me te n poore pɛɛra? Se'em kan bɔna han dagana la yamam sɛba te n eŋɛ te ya suunre sagom mea ma'an. 3Bala n sɔe te n daa golehɛ gɔŋkona la bo ya na la. N daa ka bote n wa'ana te yamam sɛba n eŋɛ mam te n poorɛ pee la ton eŋɛ mam te n suunre sagom. Se'ere n sɔe la, mam mi soŋa soŋa te mam poorɛ han pee, yamam me poorɛ wan pee. 4La daa dela daaŋɔ la sunsagaŋɔ la nintam te n daa golehɛ ya gɔŋɔ la na la. Ge mam n daa golehɛ gɔŋɔ la bo ya la daa dagɛ la n daa bote n sagom la ya se'em suunre. Ge, n bahɛ te ya baŋɛ mam nɔŋɛ ya zan'an se'em. 5Ge se'em n eŋɛ nɛreba te ba suunre sagom, ka sagom la mam ma'an suunre, ge a sagom la yamam me suunre. A han pon ka sagom ya zan'an suunre, ge a wan ba'ahom sagom ya sɛba suunre. N yete dena wa bala la mam ka bote n ba' daan en la zuo. 6Ge ya zo'e zo'e n bo nɛre'enadaana namehe seko taaba la seke ya. 7Bala, nananawa, di ya suguru bo ya en, ge soŋɛ ya en te a da tara sunsagaŋɔ. Han dagana bala, a nya wan ta kɔ'ɔn lu' zan'an zan'an Yesu sore dɔlɔga la poan. 8Ge n belone ya mɛ te ya bahɛ en te a nya baŋɛ nananawa te ya seren nɔŋɛ en mɛ. 9Ge n daa golehɛ ya gɔŋɔ la la yele dena wa zuo. De dela n daa bote n behɛ nya ya wan nyaŋɛ eŋɛ sɛla te n yele ya la ge me nana sɛla la sɛla te n yele na te ya eta la. 10Nɛra han tom sɛla n ka ane soŋa te ya di' suguru bo n de poan, mam me di' suguru bo en mɛ. La han ne ta nara mɛ te n seren di' suguru bo se'em, n ne di' suguru bo mɛ. N ete dena wa la yamam zuo Krista nɛŋa. 11N me eŋɛ bala te Dima n da nyɛ' nɛŋa eŋɛ sɛla ta a yete a eŋɛ la. Se'ere n sɔe la, to mi' Dima sɔrɔtɔ n ane se'em mɛ. 12Ge mam n daa paɛ Troas teŋa la, n daa mɔɔlɛ Yelesoma la yɛhera Krista yele bo nɛreba bini mɛ. Mam daa eŋɛ bala la, n daa nyɛ te to Daana Na'ayenɛ bo sore te n tom tooma bini. 13Ge la daa daan mam mɛ. Se'ere n sɔe la, n daa ka nyɛ to sɔɔn Titus bini. Bala n daa keehe nɛreba la bini ge daa tole Makedonia teŋa poan. 14Ge to bo Yenɛ fara, la enŋa n dole Krista poan bɔ'ɔra to nyaŋerɛ, ge dɔla to poan te to mɔɔla Krista yelesoma la n ane wo sɛla n tare nyuŋo soŋɔ te ko yeregera zen'en woo la. 15Tomam ane wo sɛla n tare nyuŋo soŋɔ la te Krista dekɛ to kaanbɛ bo Yenɛ bɔ'ɔra sɛba te Yenɛ fan' ba la sɛba n ye' sagaŋɔ poan la. 16Tomam dela nyuŋo seko n fɛn'ɛn bo sɛba n ye' sagaŋɔ poan la, ge dɛna nyuŋo soŋɔ bo sɛba n nyɛ faanrɛ la. Ane n wan ta'an tom dena wa? 17Tomam ka mɔɔlɛ Yenɛ yelehom la wo to koohore bo mɛ la. Na'ayenɛ n tom to la zuo, to tɔgɔre la yelemɛŋɛrɛ a nɛŋan bɔ'ɔra nɛreba, wo ton n de Krista yamehe.

will be added

X\