2 Korẽntɩ 11

1Ge mam tɛn'ɛhe ne te la kan daana ya la mam, ge n gɔɔntooma wa te n tona la. N belone ya mɛ te ya da bahɛ te la daana ya de zuo. 2Mam nyuune ya zuo mɛ wo Na'ayenɛ me n nyuune ya zuo se'em la. Wo ya dela pɔgɔsa'arɛ se'em n nan ka mi' boraahe te ba biŋe nɔɔrɛ te ba dekɛ en elehe sera la. Bala me te mam biŋe nɔɔrɛ te n dekɛ bo Krista deyena ma'an la. 3Ge dabeem tara mam te daanse'ere se'em wan pan'ahɛ ya te ya tee ya potɛn'ya ge kan le dɔla Krista la sunyenɛ la yelemɛŋɛrɛ wo bonsɛla la n yuun dekɛ yam yetɔgom pan'ahɛ Eve se'em la. 4Se'ere n sɔe la, ya to'ore se'em woo n wa'ana mɔɔla Yesu me ayema ha ge dagɛ Yesu se'em te to mam daa pon mɔɔlɛ bo ya la popeelom. Ya me kelom sakera la popeelom bɔ'ɔra sea sɛka la yelesoma se'a n boe boyema la Yenɛ Sea la la Yelesoma la te to daa poan mɔɔlɛ bo ya te ya sakɛ bo la. 5Ge mam ka tɛn'ɛhɛ te sɛba te ya dekɛ ba tɛn'ɛha te bama dela Yesu tontoneba sɛba n gane zan'an la gane mam. 6Ge daanse'ere mam ka malom n tɔgɔra nɛrekooŋɔ poan. Ge, han de'a n mi'ilom Yesu sore dɔlɔga poan, n mi mɛ. To me bahɛ te ya baŋɛ dena wa mɛ daarɛ woo la yelese'ere woo poan. 7Mam n daa wa'ana mɔɔlɛ Yelesoma la yɛhera Na'ayenɛ yele bo ya la, n daa ka yele ya te ya yɔ' mam sɛla. Ge n daa sirihe n mɛŋa te n ton zɛnkɛ yamam saazuo. Mam n daa eŋɛ yele ana wa woo la daa dela tuure n bala te n eŋɛ? 8Ge mam n daa wa'ana tona la ya, lagaŋseto n dole Yesu sore ge me bɔna zen'se'ehe me ha la n daa yɔɔre mam. N daa wone te n faanre ba mɛ te n ta'an tona bɔ'ɔra ya. 9Te se'em ma'an te n daa bɔna la ya la, n daa han bɔta ligiri n daa ka daane ya te soŋɛ mam. To sɔɔnrɔ sɛba n ze'ele Makedonia teŋa wa'ana la n daa tare sɛla woo te n nara te a tara na bo mam. Wo mam n daa pon ka dekɛ n mɛŋa delom ya se'em yia la, bala me te n kelom kan dekera n mɛŋa delom ya. 10Bala, bahɛ ya te n yele ya te yelemɛŋɛrɛ la te Krista bahɛ mam te n tara la, se'em ka boe wan gu' n nɔɔrɛ te n da zɛnkera n mɛŋa zen'sɛka woo Greek teŋa poan. 11Ya mi se'ere zuo te n yele dena wa? La dagɛ la n ka nɔŋɛ ya me zuo. Na'ayenɛ mi te n nɔŋɛ ya. 12Dene poan, n wan kelom tona sɛla te n tona nananawa. Bala te sɛba n me dekɛ ba mɛhe te bama dela Yesu tontoneba la kan nyɛ sore zɛnkera ba mea saazuo yɛta te bama la tomam lagom tona la toonyenɛ. 13Nɛrebana wa seren dagɛ Yesu tontoneba, ge ponpɔrɔŋdoma n de ba. Ba parom ne mɛ yɛhera ba tooma poan ge me eta ba mɛhe ana wo bama seren dela Yesu Krista tontoneba la. 14Ge ban ete se'em la dagɛ pakerɛ. Dima la mɛŋa ta'an eŋɛ a mɛŋa wo a dela soŋora se'em n tare yelemɛŋɛrɛdaana yelehom la. 15Bala, la dagɛ yelekantɛ Dima yamehe han dekɛ ba mɛhe ana wo ba dela yamehe sɛba n de yelemɛŋɛrɛdoma la. Bala ba'ahegɔ poan, ba ta tɔ'ɔra la sɛla te ba nara te ba to'e yɛhera sɛla te ba eta la. 16Ge n le yɛta dena