2 Korẽntɩ 10

1Nananawa, mam Paul mɛŋa, mam se'em te basɛba yeti, N han ne zɛ'a ya nɛŋan n ne sigehe la n mɛŋa, ge n han ne bɔna zaan zaanrɛ ha n ne tɔna mɛ la ya la. N belone ya mɛ la Krista sigehe n mɛŋa la, la a baanlam bɔŋa la yeti, 2Te n han wa'an ya zen'en na, ya da pɛnregɛ mam te da tɔgɔra banla banla. Ge mam mi soŋa soŋa te sɛba te n kan tɔgɔra banla banla bɔ'ɔra ba dela nɛresɛba n tɛn'ɛhe te to tone to tooma bala la teŋa wa zuo nyɛlom zuo la. 3La de yelemɛŋɛrɛ te to boe la teŋa wa zuo, ge to mam ka zaberɛ to zaberɛ wa wo teŋa wa zuo n zabere se'em la. 4Zaberɛ lɔgɔrɔ seto taaba te tomam tara zabera to zaberɛ la ka ane wo teŋa wa zuo zaberɛ lɔgɔrɔ la n an se'em la. Ge to tare la Na'ayenɛ zaberɛ lɔgɔseto n gane zan'an to tare sagom na la paŋa zen'enhe woo. Ton tare sagom na sɛla la sɛla dela ponpɔrɔm nɔkpɛ'ɛma, 5la yelese'a n gure te nɛra ka ta'an mina yelemɛŋɛrɛ yɛhera Na'ayenɛ. To me tare zabera lɔgɔtona bahera te nɛreba potɛn'ya n tɛɛra te ba nana Krista. 6To me han ta nyɛ' soŋa soŋa te yamam kɔ'ɔn nana to nya wan maahom dekɛ zaberɛ lɔgɔtona namehɛ nɛresɛba n ka nane la. 7Yamam behere la yeŋa la, se'em han bɔna tɛn'ɛhɛ te enŋa boe mɛ la Krista, a malom tɛn'ɛhɛ soŋa ge tomam boe mɛ la Krista wo enŋa n boe la Krista se'em la. 8Ge vi kan tara mam n han pon ŋmɛ'ɛra n nyɔn'ɔn yɛhera paŋsɛka te to Daana Na'ayenɛ bo to la. A bo to paŋa la mɛ te to soŋɛ ya, ge dagɛ to sagom ya. 9N me ka bote la ana wo n zegere te n bahɛ te dabeem n kɛn' ya yɛhera n gɔnɔ la te n golehɛ bo ya la. 10Se'em ta'an yeti, Paul n golehɛ a gɔnɔ la poan yɛta se'em la an wo se'em n de zuodaana bɔ'ɔra nɛreba a nɔɔrɛ la. Ge, a han ne paɛ to nɛŋan na, a ka tare yelese'ere lɔɔra ge te n me ne tɔgɛ se'em la me ka tare vɔnrɛ. 11Nɛra ena daana han bɔna, a dela a baŋɛ te ton boe zen'an kayema ha ge goleha to gɔnɔ la yele se'em la la ton boe la ya ge eta sɛla la dela boyena. Yelehegɔ ka bo ba se'em poan. 12Ge yelemɛŋɛrɛ, to mam ka zegere te to dekɛ to mɛhe te to dela boyena la nɛresɛba n zɛnkere ba mɛhe saazuo la bii to dekɛ to mɛhe magaha la ba. Ba dela gɔɔnɔ. Ba behɛ la ba mɛhe n an se'em tara magaha la taaba, ge me gankera taaba yɛhera ba mɛhe a ane se'em. 13Ge han dɛna tomam, to kan zɛnkɛ to mɛhe saazuo ta ganɛ to tɛka n de se'em. To tɛka dela Na'ayenɛ n bo to a toonse'ere te to tom la. A toonɛ la me lagom dɛna la to tona la ya. 14Dene poan, to mam me n daa wa'ana te to mɔɔlɛ Yelesoma la bo ya yɛhera Krista yele la, to daa ka yakɛ to beene la. 15Bala, tomam ka zɛnkere to mɛhe saazuo yɛhera nɛresɛba n tom toonse'a gana tɛgɛsɛka beene te Na'ayenɛ bo to la. Ge to mam n ton tɛn'ɛha se'em la dela ya wan malom sɛ' ze'ele soŋa soŋa ya sakerɛ Yesu sore dɔlɔga la poan ge te to me wan malom tom gana bala ya zen'en. To me wan tona daarɛ woo tɛkera la zen'en beene te Na'ayenɛ bo la. 16Bilam te to nya wan ta'an keŋɛ teŋse'ehe n ka pɔnre la ya ta mɔɔlɛ Yelesoma la bo nɛreba la bini. Bala te to kan zɛnkera to mɛhe saazuo yɛhera toonse'ere te ba pon tom zen'sɛka te se'em sɔna behera. 17Ge ba golehɛ Yenɛ gɔŋɔ la poan yeti, Hon se'em woo n wan ŋmɛ' a nyɔn'ɔn, a ŋmɛ' ko te enŋa bɔkɛ ge mina mam te mam n de Na'ayenɛ. 18Se'ere n sɔe la, la dagɛ la nɛra mɛŋa n pa'alɛ a mɛŋa n ane soŋa se'em te a seren ana. Ge la dela Na'ayenɛ n tɛn'ɛhe en te a ana soŋa se'em te a seren ana.

will be added

X\