2 Korẽntɩ 1

1Mam Paul se'em te Na'ayenɛ bɔta te n dɛna Yesu Krista tontoneba la ayema la la to sɔɔn Timoti n golehɛ gɔŋɔ wa. To golehɛ bɔ'ɔra la lagaŋseko n dole Yesu sore bɔna Korint teŋa la n boe Greek teŋa la la sɛba woo n de Na'ayenɛ nɛreba bɔna Greek teŋa woo la. 2To Sɔ' Na'ayenɛ la to Daana Yesu Krista wan eŋɛ ya som ge bahɛ ya te ya tara sunma'ahom. 3Bahɛ ya te to po'ohɛ ya Na'ayenɛ se'em n me de to Daana Yesu Krista Sɔ' wa. Enŋa n de Sɔ' se'em n zote nɛreba ninbɔn'ɔn ge me le dɛna la se'em n soŋore nɛreba yelese'ere woo poan. 4A soŋore tɔ to daanɔ woo poan te to me ta'an soŋɛ nɛresɛba me n tara daanseto la. To soŋore nɛrebana wa yɛhera la soŋse'ere taaba te Na'ayenɛ soŋɛ tomam mɛhe la. 5Wo ton lagom nyɛta namehe seto te Krista daa nyɛ la, bala me te to lagom nyɛta soŋorɛ Krista zen'en. 6Ge tomam han nyɛ namehegɔ, la dela yamam soŋorɛ la ya nyɛ faanrɛ zuo. Ge Na'ayenɛ me han soŋɛ tɔ, la wan soŋɛ yamam me ge bo ya paŋa te ya din'inhe suunre ŋmibe namehe seto te ya nyɛta wo tomam me n daa nyɛ ge ŋmebere se'em la. 7Bala, bahɛ te tomam n tare potɛn'se'ere bɔ'ɔra ya la zin'ire me soŋa. Se'ere n sɔe la, to mi te ya han lagom nyɛta namehe seto te tomam me nyɛta la, bala me te ya me wan lagom nyɛ soŋse'ere woo te tomam me nyɛta la. 8Gee to sɔɔnrɔ, to bote te ya wan tɛnra namehe seto te to daa nyɛ Asia teŋa poan la. Namehe seto te to daa nyɛ la daa ba woŋɛ to mɛ te to daa tɛn'ɛha te to yeti to ki mɛ. 9To daa tɛn'ɛhe te daanden daarɛ n daa de te to yeti to ki. Ge dena wa daa eŋɛ bala te to da delom to mɛhe ge to dɛla Na'ayenɛ. Enŋa n de se'em n bahere te nɛreba vɔ'ɔra ba kum poan. 10Enŋa n faanre to namehe seto la n daa yeti to ko tɔ la poan bahɛ. A me wan faanra to bahera. To me nam en te a wan kelom kɔ'ɔn faanra to bala wuuha, 11yamam n sohore Yenɛ bɔ'ɔra to la zuo. Bala, te Yenɛ wan eŋɛ yelese'a woo te nɛreba kekeko po'ohera bɔ'ɔra en te a eŋɛ bo to la. Yenɛ me wan eta to som ge te nɛreba kekeko me wan pɛngera en bɔ'ɔra tɔ. 12Tomam n nam se'ere ge ŋmɛ'ɛra to nyɔn'ɔn dela, tomam mi te tomam tom sɛla woo teŋa wa zuo mɛ la yelemɛŋɛrɛ, la sera sɛka n ze'ele Yenɛ zen'an na. Ta' la yelese'a te to tom la yamam la. To ka tom wana mɛ la asaala yam, ge Yenɛ zo'ohogɔ la poan. 13To golehɛ la yelese'a ma'an te ya wan ta'an kaanlɛ ge bɔkɛ. Ge mam mi te ya wan ta bɔkɛ sɛla woo zan'an zan'an, 14te sɛla te ya bɔkɛ nananawa dela fiin wa. Bala te daanse'ere daarɛ te to Daana Yesu ta lɛbera na la, ya wan tara tomam ŋmɛ'ɛra ya nyɔn'ɔnrɔ te tomam me tara yamam ŋmɛ'ɛra nyɔn'ɔnrɔ. 15Gee n daa mi' te yele ana wa woo dela yelemɛŋɛrɛ. Bala n sɔe te n daa eŋɛ n potɛn'ɛrɛ yia te wan wa'ana behɛ ya. Bala te ya wan nyɛ' soŋorɛ sugumnɔɔren boyi'. 16N daa eŋɛ n potɛn'ɛrɛ te n han ta yɛ'a Makedonia teŋa poan, n doohe na behɛ ya. N daa ze'ele Makedonia teŋa lɛbera na, n daa bote te n doohe na behɛ ya. N bote ya soŋɛ mam mɛ te n keŋɛ Yudea teŋa poan. 17Bala, ya tɛn'ɛhe te mam eŋɛ n potɛn'ɛrɛ se'em wa, n ka mi sɛla te n eta? Bii ya le tɛn'ɛha te n han ne le eŋɛ n potɛn'ɛrɛ yelese'ere poan, n eŋɛ la n mea yele zuo? Bala, n ta'an ne yeti, Ɛɛn, la dela ɛɛn. Ge le yeti, Aai, la dela aai. 18Ge Na'ayenɛ n de yelemɛŋɛrɛdaana wa, mam n daa biŋe n nɔɔrɛ bo ya, la dagɛ te n yeti, Ɛɛn, Ge le ŋmɛregɛ yeti, Aai. 19Yesu Krista se'em n de Na'ayenɛ Dayɔa dela se'em te mam la Silas la Timoti daa mɔɔlɛ Yelesoma la yɛhera a yele bo ya la. Bala, a dagɛ se'emdaana n yeti, Ɛɛn Ge le ŋmɛregɛ yeti, Aai. 20Krista la zuo Yenɛ nɔbiŋ'a la zan'an dɛna Ɛɛn. Bala zuo te to ne yeti Taarɛ doohe Yesu poan te la dɛna pɛnka bo Yenɛ la. 21Ge la dela Na'ayenɛ mea n bahɛ tomam la yamam te to sɛ' ze'ele soŋa soŋa to bɔŋa Krista poan. La le kelom dɛna la Na'ayenɛ mea n yehe to te to bɔna toyema. 22Enŋa Na'ayenɛ n daanlɛ tɔ pa'ala te enŋa n sɔe tɔ ge me bo to a Sea la te la dɛna la a seren wan eŋɛ sɛla woo te a tara te a bo to la. 23Ge Na'ayenɛ n de se'em n nyɛte sɛla la sɛla te n eta. Enŋa n mi n potɛn'ɛrɛ n an se'em. Bala a mi' te n ka parom la mam n daa yete n wa'an ya zen'en na ge daa le tɛn'ɛhɛ ka keŋɛ Korint teŋa poan la. N daa eŋɛ bala te yamam n da nyɛ' daaŋɔ zuo. 24La dagɛ la to zegere mɛ te to pɛnregɛ ya te ya sakɛ sɛla la sɛla te ya sona te ya sakɛ bo. Se'ere n sɔe la, ya mɛhe pon sɛ' ze'ele soŋa soŋa ya sakerɛ Yesu sore dɔlɔga la poan la mɛ. Ge la ton dɛna la ya mɛhe tara popeelom zuo te to tona la ya la.

will be added

X\