wa mɛ te nɛra da dekɛ mam te n dela gɔɔŋɔ. Ge ya han dekɛ mam te n dela gɔɔŋɔ, ye to'e ya mam soŋa soŋa wo ya wan to'e gɔɔŋɔ soŋa soŋa se'em la. Bala te n wan ta'an ŋmɛ' n nyɔn'ɔn fiin wa. 17Ge yelemɛŋɛrɛ, sɛla te mam yɛta nananawa, dagɛ la to Daana Na'ayenɛ n bote mam te n yele bala. Ge lan de nyɔn'ɔn ŋmɛ'an yele la n tɔgɔrɛ wo n dela gɔɔŋɔ la. 18Ge nɛreba zo'e zo'e n diŋɛ bɔna ŋmɛ'ɛra ba nyɔn'ɔnrɔ la ba mɛhe n eŋɛ sɛla la zuo mam me wan eŋɛ la bala. 19Yamam mɛhe dela yamdoma. Bala, to'e ya mam, bii n han pon dɛna gɔɔŋɔ. 20Ya to'ohere se'em woo n bo'ore ya nɔɔrɛ te ya eŋɛ sɛla, bii a fan' ya mɛ, bii a dekɛ ya mɛ te ya dɛna a yamehe, bii behɛ ya la yoo, bii a lobe la ya sapɛnka. 21La tare mam la vi te n yele dena wa, ge la dela sera yeti, Tomam pɔ'ɛ la tɔrɔgɔ la to dekɛ yele ana eta ya. 22Ba dela Yudoma. Mam me dela bala. Ba me le dɛna la Israel teŋa nɛreba. Mam me dela bala. Ba dela Abraham yaahe. Mam me kelom dɛna la bala. 23Ba dekɛ ba mɛhe te bama dela Krista yamehe. Ge daanse'ere mam tɔgɔre wo n dela zɔlɔgɔ la. Dene de se'ere la, mam de Krista yameŋa gana bama n de se'em la. Mam n daa tom gana ba. Ba daa tare mam eta pakadeen gana ba. Ba daa me ne ŋmɛ' mam le gana ba ge te n me daa ne ge fiin wa la n ki' yelese'ere poan gana ba yɛ'ɛha. 24Sugumnɔɔren bonuu te Yudoma ŋmɛ' mam la kpa'aherɛ sugumnɔɔren pihitan' la bawae'. 25Sugumnɔɔren botan' me te ba daa ŋmɛ' mam la ka fɛɛn behe gee te ba me tabelɛ lobe mam la kuga. Sugumnɔɔren botan' te ɔɔnrɔŋɔ libe mam ko'om poan ge te n me le tabelɛ bɔna ko'om poan bolika tara tara la yiimbeere. 26Saŋa zo'e zo'e te n pɔnhɔra n vom kolaahe ko'om poan, nayigehe nu'uhen, n teŋa nɛreba la sɛba n dagɛ teŋa nɛreba nu'uhen, nɛrekooŋɔ poan, mɔen dunhe, ko'kantɛ poan, la n sɔɔnrɔ sɛba n de gongɔn'ɔhomdoma nu'uhen. 27N daa ne ta tom ne ta taregɛ. Daanse'ere ne bɔna mɛ te n daa ne pon ka ginhe. Daanse'ere me n kom ne dona te ko'nyuuro me tara mam. Daanse'ere me le yɛ'ɛha, n me ne ka tara dia zo'e zo'e ge ne ka nyɛ' zen'an te n wan kɛn' gan'anrɛ bii n nyɛ' lɔgɔrɔ yɛ'. 28Yele ana pooren lagom la woo yɛla zi mam la bala daarɛ woo. 29Se'em han ne ka sɛ' ze'ele yelese'ere poan, n ne baŋɛ la kpe'em se'em bo en mɛ. Se'em me han ne ta tom be'em, n suunre me ne sagom mɛ de zuo. 30Ge mam han yete n ŋmɛ' n nyɔn'ɔn, n ŋmɛ'ɛre mɛ la yelese'a te n pɔ'ɛ tɔrɔgɔ la a la. 31Ge Na'ayenɛ, to Daana Yesu Sɔ' se'em te nɛreba pɛngera en wuuha la mi te n ka parone. 32Mam n daa ta bɔna Damaskus teŋa poan la, Naba Aretas bahɛ te teŋbehera la daa dekɛ nɛreba gu' teŋa la nayahe la ba ta'an nyɔkɛ mam. 33Ge Yesu dɔlɔba n boe teŋa la poan la n yuun dekɛ mam eŋɛ pi'ɔ poan, lo' pi'ɔ la mi'inhe, nya dekɛ doohe yoko poan lameta dangoone la bahera ha te mam ta paɛ teŋa n de mam peɛn naba nu'uhen zɔ'.

will be added

X\